Ti Libreria nga Umanay iti Lamisaanyo

PANUNOTENYO laengen ti nalaka a magun-odan a koleksion dagiti literatura a mabalin a makisalisal iti kadadakkelan a libreria iti lubong. Panunotenyo laengen dagiti minilion nga artikulo ken dagiti umasping a bambanag manipud kadagiti rinibo a liblibro, magasin, diario, ken dagiti dadduma pay a sursurat nga umanay iti lamisaanyo.

‘Kasano a maaramid daytoy?’ mabalin a kunayo. Dumteng ti sungbat iti porma dagiti tallo a bambanag iti moderno a teknolohia: maysa a personal a kompiuter, maysa a modem, ken maysa a linea ti telepono. (Ti modem ket maysa nga alikamen a mangiyallatiw ken umawat iti impormasion manipud iti kompiuter babaen iti linea ti telepono.) Dagitoy a bambanag mabalinda a balbaliwan ti lamisaan a pagbalinen a pudno a libreria.

Iti maysa a gagangay a libreria, nupay no nakaan-annad a naurnos dagiti riniwriw a liblibro ken magasin, kasapulan pay laeng ti tiempo ti siaannad a panangsukimat iti katalogo dagitoy a naiprenta a pagbasaan. Ngem kalpasan ti panangsukimat iti maysa a katalogo, awan ti mangipanamnama a ti libro a sapsapulenyo ket adda iti libreria.

Ti Baro a Panawen

Babaen iti kompiuter iti lamisaanyo ken ti maysa a modem, ti maysa a tao mabaelanna nga usaren ti dakdakkel a sistema ti kompiuter a literal a naglaon kadagiti minilmilion a bambanag a naala manipud kadagiti liblibro, magasin, serbisio ti damdamag, ken dagiti dadduma a gubuayan, a naurnos iti “files” ti maysa a kompiuter (a maawagan iti pangibatayan nga impormasion) a mabalin a magun-odan babaen kadagiti simple a bilbilin.

Kas pangarigan, no ti maysa a negosiante kayatna a maammuan ti impormasion iti magasin maipapan iti leveraged buyouts, mabalinna, kalpasan ti panangusarna iti password tapno ag-sign on, a kalikaguman ti impormasion kadagiti “magasin.” Kalpasan ti pannakaikonektarna iti dayta a kita dagiti publikasion, mabalinna nga itultuloy ti panagsapulna babaen ti panangimakiniliana iti: “find leveraged buyouts.” Dagdagus, nasurok a 1.4 milion nga impormasion a naala manipud kadagiti magasin a nasuroken a 16 a tawtawen ti napalabas agingga iti agdama ti masukimat iti uneg laeng ti sumagmamano a segundos!

Tunggal artikulo a naglaon kadagiti sasao a “leveraged buyouts” ti maipalagip, ket maiparang ti nagupgop a bilang dagiti artikulo. Sumaganad, mausar ti bilin a “mangiparang,” ket mangrugi iti nabibiit pay nga artikulo, tunggal paulo ti artikulo, petsa, ken ti autor maiparang, agraman ti ababa a sumario nga addaan iti kanayonan nga impormasion​—iti sumagmamano laeng a segundos. Mano ti magastosna? Dua wenno tallo laeng a doliar​—nalabit.

Babaen itoy a sistema, maysa nga asawa a babai makagun-od kadagiti baro a kapanunotan maipapan iti panagluto babaen ti panangbuya kadagiti putahe a maus-usar kadagiti nadumaduma a pagilian iti aglawlaw ti lubong. Ti panagdekorasion ken dagiti baro nga estilo ti uso ket magun-odan met. Mabalin nga aywanan dagiti kamkameng ti medisina dagiti kabaruan a panagsirarak iti microbiology ket mabalinda met a siputan dagiti kabaruan a regulasion a mangapektar iti industria ti panagaramid iti ag-agas. Dagiti abogado mabalinda a sapulen dagiti kaso nga umarngi kadagidiay agdama a kaso dagiti klienteda ket makasukimatda kadagiti nadumaduma a pamay-an ti pannakaikalintegan ti naituding a kaso idiay korte.

Ti maysa nga estudiante mabalinna a sapulen ti dandani aniaman a tema a maisursuro idiay eskuelaan. Ti inaramid ti negosiante maipapan iti tema a “leveraged buyouts” mabalin nga aramiden ti estudiante babaen iti tema a “black holes.” Makapainteres met daytoy a katulongan iti panagsirarak kadagiti edukador, mannurat, managsirarak, ken dagiti empleado ti korporasion.

Ad-adu a Gastos

Nupay daytoy ket saan unay a nagastos, ti gastos agpannuray kaaduanna iti usaren a file ti kompiuter. Siempre, kas iti aniaman nga industria, agduduma ti gastos kadagiti nadumaduma a kompania.

Kaaduanna, nupay kasta, bayadam laeng ti tiempo a pannakaikonektarmo iti kompiuter ken ti resulta ti panagsukimatmo. Maysa a serbisio ti impormasion ti mangsingir iti $1 (E.U.) iti tunggal minuto iti promedio, ket ti promedio a panagsukimat a mismo ket agpaut iti agarup sangapulo a minutos. Ti tiempo iti aldaw ket maysa met kadagiti sumagmamano a pagdumaan a tumaud no usigen ti bayad. No ti panagsirarak maaramid kalpasan ti gagangay a tiempo ti trabaho, ti bayad mabalin a nababbaba iti 50 porsiento.

Tapno mapalaka pay, gagangay a makatulong ti serbisio ti pannakabagi ti managsukimat wenno dagiti espesialista ti tema. Dagitoy a nalaing a librarian makatulongda iti panangikeddeng iti pamusposan iti panagsirarak sakbay ti pudno a panagsirarak. Daytoy makaekonomia ti tiempo, ket mangikonomia met ti kuarta. Dadduma a kompania ti serbisio nga agserserbi kadagiti propesional iti komunidad, nangnangruna dagiti abogado, mabalin a mangsingirda iti binulan a bayad. Makapainteres, dadduma a babassit a kompania liklikanda ti kanayonan a gastos babaen ti panangbayadda ti tiempo manipud kadagiti daddadakkel a kompania a tumultulong ken addaan ti amin-tiempo a kameng a kankanayon a mangar-aramid iti kasta a panagsukimat.

Ngem ania ngay, no kas kadagiti adu, butngennakayo dagiti kompiuter? Ania ngay no dikay kabaelan ti kompiuter, ti maysa a modem, ken ti kanayonan a linea ti telepono iti pagtaenganyo? Ania ngay no awan ti tiempoyo a mangaramid iti bukodyo a panagsukimat uray pay no kabaelanyo dagitoy a bambanag?

Nanipud nangrugi daytoy a panagserbi, dagiti libreria ken kolehio nagkainteresdan kadakuada. Gaput’ panangsapsapulda iti ad-adu nga impormasion maipapan kadakuada, nasarakanda a makaawis dagitoy. Dagiti organisasion nga agserserbi nakitada dagiti libreria ti siudad ken dagiti eskuelaan a panggun-odan ti publiko kadagiti serbisioda, ket bigbigen dagiti libreria dagiti serbisioda kas makaawis ken nabileg nga alikamen. Kalpasan ti panangsukimat kadagiti posibilidad, napataud ken rimmang-ay ti relasion.

Dagiti organisasion nga agserserbi intukonda dagiti serbisioda nga adda diskuentona kadagitoy nga institusion, isu nga agserbi met kadagiti sukida. Itan dakayo, kas maysa a suki wenno estudiante, makapagsukimatkayon a saan a manggun-od iti bukodyo a kompiuter.

Kas met kadagiti adu nga alikamen iti moderno a teknolohia, kas iti hurno a microwave ken dagiti digital a relo, ti presio iti panagsukimat lumaklakan. Daytoy ti mamagbalin iti libreria nga umanay iti lamisaanyo a magun-odanen dagiti adu a tattao.

[Kahon iti panid 27]

Ti Baro a Librarian

Adda baro a librarian iti ili, ket saan a masapul a panawam ti lamisaanmo tapno sumarungkarka kenkuana. Imbes ketdi, basta gaw-atem laeng ti teleponom. Isut’ maawagan ahente iti impormasion. Ngem dika masarakan dayta iti lokal a libreriayo. Isut’ nakatugaw iti lamisaan iti opisina, ket babaen iti naikeddeng a bayad isut’ mangaramid iti panagsukimat para kadakayo babaen iti naisangsangayan a pannakaikabit iti telepono a nadeskribir kadagitoy a panid.

Ti trabahona ket saan a nalaka. Masapul nga ammona no ania kadagiti nasurok a 3,000 a files iti kompiuter (pangibatayan nga impormasion) ti sukimatenna ken no kasano ti ipapan iti dayta nga ayan ti impormasion ken no ania dagiti sasao nga usaren a maipaay iti panagsukimat.