Ad-adu a Pagtaengan Para iti Dumakdakkel a Pamilia
DAYTOY a magasin, Agriingkayo!, ken ti kaduana a, Ti Pagwanawanan, ket pinataud ti pamilia. Dagitoy ti mapatpataud babaen iti maaw-awagan pamilia ti Bethel, ti “Bethel” kaipapananna “Balay ti Dios.” Nasurok a 11 milion a kopia iti tunggal bilang ti Agriingkayo! ken nasurok a 13,000,000 a kopia iti tunggal bilang Ti Pagwanawanan ti maimaldit kadagiti papaandaren ti pamilia a paktoria iti aglawlaw ti lubong. Yantangay kadagiti kangrunaan a pagsasao dagiti dua a magasin ket maimalmalditda a mamindua iti makabulan, dayta ket ngangngani 50 milion a kopia ti maimaldit iti binulan, wenno agarup 2 milion iti tunggal aldaw a panagtrabaho! Mainayon iti dayta, ti pamilia ti Bethel mangpatpataud kadagiti pinullo a milion a Biblia, liblibro, ken polieto iti tinawen.
Ti pamilia ti Bethel iti sangalubongan dimmakkelen agingga iti nasurok a 9,000 a miembro. Dagitoy iramanna dagiti agwaywayas a lallaki ken babbai, agraman dagiti naasawaan. Ti internasional a hedkuarter dagiti Saksi ni Jehova, a masarakan idiay Brooklyn Heights a paset iti Brooklyn, Nueva York, addaan ti kadadakkelan nga indibidual a pamilia, nga agbilang iti 2,800. Dayta ket rimmang-ay manipud iti 600 a miembro idi 1960. Gapuna bayat ti panaglabas dagiti tawen, ad-adu a pagtaengan ti kasapulan a maipaay iti daytoy dumakdakkel a pamilia iti Brooklyn. Ti kadadakkelan a pasilidad, ti dati a Towers Hotel, ket nagatang idi 1975 ket natarimaan tapno pagtaengan ti agarup 800 a tattao. Ngem nabiit pay tallo a kangrunaan a pasilidad ti nainayon iti patpatakder ti Bethel.
97 Columbia Heights Ti maysa isu daytoy napintas, baro a 11-grado a patakder a mangtannawag iti East River, a masarakan iti lugar ti dati a Hotel Margaret. Iti dayta makita a naimbag ti maysa kadagiti kaaduan a maretretrato a buya iti amin a tiempo, ti skycrapers iti Lower Manhattan ken ti nalatak a pinansial a distritona. Ti napatpateg pay, daytat’ masarakan a sumaganad iti 107 ken 124 Columbia Heights, dagiti dadakkel a pagtaengan a pagtataengan iti nasurok a sangaribo a miembro ti pamilia ti Bethel.
Iti sangagasut laeng a tawen a napalabas, ti 50 metros a Hotel Margaret nakompleto idiay 97 Columbia Heights ket nagbalin a nalatak iti internasional. Idi Pebrero 1980, idi madama a maar-aramid ti Margaret tapno mapagbalin a luxury apartments, daytat’ dinadael ti apuy ket kalpasanna daytat’ narakraken. Idi 1986, kalpasan ti pannakaawat ti developer iti permiso a mabalinen ti agpatakder iti baro a patakder, inlakona ti sanikua iti Watchtower Society, maysa a legal nga ahensia dagiti Saksi ni Jehova. Bayat a maisagsagana dagiti agsasaruno a grado ti patakder a maipaay a pagtaengan bayat ti 1988, ti nakagupgopan a bilang a 250 a miembro ti pamilia ti Bethel ti immakaren.
Maysa a pannakangiwat iti kompania a nangdisenio iti patakder ti nagkuna nga adda panangikagumaan a “mamagtalinaed a sibibiag iti pakalaglagipan ti Margaret.” Ti pamay-an ti pannakaaramid dagiti tawa, kas pangarigan, ket mangipalagip iti tanso a metal a nausar iti Margaret. Kinuna pay ti pannakangiwat: “Pinadasmi a pagbalinen ti patakder a nataytayag ti rukodna iti sikiganna a sumango iti danum ken nababbaba ti rukodna iti sikiganna a sumango iti komunidad.” Gapuna, ti patakder ket nababbaba a kapatas dagiti patakder iti asideg.
Standish Hotel Ti maikadua a kangrunaan a nainayon iti patpatakder ti Bethel isu ti 12-grado nga Standish Hotel, nga asideg laeng iti kalsada, idiay 169 Columbia Heights. No saritaen ti pannakaibangon daytoy nga otel, a naipanagan ken Miles Standish idi nabiit pay a naglatak ti New England, ti Brooklyn Daily Eagle kinunana idi 1903: “Patien ti kompania a ti lugar a napilina, gapu iti aglawlawna ken ti di maartapan a buya ti East River ken dagiti dadduma pay a banag a paginteresan, ket nagsayaatan a lugar a maipaay iti maysa nga otel ket panggepna ti mangibangon iti maysa kadagiti kasayaatan ti pannakaibangonna ken kasayaatan dagiti mueblesna a balay iti pagilian.”
Di nagbayag nalukatan ti otel, ngem idi 1970 daytat’ nadadaelen iti kasta unay. Ginatang ti Cohi Towers Associates dayta idi nasapa pay a 1980’s, ket kabayatanna naaramid ti naan-anay a pannakatarimaanna nga addaan panggep a mangipaay iti kanayonan a pagtaengan ti pamilia ti Bethel. Idi 1986 nalpasen ti pannakatarimaanna, ket idi 1988 ti Watchtower Society ginatangna ti Standish. Dayta ti pagtaengan ti 140 a kamkameng ti pamilia ti Bethel ken agarup 25 kadagiti dati nga agnanaed sadiay.
Ti Bossert Hotel Ti maikatlo a kangrunaan a kanayonan ti patpatakder ti Bethel isu ti 12-grado a Bossert Hotel iti Montague Street, nakurkurang a lima a minuto a pagnaen manipud iti Standish. Immuna a nalukatan idi 1909 nga addaan ti 200 a kukuarto, dayta ti masarsarita a kasasayaatan nga otel iti Brooklyn. Ti kaaduan nga estilo ti arkitektura isu ti maika-15-siglo nga Italian Renaissance.
Idi 1914 ti sabali pay a 175 a kukuarto ti nainayon, ket dua a tawen kamaudiananna maysa a restaurant ti nainayon iti tuktok a kasla maysa a kubierta iti maysa a pribado a yate. “Awanen ti sabali iti siudad a makaparis iti dayta iti makaparagsak a mabuya,” kuna ti Brooklyn Daily Eagle idi 1949. “Dagiti natatan-ok a tattao iti pribado a biag, dagiti kamkameng ti teatro ken ti panagay-ayam iti lubong immayda iti Marine Roof.” Dagiti mangan, agraman dagiti agnanaed kadagiti nangangato a grado, tinagiragsakda ti interamente a pannakabuya iti igid ti baybay ti Nueva York, ti Governor’s Island, ti Statue of Liberty, ti igid ti baybay ti Jersey, ken ti makimbaba a pungto ti Manhattan.
Kamaudiananna, ti nakatantan-ok idi nga otel nagbalinen a nakalkaldaang ti kasasaadna gapu ta daanen ken nabaybay-anen. Dayta ti ginatang ti Cohi Towers Associates idi 1983, ket narugian ti adu a panangtarimaan iti dayta. Kalpasanna ginatang ti Watchtower Society ti Bossert idi 1988. Itan pagtataenganen ti agarup 270 a kamkameng ti pamilia, bayat a 40 wenno ad-adu pay kadagiti dati nga agnanaed ti agnanaed pay laeng sadiay.
Ti trabaho a panangisubli kinasapulanna ti panangsukat kadagiti amin a ruruangan ken tawtawa ken ti intero a tubtubona, dagiti pagpapudotna, ken ti elektrikal a sistemana. Naikkan met ti baro nga elebeytor, ket itatta dua kadagiti tallo a dati nga elebeytor ti matartarimaan. Dagiti pagsasalaanna ket napagbalin a tallo a nalalawa a kumedor, ket ti kusina iti basement narakrak, naibangon manen, ken naikkan kadagiti moderno nga alikamen. Dagiti kukuarto iti intero nga otel natarimaanda. Kasta met, ti lobby napasubli iti dati a naisangsangayan a kasasaadna, isu a mangiraman iti pannakatarimaan ti nadadael a kasla marmol nga adigina babaen ti pamay-an nga iti kaaduanna napukawen nga arte.
Iti ruar, ti intero a patakder ket nadalusan, natarimaan ti palitadana, ket dagiti adu a paspaset dagiti batbato a nangarkos ket naibangon manen. Ti nakipaset iti panagdalus, panagtarimaan, ken ti trabaho a panangisubli isu dagiti ginasgasut a boluntario a trabahador manipud iti isuamin nga Estados Unidos. Dagitoy indonarda ti tiempoda ken paglainganda iti maysa a lawas wenno ad-adu pay a tiempo. Maysa a grupo dagiti 39 nga agtutubo a babbai, a Saksi, a makita ditoy atep ti Bossert, ti nagtrabaho iti adu a bulbulan kadagiti andamio, a nangtarimaan iti makinruar a palitada iti otel.
No pagtitiponen, ti pamilia ti Brooklyn Bethel agnanaeddan kadagiti agarup 20 a pagtaengan idiay Brooklyn Heights, a mapagpagna laeng ti kaadayoda iti maysa ken maysa. Kinapudnona, ti Towers, 124 Columbia Heights, 107 Columbia Heights. ken 119 Columbia Heights, a pagtataengan ti ngangngani 2,000 iti pamilia, ket napagsisilpo babaen kadagiti usok. Addan plano a mangikonektar met iti baro a patakder ti 97 Columbia Heights kadakuada babaen iti maysa nga usok iti mabiiten. Ti Bossert ken ti Standish Arms, nupay kasta, ket adayoda unay kadagitoy a patpatakder tapno maikonektarda babaen iti usok iti sirok dagiti kalkalsada.
Ti idadakkel ti pamilia ti Bethel iparangarangna ti rumangrang-ay a panangipangag iti panangikaskasaba dagiti Saksi ni Jehova iti mensahe ti Pagarian. (Mateo 24:14) Ti 3,592,654 a makiramraman iti daytoy a trabaho idi napan a tawen ket nasursurok ngem mamindua iti bilang dagiti nakiraman iti dayta idi 1973. Dagiti miembro ti pamilia ti Bethel idiay Brooklyn, Nueva York, maragsakanda iti pribilehio a mangipaay iti naespirituan a kasapulan dagiti kakabsatda a lallaki ken babbai iti sangalubongan. Ket pudno nga agyamanda iti ad-adu a lugar a pagtaengan a naipaay kadakuada.
[Dagiti ladawan iti panid 24, 25]
Ti Standish Hotel ken ti lobby
Kasungani a panid: ti Bossert Hotel ken ti lobby
[Dagiti ladawan iti panid 26]
Dagiti boluntario a trabahador a nangtarimaan iti makinruar a palitada iti Bossert Hotel