Manipud Managbasatayo

Preemies Adda balasangko, nga addan iti maikatlo a tawen iti junior high school. Napaliiwko iti adun a tawtawen a nakapuy ti panagbasana ken ti panagimdengna. Iti panangparegtak kenkuana, nakaisaoak kadagiti sasao a mabalin a naranggas iti panagdengngegna. Idi nabasak ti artikuloyo, nupay kasta, naipalagip kaniak a ti balasangko ket maysa a preemie. (“Maiyanak a Nasapa, Maiyanak a Bassit,” Pebrero 22, 1989) Tinulongannak ti artikuloyo a makabigbig nga amirisek met ti nalikudanna iti pannakilangenko kenkuana.

A. I., Japan

Agyamanak iti kasta unay iti sensitibo ken natimbeng a panangtamingyo. Dagiti artikuloyo pinagluanak. Apresiarek a nangnangruna ti panangbigbigyo a dagitoy babassit a tattao ket pudno a makariknada ket ti naayat a panangaywan ti ina ken ti pamilia dakkel ti maitulongna iti pagimbaganda.

J. J., Estados Unidos

Dagiti Panniki Inapresiarko ti artikuloyo maipapan kadagiti panniki. (Enero 22, 1989) Pudno a diak binasa a dagus dayta ta aggagatel ti kudilko no malagipko ida. Ita kalpasan ti panangbasak iti artikuloyo, maapresiarko idan. Kadagiti ladawan, kasla naamoda, awan ammoda nga an-animal. Makakatawaak pay kadagiti babassit a ruprupada. Pudno a napintas dagiti parsua ni Jehova.

C. S., Estados Unidos

Napukaw iti 20 a Tawtawen Ti kapadasan ni Uncle Jimmy pinaregtanak iti kasta unay. (Disiembre 8, 1988) Addaanak ti leukemia, ngem makagarawak a naimbag. Sagpaminsan malidlidayak ket kunaek ‘asiak pay.’ Ngem itan, pampanunotekon no kasano a ti pammati ni Uncle Jimmy ti nangtarabay kenkuana bayat dagiti narigat ken makasuot a tiempo. Pulos a diak makalipat kenkuana.

J. B., Estados Unidos

Ti walo ti tawenna a balasangko ket natignay iti kapadasan ni Uncle Jimmy ta isut’ nagtugaw ket nagsurat kenkuana. (Kinapudnona, no maipalubos laeng ti kayatna, mabalin a limmugankamin iti kotse ket nagbiahekamin a napan idiay Estados Unidos a bimmisita kenkuana.) Isut’ nagsurat kenkuana: “Pudno a makaparegta ti makabasa a no padasen dagiti tattao ti mangpasardeng kenka nga agserbi ken Jehova, basta itultuloymo. Walo ti tawenko, ket inanamaek nga agbalinak a nabileg iti [Nakristianuan a pammati] a kas kadakayo].”

J. R., Canada

Panagliday Kinuna ti kaeskuelaak: “Nalamiis ti pannakilangen dagiti babbai iti klasek, ket awan ti mayat a makigayyem kaniak.” Iti sumaganad nga aldaw intugotko ti artikulo a “Kasano a Maikkatko ti Panaglidayko?” iti Agosto 8, 1987, a bilang ti Agriingkayo! Diak inanamaen a basaen daytoy a babai dayta. Ngem iti sumaganad nga aldaw imbagana kaniak: “Binasak dayta apaman a nakaawidak. Adda pay kadi dadduma?” Inikkak ti dadduma pay nga “Agimtuod dagiti Agtutubo . . .” nga artikulo a pagarupek a makapainteres kenkuana. Sumagmamano nga aldaw kalpasanna, siraragsak a kinunana: “Nakigayyemak a kas ti nailawlawag iti dayta a magasin!” Kas banagna, agad-adalkamin nga agkadua iti Biblia.

M. S., Japan

Panagrayo iti Kasekso Maysaak a 17-años a babai, ket nabayagen nga im-imtuodek iti bagik, ‘Adda kadi dakes kaniak?’ Di nakapapati ti pannakabang-arko idi nabasak ti artikuloyo nga “Agimtuod dagiti Agtutubo . . . ” maipapan iti dayta a tema. (Abril 8, 1989) Nabang-aranak met a makasarak nga addada dadduma a makapadpadas iti isu met laeng a rikna a kas kaniak, ket dumtengto ti aldaw a napalabaston dayta. Agyamanak iti kasta unay!

M. R., Estados Unidos