Agimtuod Dagiti Agtutubo . . .

Masapul Aya nga Agbautisarak?

TI TRESE-años a ni Susana ket addan iti maudi nga addang iti kanser idi timmabuno iti naudi a tinabunuanna a kumbension dagiti Saksi ni Jehova. Dina ammo nga isut’ matay iti uneg ti sangapulo laengen nga aldaw. Nupay kasta, uray pay ti kanser saan a nangpasardeng kenkuana a mangtungpal iti ipatpategna unay a tarigagayna: ti mabautisaran kas maysa a dedikado a Saksi ni Jehova ken agbalin nga adalan ni Jesu-Kristo.

Ni Susana ket maysa laeng kadagiti rinibribo nga agtutubo a Saksi ni Jehova kadagiti nabiit pay a tawtawen a nangipatpateg iti pribilehio a mabautisaran. Ngem nalabit masarakanyo a nakabutbuteng ti panangala iti kasta a natured a takder. Saan a gapu ta dikay patien dagiti naibatay-Biblia a kinapudno a naisuro kadakayo. Mabalin a kanayonkayo a tumabuno kadagiti Nakristianuan a gimgimong ket kanayon a mangiramraman kadagiti kinapudno ti Biblia kadagiti sabsabali. Kaskasdi, no maipapan iti panangidedikar iti biagyo iti Dios, mabalin nga agkedkedkayo. Kasano kapateg, ngarud, ti bautismo? Ken apay a nagadu nga agtutubo ti agkedked a mangaramid iti dayta?

Relihion nga Awanan Dedikasion

Iti Kakristianuan, ti saludsod maipapan iti bautismo ket masansan a sungbatan dagiti nagannak a maipaay kadagiti agtutubo. Dadduma a sekta paregtaenda dagiti nagannak a buniaganda dagiti annakda kas maladaga. Ken uray pay no maitantan ti seremonia ti bautismo agingga iti kinanataengan, dagiti agtutubo ket gagangay a manamnama a sumurot iti relihion dagiti dadakkelda kas maysa a dalan a suroten, saan a pilien.

Makapainteres, nupay kasta, maysa a surbey a Gallup idiay Estados Unidos ti nangipalgak a nupay no “dandani amin a tin-edyer (96 porsiento) ti mamati nga adda maysa a Dios,” 39 porsiento laeng ti masansan nga agkarkararag. Ket 52 porsiento laeng ti agtalek iti organisado a relihion. Ni agtutubo a Diane gagangay a kunaenna: “Mamatiak iti Dios ken amin dayta, ngem ad-adda a patiek ti basta padasen ti agbalin a naimbag a tao ngem ti panagbasa iti tunggal linea iti Biblia.”

Wen, ti relihion ket mabalin nga agbalin a nakapuy a puersa, kinapudnona, no daytat’ impapilit dagiti dadakkelna iti agtutubo. Maysa a panagadal a naaramid iti grupo dagiti agtutubo a Katoliko a delingkuente iyilustrarna pay daytoy. Kagudua kadakuada ti tumabuno iti simbaan. Kaaduan ti makaammo kadagiti kangrunaan a doktrina iti pammatida. Ket dandani 90 porsiento kadakuada ti di umanamong iti panagtakaw. Kaskasdi, nasurok a dua a kakatlo ti agtatakaw! Napaliiw ti libro a The Adolescent: “Maysa a rason mabalin a saan a napasnek ti pannakitulag ti ubing a lalaki iti relihionna. Amin naipasngay a Katoliko; ti immuna a pannakitulagda ket inaramid dagiti dadakkelda. Dida ikutan ti relihionda.”

Ti Bautismo—No Apay a Kasapulan ti Kristiano

Adda, ngarud, naimbag a rason a sapulen ti Biblia dayta kadakayo—saan a kadagiti dadakkelyo—panangaramid iti personal a dedikasion iti Dios.a ‘Naimbag ken nasayaat,’ mabalin a kunayo, ‘ngem no personal ti dedikasion, banag nga adda iti nagbaetan ti Dios ken siak, apay a masapul nga agbautisarak?’

Agsipud ta ti bautismo ramanenna ‘ti pannakaisalakan ti kararuayo.’ (1 Pedro 1:9) Pampanunoten ti Dios ti panangiyegna iti “panangibales kadagidiay saan a mangammo iti Dios ken dagidiay a saan nga agtulnog iti naimbag a damag maipapan ken Apotayo a Jesus. Dagitoy madusadanto iti agnanayon a pannakapukaw.” (2 Tesalonica 1:8, 9) Amin dagiti pakakitaan ipamatmatda a daytoy a pannakadadael umayto iti kaaldawantayo.b

Kaskasdi, ti pagayatan ti Dios ket “amin a kita dagiti tattao maisalakan.” (1 Timoteo 2:4) Tarigagayanna a makalisikayo iti panungpalan daytoy a sistema dagiti bambanag ken agbiag nga agnanayon iti Paraiso a daga! (Apocalipsis 21:3, 4) Ngem kasano a mailasinyo ti bagiyo kas maysa nga agtultulnog iti naimbag a damag? Saan nga umdas ti basta mamati kadagiti kinapudno iti Biblia a naisuro kadakayo, wenno basta sumurotkayo kadagiti dadakkelyo kadagiti Nakristianuan a gimgimong. (Idiligyo ti Santiago 2:19.) Dagidiay agtarigagay a maisalakan masapul nga idedikarda ti bagida iti Dios ken agaramidda iti pagayatanna. Kuna ni apostol Pablo idiay Roma 12:1: “Dawatek ngarud kadakayo, kakabsat, gapu kadagiti kaasi ti Dios nga ipaayyo dagiti bagbagiyo kas daton a sibibiag, nasantuan, [naidedikar,” The New English Bible] makaay-ayo iti Dios, maysa a sagrado a panagserbi a buyogen iti bileg ti panangikalinteganyo.”

Ngem ti dedikasion di makapagtalinaed a pribado a banag. Ta kalpasanna, kasano kapasnek, kasano a dedikado, ti maysa a sekreto nga adalan? (Idiligyo iti Juan 19:38.) Agtalekkayo kadi iti maysa a gayyem nga agtarigagay a mangsalimetmet a sekreto ti panaggayyemyo? Nainsiriban, ngarud, sapulen ti Dios nga amin ‘mangaramid iti publiko a deklarasion a maipaay iti pannakaisalakan.’ (Roma 10:10) Daytoy ket mangrugi iti bautismo. Iti dayta a tiempo, ti maysa mangaramid iti naisao a deklarasion iti pammatina. Ngarud, sumaruno ti bautismo iti danum. (Mateo 28:19, 20) Ania ti pategna, nupay kasta, ti pannakaitaneb iti danum?

Ti bautismo ket saan laeng a maysa a panagdigos; daytat’ simboliko a pannakaitabon. No maitanebka kadagiti dandanum ti bautismo, daytat’ mangipaganetget kenka a nataykan iti dati a kurso ti panagbiagmo. Idi, dagiti personal nga ambisionyo, kalatyo, ken dagiti tarigagayyo ti umun-una iti panagbiagyo. Ngem kinuna ni Jesus a dagiti adalanna masapul a ‘paglikudanda ti bagida.’ (Marcos 8:34) Gapuna no maibangonka, mapalagipanka a sibibiagkan a mangaramid iti pagayatan ti Dios. Daytoy a natured, a panagtignay iti publiko ket paset iti pannakamarkayo a mangilasin kadakayo a maipaay iti pannakaisalakan!—Ezequiel 9:4-6; idiligyo iti 1 Pedro 3:21.

‘Mabutengak di la ket ta Mailaksidak’

No nakapatpateg ti bautismo, apay, ngarud, a dadduma nga agtutubo agtukiadda iti dayta? Inimtuod ti Agriingkayo! dayta a saludsod kadagiti adu a Kristiano nga agtutubo. Kinuna ti maysa nga agtutubo a babai: “Adut’ makarikna nga ad-adu ti wayawayada no saanda a nabautisaran. Mariknada a no addaanda ti parikut, saanda nga agsungsungbat.” Maysa nga agtutubo a managan Robert ti nagkomento iti kastoy babaen ti panagkunana: “Pagarupek adut’ agtutubo nga agkedked nga agpabautisar gaput’ mabutengda a daytat’ maudin nga addang ket saandan a makababawi iti dayta. Mariknada a no agaramidda iti dakes, maikkatda iti kongregasion.”

Pudno a ti maysa saanen a makababawi iti dedikasionna iti Dios. (Idiligyo iti Eclesiastes 5:4.) Ti maysa a tao a nangidedikar iti bagina iti Dios alaenna ti maysa a serioso a responsabilidad. Isut’ maobligar a “magna a maikari ken Jehova agingga iti naan-anay a panangay-ayo kenkuana.” (Colosas 1:10) Ti maysa nga agaramid iti nakaro a panagbasol agpeggad pay iti pannakailaksid manipud iti kongregasion Kristiano.—1 Corinto 5:11-13.

Kaskasdi, ti maysa dina mabalin nga irason nga agingga a ti maysa ket saan a nabautisaran, mabalin ti agaramid ti uray aniaman. Ta “ti makaammo nga agaramid iti nasayaat, ket dina aramiden basol kenkuana.”—nabautisaran man wenno saan a nabautisaran! (Santiago 4:17) Mabalin a ti maysa malapdanna ti pannakailaksidna iti kongregasion, ngem ti maysa dina malisian ti panangukom ni Jehova. “Dikay maallilaw,” impakdaar ni Pablo, “ti Dios saan a marabrabak; ta ti aniaman nga imulanto ti maysa a tao apitennanto met.”—Galacia 6:7, Byington.

Masansan ti panagbuteng a mailaksid pudno nga abbonganna ti nalimed a tarigagay nga agaramid iti dakes. Maysa nga agtutubo a babai a managan Natallie nalawag a napaliiwna: “Napadakkelak iti lubong ni Satanas ket ammok no ania ti kasasaad dayta. Ngem adut’ agtutubo nga agtarigagay a rummuar ket padasenda no ania ti adda sadiay.” Imbes a palubosanyo dagiti dakes a tarigagay a manglapped kadakayo nga agpabautisar—wenno palubosan ida nga agbalin a dakes nga ar-aramid—apay a dikay manggun-od iti tulong, nalabit babaen ti pannakisarita iti maysa a naganak wenno iti maysa a nataengan a Kristiano?—Santiago 1:14, 15.

Pudno, ti itukon ti lubong ni Satanas a wayawaya ket maysa laeng nga arapaap. Kas iti kinuna ni apostol Pedro kadagiti dadduma a naallilaw idi kaaldawanna: “Nga ikarianda ida ti panagwayawaya idinto nga isuda met laeng tagabu ida ti kinarugit. Ta no siasino ti pakaabakan ti maysa a tao isu met ti mangtagabu kenkuana.” (2 Pedro 2:19) Pudno kadi a wayawaya no ti pampanunotyo, kababalinyo, ken moralyo ti tengtenglen dagiti dadduma? Pudno kadi a wayawaya ti agaramid kadagiti ar-aramid a mangiturong iti sakit, pannakaibabain, ken, kamaudiananna, iti ipapatay?—Proverbio 5:8-14.

Maysa nga agtutubo a Hapones a managan Hitoshi ti nangsango kadagidiay a salsaludsod. Isut’ pinadakkel dagiti Kristiano a nagannak ket malagipna: “Bayat ti panagay-ayam dagiti dadduma, masapul a mapanak kadagiti gimong. Tarigagayak ti ad-adu a wayawaya. Pagarupko no adda banag a pakaikapkapisak.” Wen, kas ken salmista nga Asap, isut’ “immapal” kadagiti managdakdakes. (Salmo 73:2, 3) Ngem kalpasan ti napasnek a panangpanunotna iti banag, nagbaliw ti rikna ni Hitoshi. Kunaenna: “Nabigbigko no ania ti pagbanagan ti biagko no awan ti kinapudno—Makitak ti bagik nga agbiag iti 70 wenno 80 a tawen ket kalpasanna matayen. Ngem ni Jehova ipanamnamana ti biag nga agnanayon!” Ngarud ni Hitoshi nangaramid iti dedikasion iti Dios ket nabautisaran.—Idiligyo iti Salmo 73:19-28.

Matignaykay aya a mangaramid met iti kasta? Ti maysa nga agtutubo a managan David natignay. Malagipna: “Ti panagbautisar kas maysa nga agtutubo ket proteksion kaniak. . . . Dadduma a di nabautisaran a tin-edyer iti kongregasion mariknada a siwayawayada manipud iti autoridad dagiti panglakayen ket kas banagna nagaramidda iti dakes a kababalin. Ngem kankanayon a malaglagipko nga indedikarko ti biagko iti Dios.” Nalabit, mabalin a dikay sigurado no pudno a sisasaganakayon a mangala iti daytoy nga addang. Ti impormasion a mangtulong kadakayo ket maiparangto iti masanguanan nga artikulo.

[Dagiti Footnote]

[Dagiti Ladawan iti panid 26]

Ti pangngeddeng nga agserbi iti Dios ket maysa a banag a dakdakayo laeng ti makaaramid. Ti bautismo ilasinna ti maysa kas dedikado nga adalan ni Kristo Jesus