Agimtuod dagiti Agtutubo . . .

Adda Aya Dakes Kaniak?

Ti napartak a panagsaknap ti AIDS insentrona ti atension ti lubong iti tema iti homoseksualidad, a nangipalgak kadagiti adu a salsaludsod ken panagbuteng kadagiti agtutubo maipapan iti seksualidadda. Daytoy nga artikulo ket agserbi a mangilawlawag iti dadduma kadagiti a pagbutbutngan iti natan-ok, makatulong a pamay-an.

‘MAYSAAK a babai ken addaan iti nakakatkatawa a rikna maipapan iti maysa kadagiti mannursurok. Maamakak a mabalin nga agayatak kenkuana wenno iti maysa a banag.’ Kasta ti insurat ti maysa a 13-años a babai. Ti kasasaadna ket saan a naisangsangayan. Ti libro nga Adolescence napaliiwna a ti tema a homoseksualidad “tignayenna ti panagdanag kadagiti adu a bumarito/bumalasitang . . . Gagangayen para kadagiti bumarito/bumalasitang ti mangpanunot no isuda ket homoseksualda a mismo.”

Ni Alan, itan maysan a baro, malagipna: “Ni Mark ti damdamo a pudno a gayyemko. Sakbay daytoy, maysaak idi a konserbatibo idiay eskuelaan, maliklikan gapu iti panaginteresko iti arte ken nakurang ti interesko iti panagay-ayam. Ti pannakipagayam ken ni Mark ti nangtignay kaniak iti nabara a rikna iti panagraem. Isut’ inay-ayatko a tarigagayak ti makikadua kenkuana ken tarigagayak ti agbalin a kas kenkuana. Ngem madanaganak no dagitoy a kellaat a rikna ket mabalin a pannakaiparangarang iti matmaturog a homoseksual a pagannayasan.”

Sadino ti pagtaudan dagita a rikrikna? Dagitoy kadi ket dakesda?

Ti Nagtaudan ti Panagrayo iti Kasekso

Awan ti dakes iti panagtarigagay a nasinged kadagiti dadduma. “Adda gayyem a nadekdekket ngem kabsat,” kuna ti Proverbio 18:24. Adu a nasinged a relasion, nga awan ti homoseksual a kasasaadna, ngarud ti naipaganetget iti Biblia; kas pangarigan, ni Jesus ken ti apostol a ni Juan, ni Noemi ken ni Ruth, ken ni David ken ni Jonathan.​—Ruth 1:16, 17; 1 Samuel 18:1;John 13:23.

Ti panagkursonada iti kasekso, nupay kasta, naiduma manipud iti nataengan a relasion a naibatay iti pannakipagayam wenno panagraem ta ti kasta a panagkursonada ket basta pannakakayaw a masansan maymaysa laeng a dasig. Ti puntiria iti panagkursonada ket masansan a maysa a natataengan nga agtutubo wenno nataengan (kas iti maysa a mannursuro) a mabalin a pudno a madaydayaw.

Kaaduan nga eksperto ti mamati a dayta a panagkursonada ket apagbiit laeng a tumataud a rigat, “ad-adda a mangipamatmat iti irarang-ay iti kinabarito imbes a homoseksualidad.” (Coping With Teenage Depression, ni Kathleen McCoy) Dagiti agtutubo sapsapulenda ti pakailasinan, ti pannakaawat. Kas kunaen ni Sally Helgesen iti dayta: “Masansan nga agturongkami kadagiti natataenganen nga [agtutubo] nga agparang a mangirepresentar iti kayatmi a pagbalinan ket padasenmi a tuladen ida.”

Ti pannakakayaw kadagiti miembro iti kasekso mabalin met a mapataud gapu iti kinaliday, ti kinakurang iti panagraem iti bagi met laeng, wenno ti pannakasapul iti emosional a suporta. Nalagip ni Alan: “Ti kangrunaan a banag isu ti di kinatalged ti emosionko ken ti panangisinsinak iti bagik manipud kadagiti dadakkelko. Gapu ta mariknak a diak mabalin ti makisarita kadakuada, ad-adda a nagipudnoak ken ni Mark.”

Kuna ni Dr. Richard E. Kreipe a ti “relasion a panagkinnursonada ket saan koma a maibilang a ‘homoseksual’ yantangay mammano a dayta ket resulta iti nasinged a panagdenna. Kasta met, ti kasta a kababalin dina ipadto ti masanguanan a homoseksual a panagbalbaliw kas maysa a nataengan.” (Medical Aspects of Human Sexuality) Ngarud kunaen ni Alan: “Dagiti pagbutbutngak maipapan iti rikriknak ken ni Mark ket napalag-an. Nabigbigko a pudno nga awan ti aniaman a ‘dakes’ kaniak kamaudiananna!”

Nupay kasta, ti panagkursonada iti kasekso masansan a mangibunga iti panagliday, panagimon, panangikut, ken ti pudno a panangpampanunot iti daydiay daydayawen​—pudno a saan a nasalun-at a rikrikna! Kasano a maikkatyo dagita a rikrikna? Mangrugikayo babaen ti panangalayo iti awan derrepna, addaan panggep a panangmatmat iti tao a daydayawenyo. Saan kadi nga isu ket tao laeng, nga addaan kadagiti amin a pagkapuyan ken pagbiddutan? (Roma 3:23) Naimbag ta, dagiti tin-edyers gagangay a malabsanda dagita a panagkursonada bayat ti panagmataenganda ket mangrugin ti pannakariknada a natalgedda.

Pannakasapul ti Panagannad

Ania, ngarud, no ti panagkursonada iramanna dagiti erotiko a panagpampanunot wenno ar-arapaap maipapan iti maysa a kasekso? Laglagipenyo, addakayo iti “kinalasbang ti kinaagtutubo”​—ti tiempo a kankanayon a pannakariknayo kadagiti kabbaro a tarigagay ken rikrikna. (1 Corinto 7:36) Agingga a masursuroyo no kasano ti panangtamingyo kadagitoy a rikrikna, mabalin a puntiriakayo ti di matarigagayan a seksual a pannakagargari. Ket nupay makapaaburido ti pannakarikna iti pannakakayaw iti maysa a kaseksoyo, dayta dina kaipapanan nga agbalinkanto a maysa a homoseksual. Kaaduan nga agtutubo ket malabsanda dagita a rikrikna.

Kaskasdi, masapul ti panagannad iti pannakasilo iti homoseksualidad. Mamakdaar ti Biblia idiay 1 Corinto 6:9, 10: “Uray dagiti mannakiabig, uray dagiti agrukbab kadagiti ladladawan, uray dagiti binabai, uray dagiti lallaki a makikaidda kadagiti padada a lallaki, (“dagiti homoseksual,” Today’s English Version) . . . saandanto a tawiden ti pagarian ti Dios.”​—Idiligyo iti Levitico 18:22; 20:13; Roma 1:26, 27.

Maysa nga agtutubo a kankanayon a mangpampanunot kadagiti imoral a pampanunot ket agpegpeggad iti panagbalin ti panagar-arapaapna a pudpudno. (Santiago 1:14, 15) Dagiti surbey ipalgakda a nangnangruna kadagiti tawtawen kasanguanan ti panagbalin a tin-edyer, “ti seksual a panagay-ayam” kadagiti agtutubo a kasekso ket gagangay unayen. Pudno, kaaduan nga eksperto umanamongda a mammano a daytoy ket agturong iti panagbiag kas maysa a homoseksual. Nupay kasta, ti kasta a “seksual a panagay-ayam” (nupay maaramid a saan a pudno a maawatan ti moral a kaipapananna) ket narugit ket mabalin nga agbanag pay iti por·neiʹa​—ti Griego a sao nga inusar ti Biblia a mangdeskribir iti imoral a seksual a kababalin iti sabali a tao. (Judas 7) Ti kasta a kababalin ket saan laeng a di makaay-ayo ken Jehova no di ket mangiturong iti maysa nga agtutubo kadagiti homoseksual nga ar-aramid ket mangibati kadagiti napaut nga emosional a sugat.

Gapuna no ti erotiko a pampanunot maipapan kadagiti dadduma a kasekso ket mapasamak, ikagumaanyo a salimetmetan ti panangpanunotyo kadagiti bambanag a ‘nalinteg, nadalus, ken makaay-ayo.’ (Filipos 4:8) Liklikanyo dagiti bambanag a manggargari kadagiti imoral a tarigagay, kas kadagiti dadduma a pabuya iti TV, dagiti pornograpiko a pelikula, ken nalabit uray pay dagiti uso wenno dagiti magasin iti bodybuilding a mangipakpakita kadagiti nakaing-ingpis ti pannakakawesda a modelo. Ni Dave, a sapsapliten iti homoseksual a panagar-arapaap ken panagtagtagainep idi isut’ maysa a tin-edyer, aminenna: “Siguradoak nga agpadpada a ti masturbasion ken ti pornograpia ket direkta a mamataud kadagitoy a panagar-arapaap agsipud ta dagiti bambanag a makita kadagiti erotiko a literatura ken kadagiti sine ti masansan a mapampanunotko iti rabii.” Babaen laeng ti panangpunno iti isip kadagiti umiso a pampanunot a nabaelak a linapdan dagiti narugit a panagar-arapaap.

Ni Jason, itan maysan a Kristiano a panglakayen, kasta met ti nariknana a seksual a pannakaawis kadagiti kaseksona met laeng idi isut’ ub-ubing pay. Inaminna: “Pagarupek a ti masturbasion pinakarona ti parikutko iti panagar-arapaap iti kaseksok. Pinataudna kaniak ti inaldaw a panangpampanunot kadagiti nakaro ti kinaimoralna a bambanag. Daytoy ti nangibangon iti nabileg a panagtarigagay pay kadagiti narugit a tartarigagay.” Masapul a ‘patayenyo dagiti kamkameng ti bagiyo no maipapan iti pannakiabig.’ (Colosas 3:5) Ti masturbasion rubrobanna laeng dagiti dakes a tarigagay.a

Ti panagipudno kadagiti dadakkelyo wenno iti maysa a nataengan a Kristiano ket makatulong met. Dagita mabalin nga addaanda iti praktikal a balakad a maitukon ken mabalinda met a siputan ti panagrang-ayyo iti panangparmek kadagitoy a rikrikna. Ni Jason nagipudno iti maysa a nataengan a Kristiano ket kalpasanna kadagiti dadduma a panglakayen iti kongregasion. (Proverbio 11:14) Nalagipna: “[Ti gayyemko] imbagana kaniak a paaduek dagiti gagayyemko, lallaki ken babbai, saan a kankanayon a busbosek ti tiempok kadagiti isu met laeng a tattao.”

Agingga a nagun-odanen ni Jason iti panangtengngelna kadagiti seksual a rikriknana, nainsiriban pay laeng ti panangalana kadagiti panagannad. Nalagipna: “Masapul met a sursuruek ti panagannad iti panagrayo kadagiti tattao a kaseksok a manggargari kaniak iti seksual a pamay-an. Babaen iti pangrayo, kayatko a sawen babaen iti bassit a kinaariwawa ken panaginnungngo.” Ti kasta a panangdisiplina iti bagi maitunos iti balakad ni apostol Pablo a ‘pananggubat iti bagi, ken iturayan dayta, a sanayen dayta iti masapul nga aramidenna, saan nga iti tarigagayanna nga aramiden.’​—1 Corinto 9:27, The Living Bible.

Panangpalag-an iti Pannakarikna ti Basol

Dadduma nga agtutubo a naapektaran iti rikrikna iti basol ken iti panagduadua kalpasan a ti pannakakayawda ket limmamiisen. Dadduma ti matutuok met kadagiti pakalaglagipan a, kas ubbing, dida pagaammo a nagay-ayamda iti sekso a homoseksual ti kasasaadna.

Bassit ti maaramidan babaen iti panagdandanag iti nabayagen a napalabas, nangnangruna no nalabsanyon a nabayagen ti aniaman a pannakaawis iti kasekso.b Ta ngamin, ni Jehova ‘mamakawan iti nawadwad’ ket panunotenna no kasano a limitado ti pannakaawat ti maysa kadagiti seksual a bambanag idi isut’ maysa nga ubing. (Isaias 55:7) Ngarud mabalintayo a ‘patalgedan ti pusotayo iti sanguanan ti Dios no ti pusotayo pabasolennatayo, ta ti Dios dakdakkel ngem iti pusotayo ken isu ammona amin.’ (1 Juan 3:19, 20) Kaskasdi, ti pannakisarita kadagiti nagannak maipapan kadagiti bambanag wenno kadagiti Kristiano a papanglakayen mabalin a mapaneknekan a makatulong.

Ti panagkursonada ti maysa iti kasekso mabalin a nakababain ken makapaaburido a kapadasan. Ngem dayta di koma mangibati iti sugat nga agpaut iti tungpal-biag. Dayta ket maysa pay a pannakasubok ti agtutubo a mabalin a maparmek babaen iti panangdisiplina iti bagi ken ti tulong ni Jehova a Dios.

[Dagiti Footnote]

[Ladawan iti panid 23]

Ti panangisarita kadagiti rikriknayo kadagiti nagannak wenno maysa a nataengan a Kristiano mabalin a makatulong kadakayo a mangikabil kadagiti bambanag iti umiso a panangmatmat