Makapapatay, Kumarkaro a Peggad

Ti Satanismo, wenno panagdayaw iti Diablo, agraraira, a mangipakita iti panangidaton iti animal ken tao, seksual a panangmolestia, ken dadduma pay a kriminal nga ar-aramid. Ania ti patien dagiti Satanista? Ket apay a ti relihionda adda ti kasta a pangawis? Sumungbat ti “Agriingkayo!” kadagitoy a salsaludsod ken kasta met ibutaktakna ti persona nga adda iti likudan daytoy nakabutbuteng a relihion.

AGKAKAPSUTKAYO aya gapu iti buteng a mangpampanunot iti maysa a nataengan a tao a mangsarsaruno kadagiti dadduma a tattao ket kalpasanna, kas kadagiti mabisbisin a leon, papatayenda ti biktimada, inumenda ti darada, kanenda ti pusoda ken dadduma a paspaset ti bagi​—amin dagitoy ket maigapu iti nagan ti relihion?

Agkintayegkay aya a mangpanunot kadagiti inna ken amma a mangitukon kadagiti annakda met laeng a seksual a molestiaen dagiti dadduma, ket kamaudiananna mapapatay iti maysa nga altar iti imatang dagiti amin a maipaay iti narelihiusuan a pannakapnek?

Mariribukankay kadi a mangpanunot kadagiti lallaki a makidenna kadagiti bangkay nga adda kadagiti puneraria tapno ay-ayuenda ti maysa nga espiritu a parsua a pagarupenda a nadiosan?

Mabibineg kadi ti riknayo a makabasa kadagiti agtutubo nga annak a mangpapatay kadagiti dadakkelda ket kalpasanna pulos a di mariribuk wenno maburibor ti nakemda​—amin daytoy maaramid tapno paragsaken ti Diablo?

Agwingiwingkay kadi gaput’ di panamati kadagidiay mangkali kadagiti tanem, a takawenda dagiti ul-ulo ken ken isina dagiti ramramay kadagiti nagsusuopanda tapno isuotda dagitoy kadagiti relihiuso a seremonia?

Aniat’ pagarupenyo iti maysa a relihion a mangitandudo a dagiti babbai a miembro ti pamiliada nga agtawen iti 13- agingga iti 25-años ket usarenda nga agipasngay kadagiti annak tapno dagiti maladagada ket mausar kadagiti daton a panangibukbok iti dara?

‘Anianto ti sumaganad a panunoten dagiti managaramid iti sine?’ mabalin nga imtuodenyo bayat ti panangbasayo itoy. ‘Uray ta, dayta ket sarsarita laeng,’ mabalin a kunayo. Ay, ngem kasta aya?

Ti kabasbasayo ket pudno! Dayta ket saan laeng nga ar-arapaap ti mannurat. Dagiti pasamak mabalin a napasamaken iti mismo nga iliyo. No saanda pay a napasamak, kumarkaro ti panagamak a mapasamakdanto.

Ti relihion a mangawat kas paset dagiti seremoniada ti panangidaton kadagiti an-animal ken tattao, ti pannakamolestia dagiti annak, ti pannakarames dagiti babbalasitang a birhen, ti seksual a kinalulok, ken dagiti dadduma pay a kakasta nga ar-aramid ket maawagan Satanismo, wenno panagdayaw iti Diablo. Karkarna unay, naiduma unay iti gagangay, dagiti ar-aramid iti Satanismo ta adu nga opisiales ken umili ti agkedked a mamati a dagiti tattao aramidenda dagitoy a bambanag kas paset iti panagdayawda.

Ti kulto iti Satanismo, nga iti sumagmamano laeng a tawen bassit laeng dagiti pasurotna, ket maysan nga agraira, makapapatay a peggad. “Ti Satanismo ket maysa a kulto iti ’80’s,” kuna ti maysa nga opisial iti polis idiay San Francisco. “Ti Satanismo ket paset iti organisado a krimen iti Australia,” kinuna ti maysa a kangrunaan nga eksperto iti krimen iti dayta a pagilian. “Pattapattaek nga adda napeklan a 20,000 a paspasurotna iti isuamin nga Australia, nga aktibo a nairaman iti panagdayaw ken Satanas, seksual a kinaderrep, ti panagidaton kadagiti animal ken nalabit kadagiti pay tattao. Patiek a daytoy a movimiento ket adda met iti likudan dagiti mapukpukaw nga ubbing ket nakarot’ pannakainaigna iti droga ken ti panamagbalin a saan a sagrado kadagiti sementerio.”

Gagangay a maorganisar dagiti kulto a sataniko kadagiti grupo, a tunggal maysa buklen ti 9 agingga iti 13 a miembro​—nalabit ad-adu pay, agpannuray kadagiti kasasaad. Pattapattaen dagiti autoridad nga idiay Estados Unidos, adda ngangngani 10,000 a grupo idi 1946; 48,000 idi 1976; ken 135,000 idi 1985. No mano kadagitoy a gimong ti saan a naranggas ken mangpadpadas nga umadayo kadagidiay naranggas ket saan nga ammo. Sigun iti Marso 7, 1986 a, National Catholic Reporter, “addada 150 nga aktibo a grupo” idiay siudad iti El Paso, Texas, “nga addaan kadagiti 2,000 a satanista nga agduduma ti edadda.” Ket ti Bulletin ti Pennsylvania State Police ipadamagna: “Umad-adu ti Satanismo idiay America. Awan ti lumabas nga aldaw nga awan ti maipadamag a kinaranggas nga inaramid dagiti Satanista.”

Kasta met, ti Satanismo pagtangsitna dagiti miembrona a buklen dagiti tattao manipud kadagiti mabigbigbig a propesion iti lubong​—dodoktor, abogado, negosiante, polis, mamadre, papadi, assawa a babbai, ken dagiti kamkameng iti militaria. Nupay kasta, babaen kadagiti makaparegta a nagbanagan, naallukoy dagiti baro a miembro manipud kadagiti high school ken kadagiti kolehio iti aglawlaw ti lubong. Ngarud, kadagiti adu a luglugar itatta, dagiti grupo dagiti tin-edyer buklenda ti kaaduan kadagiti miembro iti grupo.

Impadamag ti New Zealand Herald nga Agosto 26, 1988: “Dagiti tin-edyer nga agedad laeng iti 14 ket maallukoyda iti lubong ti Satanismo.” Kinuna ti maysa nga opisial a taga Canada: “Dagiti ubbing . . . a makinamin iti Satanismo ket umas-asping ti kinapeggadda ngem dagiti napeklan a (Satanista).”

Iti panangipadamagna iti pannakabalud dagiti adu nga agtutubo iti maysa a pagbaludan iti Canada, kinuna ti maysa nga empleado: “Masdaawanak no kasano a nagadu kadagitoy nga ubbing ti Satanista. Mangaramidda kadagiti tattoo a Sataniko a simbolo kadagiti bagbagida, mangaramidda kadagiti ritual, pudno a patienda ti diablo.”

Maysa a 18-años a babai a balud immanamong a ti Satanismo ket nakalatlatak kadagiti kapatadanna. Inamin ti maysa nga agtutubo a taga Canada nga isut’ kameng ti 400-miembro a Sataniko a kulto a maar-aramid idiay Alberta. “Ditay koma laglag-anen dagiti tin-edyer a managdaydayaw iti diablo,” kinuna ti maysa a taga Canada nga eksperto iti krimen.

Dagiti miembro iti kulto mangaramidda iti nabileg nga inggat’ tungpal-biag a pannakitulag iti grupo, nga iramanna ti nainget a panangikari iti panangilimed. “Dagiti miembro ket saanda a mapalubosan a mangisina iti bagida manipud iti grupo kalpasan ti pannakaisarangda kadagiti nadumaduma a kriminal nga ar-aramid,” kuna ti The National Sheriff. “Ti maysa a miembro a mangsalungasing iti linteg iti kinalimed ikabilna ti biagna ken ti biag ti pamiliana iti nakaro a panagpeggad,” kuna pay ti magasin. “[Dagitoy] naiprogramada a mangilimed,” kinuna ti maysa nga autoridad a taga Chicago. “No saanda a mangilimed, naiprogramada a mangpapatay iti bagbagida.”

Dagiti miembro iti grupo padasenda met ti agtalinaed a saan a mainagnaganan ket di am-ammo dagiti manangipaalagad iti linteg nga opisiales. “Patienda,” kinuna ti maysa a gubuayan, “a dagiti dakes nga ar-aramidda saanto a gunggonaan ni Satanas no isudat’ mailasinda ken idadanes dagiti autoridad.” Gapuna, masansan a maiparna laeng a mailasin ti sataniko a kulto a kas ti managaramid iti krimen. Iti laeng nabiit pay a dadduma a manangipaalagad iti linteg nga ahensia nailasinda dagiti pagilasinan iti lugar a nakaaramidan iti panangpapatay nga adda pannakairaman iti okulto​—kas pangarigan, dagiti panid ti Biblia a naukrad a naipakleb a naiyuged ti krus iti daga nga abayna wenno ti bilang a 666 a naisurat babaen iti dara ti biktima.

Apay, ngarud, a mangusar iti kinaranggas iti nagan ti relihion? Usigenyo ti dadduma a makapakigtot a rason iti sumaganad nga artikulo.

[Kahon iti panid 3]

Narigat a Patien​—Ngem Pudno

Ipadamag ti “Bulletin,” maysa a publikasion iti ummong dagiti mapukpukaw a tattao iti Pennsylvania State Police: “Mabalin a narigat a patien dagiti imbestigador dagiti nakaskasdaaaw ken karkarna a kuento dagiti kriminal nga ar-aramid nga inaramid dagiti tattao a nakakawes iti pagan-anay ti padi a naarkosan kadagiti simbolo ti diablo.”

Kaskasdi, sigun iti “Bulletin:” “Awan ti aldaw a lumabas nga awan ti maipadamag a kinaranggas nga inaramid dagiti satanista. Iti intero a pagilian makaaw-awat dagiti organisasion a mangipapaalagad iti linteg kadagiti damdamag iti panangpapatay, panangpawad, panangbugbog, panagbekkel, panangabuso iti ubing ken ti panangparparti ti animal a nainaig iti sataniko a kulto.”