Tinulongannak ti Pammati a Mangsaranget iti Operasion ti Utek

“ADDA tumor iti likudan ti makinkannigid a matam.” Dagitoy a sasao nga insao ni Dr. Stewart, maysa a nuerologo, ti nangipaay kaniak iti rikna a kasla addaan iti katengngaan ti dakes a tagtagainep. Dagiti sumaganad a sasaona ti namagbalin iti tagtagainep a maysa a batibat: “Masapul a maam-ammok ti pamiliam tapno maipanka a dagus iti ospital.”

Nakigtotak. Mabalin a saan a pudno dayta. Nasayaat ti riknak! Kasano a ti nasalun-at a 22-años nga ubing a babai makapataud iti tumor iti utek? Nagrebelde ti panunotko kadagiti sasao ti doktor a mangisiasi kaniak iti dalan nga inkeddengko a maipaay iti biagko. Maysaak a Saksi ni Jehova, ket idi laeng napalabas nga agsapa, nakaawatak iti awag ti telepono a mangaw-awis kaniak nga agtrabaho idiay hedkuarter iti Watchtower Society idiay Brooklyn iti tallo a bulan. Daytat’ ninamnamak ken inkarkararagko. Idi nakapanawakon iti balay iti dayta nga agsapa tapno makipagkita iti optalmologo, mariknak a nakaragragsakak.

Itan, 29 nga oras laeng kamaudiananna, narbek dayta a rikna iti panunotko. Awanen ti panagduadua maipapan iti tumor. Nabusbosko ti 50 minutos a naikulong iti makina nga MRI (Magnetic Resonance Imagery), kas maysa a torpedo iti uneg ti kuarto a pakaipatayabanna, nga agur-uray ti pannakaipatayabna. Kasla maamakak iti pannakaikulong, ket bayat a pumaut ti kaaddak iti uneg, ad-adda a madanaganak. Inkararagko a maaddaanak iti kinakalma, nagday-engak kadagiti kankanta iti Pagarian, ken inulit-ulitko dagiti teksto iti Biblia. Nakagin-awaak. Di nagbayag addaakon iti dalanko a nagsubli iti opisina ti nuerologo nga addaan iti film. Daytoy impakitada ti tumor a kas ti kadakkel ti dakkel a sua, ket impudnonan—masapul a sumrekak a dagus iti ospital. Pimmanaw iti kuarto tapno umawag kadagiti dadakkelko.

Di Aramiden ti Sabali ti Pangngeddengko

“Addan iti dalan dagiti dadakkelmo,” kinunana idi nagsubli. “Dika imbaga kaniak a maysaka a Saksi ni Jehova. Masapul nga agsaritata. Ti operasion pudno a kasapulanna ti panangiyalison iti dara.”

“Awanen ti masapul a pagsaritaan,” kinunak. “Ti pangngeddeng naaramiden. Awan ti dara.”

“Bueno, mapagsasaritaantayo dayta no sumangpet dagiti dadakkelmo.”

“Saan,” kinunak, a nagwingiwingak, “daytat’ di aramiden ti sabali.”

Idi simmangpet dagiti dadakkelko, pinatalgedanda ti takderko maipapan iti dara. Inawat ti neurologo ti pangngeddengko ket kinunana a pampanunotenna ti maysa a doktor a mabalin a mangdayaw iti pangngeddengko. Gapuna naiyam-ammokami iti siruhano ti utek, ni Dr. H. Dale Richardson.

Nagam-ammokami iti opisinana idi rabii ti Huebes, Setiembre 29, 1988, daytoy lalaki nga agbalinto a nakapatpateg ken mararaem a paset iti panagbiagmi iti sumaganad a sumagmamano a bulbulan. Nakisarita ken ni Dr. Stewart ket ammona ti takdermi maipapan iti dara.

“Sugatentayo ti aduan urat a paset,” kinunana. “Ti tumor linikmutna ti sagittal sinus (maysa a kangrunaan nga urat ti dara iti utek), ket ditay ammo ti kalawa ti masaklawna agingga a makitatayo.”

“Uray pay no dumtengen ti pakarigatan,” kinunak, “ket maawatak a mabalin a mapasamak ti kasta, diak pay laeng kayat a mangusarkayo iti dara.” Pinatalgedan ni nanang ken tatangko a ti takderko isu met ti takderda. Nakitami nga isut’ nakalua, ket kamaudiananna naammuanmi nga isut’ addaan iti dua nga annak a lallaki ken maysa nga anak a babai.

“Mabalin a diak umanamong iti pammatiyo,” kinunana, “ngem dayawek ti kalikagumyo. No awan ti dara, adda 70-porsiento a gundawaytayo nga agballigi. Masapul a maawatanyo a mabalin a ditay maikkat amin ti tumor iti damo nga operasion. Gagangayen ti maaddaan iti dua wenno tallo nga operasion ti addaan iti tumor a kas itoy a kadakkel.”

Panagsagana Maipaay iti Operasion

Simrekak iti ospital iti Domingo, Oktubre 2. Ti Lunes ken Martes ket naipaay iti dua a pamay-an a panagsagana maipaay iti operasion, ti umuna isut’ panangsukimat ken kalpasanna tapno pabassiten ti suplay ti dara a mangtartaraon iti tumor. Iti agmalmalem iti Martes immawag dagiti gagayyemko iti telepono, ket iti dayta a rabii sumagmamano kadakuada ti bimmisita. Aminda ammoda no aniat’ mapasamak iti sumaganad nga aldaw, ngem manginanama ken naragsak ti kasasaad.

Napanak naturog a dagus iti dayta a rabii ngem nariingak idi agarup agtengnga ti rabii ket nangrugin a nagdanagak. Saan a nasayaat dayta. Nagpatokarak kadagiti cassette tapes iti sumagmamano nga artikulo ti magasin a Pagwanawanan. Iti alas 5:30 iti agsapa, simrek ti nars ket nasdaaw a nakakita kaniak a nakalma ken addaan panagtalek. Di nagbayag kalpasanna simmangpet ti dua a nasinged a gagayyem, ket simmaruno met kadakuada ni tatang. “Dikay agladladingit,” kinunak, bayat ti panangbisongda kaniak idi agpakadadan.

Idiay baba rinugiandan ti panangisagana kaniak a maipaay iti operasion, panangitudok kadagiti dagum, panangkiskis iti ulok. Bayat ti panagiddak sadiay, nagkararagak ken Jehova: “Agyamanak ti panangtulongmo kaniak a mangpaneknek a saan a kanayon a mangabak ni Satanas. Ammok a mariingak, mabalin nga itatta wenno iti baro a lubong. Pangngaasim ta iti mabiiten.” Bayat ti panangiserrekda kaniak iti kuarto a pagoperaan, nakitak ni Dr. Richardson a mangsuksukimat iti filmko.

“Naimbag a bigatmo, Bethel,” kinunana. “Komusta ti turogmo idi rabii?”

“Nasayaat,” kinunak, “ngem ad-adda a maseknanak iti pannaturogmo.”

Kalpasanna, ni Dr. Ronald Pace, ti anesthesiologo, minaskaraannan ti rupak ket imbagana nga agangesak iti nauneg ket agbilangak nga agpasunod. Nalpasen ti panagur-urayko.

Panagpaimbag Kalpasan ti Operasion

Ti sumaganad nga ammok, malamminak. Inkarkarigatak ti rummuar iti angep a pinataud ti agas. Idi ket alas 10:10 t.r. Iti Mierkoles, agarup 15 nga oras kalpasanna. Adda ni tatang iti intensive care unit, a mangipapaay iti namnama kaniak. Maseknanak no adda pay met laeng amin dagiti kabaelak nga agpanunot. “Subokennak, Tatang,” kinunak, ket rinugianna ti nagsaludsod iti panagtotal: “dua ken dua ket uppat, uppat ken uppat ket walo, . . . Idi nakagtengak iti 512, kinunana, “Waw! Naparpartakka pay ngem siak!” Binisongnak ni nanang iti kasta unay, ket ti kabsatko, ni Jonathan, ti nangipadamag kaniak kadagiti kaudian a damag iti ay-ayam ti baseball.

Impadamag ni Dr. Richardson a naikkatna ti 80 porsiento iti tumor. Kasla nabannogan—awan duadua, kalpasan ti 13 ¹⁄2 nga oras a panangipakatna iti kinalaingna! Naammuak kamaudiananna a kinunana ken tatangko: “Dandani isut’ napukawtayon. Idi nakagtengtayo iti sagittal sinus, kasta unayen ti panagpadarana. Nagasattayo ta napasardengtayo.” Ngem, masapul a maopera manen, mabalin a saan laeng a mammaminsan. “Dadduma a pasiente ti meningioma [ti kita ti tumorko] masapul a maoperada tunggal tallo wenno lima a tawen,” kinunana. “Mabalin a ditayto pulos maikkat amin dayta.”

Dayta a damag ti nangpaliday kaniak! Nakitak a napukaw a nain-inot dagiti namnamak iti biag a Nakristianuan a panagserbi iti amin a tiempo. Rinugiak ti nagsangit, ket din malapdan ti kasta unay a panagsangitko. Ni Tatang inarakupnakami a dua ken Nanang ket nangrugin a nagkararag. Kasla naabbungotanak a naan-anay iti kinakalma. “Ti talna ti Dios a daeganna ti amin a pannnakaawat” ti simmublat. (Filipos 4:7) Nabasak dagiti dadduma a nakarikna itoy a talna iti Dios nga immapay kadakuada ket pampanunotek no kasano ti rikna dayta. Itan ammokon. Diak kayat ti aglasat iti kasta manen a rabii, ngem ti nasursurok manipud iti kapadasan ket kankanayonto nga ipatpategko.

Idi addaak idiay ospital, nakisaritaak kadagiti adu a tattao maipapan iti namnamak iti Pagarian ti Dios ken ti biag nga agnanayon iti paraiso a daga. Nakaipaimaak iti 20 a polieto a Jehovah’s Witnesses and the Question of Blood ken lima a libro a Mabalinyo ti Agbiag nga Agnanayon iti Paraiso a Daga. Idi pimmanawak sadiay, nakaawatak iti nasuroken a 330 a kard ken nakaad-adu nga awag iti telepono, agraman kadagiti sabsabong ken dagiti napnuan-kolor a baloons. Anian ti panangparagsakda kaniak ken panangapresiarko nga ad-adda pay iti sangalubongan a panagkakabsattayo!

Nakaruarak idi Oktubre 16, 1988. Ti maysa a nagpintasan nga aldaw a pangrugian ket kasla ad-adda pay a napintas itan ta nakasubliakon a makaruar iti kainitan ken presko nga angin. Kasla naas-asul ti langit, naberberde ti ruot. Dayta ti namagpanunot kaniak no kasano kapintas ti Paraiso a daga: awan ti gubat, awan ti bisin, awan ti polusion—ken awan ti tumor iti utek! Maysa a nadalusan a daga, kamaudiananna!

Naiyurnos ti Serbisio ti Pompon

Idi Disiembre, nakitak manen ni Dr. Richardson. Dumakdakkel ti tumor. Ti operasion laeng ti mabalin a pangagas ket no madagdagus nasaysayaat. Minatmatak daytoy a maikadua nga operasion a dandani maysa a pisikal a pader, maysa a nagdakkelan a lapped iti dalan nga inkeddengko iti panagbiagko. Pinampanunotko iti kasta unay ti Salmo 119:165: “Dakkel a talna ti maadda kadagiti agayat iti linteg [ti Dios], ket awan kadakuada ti pakaitibkolanda.” Daytoy ti nangpakalma kaniak, ket nagin-inot, imbes a daytat’ maysa a pader, ti umay nga operasion nagbalin laeng a maysa a lapped. Ngem en kaso, nagsuratak iti ingungoten a gayyem idiay hedkuarter ti Watchtower a dinawatko kenkuana nga isut’ mangaywan iti serbisio ti pompon para kaniak no kasapulan dayta. (Kamaudiananna naammuak nga inaramid met ni Tatang daytoy a dawat kenkuana.)

Idi Enero 31, 1989, simrekak manen iti ospital. Iti dadduma a pamay-an nalaklakan, ngem kasla narikrikut. Maikkatda kadi ti nabati iti tumor iti daytoy a tiempo, wenno addanto ad-adu pay nga operasion kalpasanna? Makaliwliwa unay dagiti doktor.

Idi sumrekak, ni Dr. Pace, ti anesthesiologok idi, ti nangsapul kaniak, kinaduaannak iti maysa nga oras bayat ti panangaramidda kadagiti amin a papeles, kalpasanna inawitna ti maletak nga impan iti kuartok. Impanamnama ni Dr. Richardson kaniak: “Agasanka a kas maysa a miembro ti pamiliak, ti pamay-an a kayatko a pannakaagasko.” Mannakipagrikna, saan a panagsapul a panangagas daytoy. Addaanak iti panagtalek bayat ti panangkabilko ti bagik iti manangipateg nga im-imada.

Manen, dimteng dagiti awag ti telepono ken dagiti kard a mangliwliwa kaniak, ket dagiti isu met laeng nga ingungoten a gagayyem a nakasingsinged kaniak ken mannakitinnulong idi damo nga operasion ti adda manen a mangpabileg iti nakemko ken kankanayon a mangpaisem kaniak. Binusbosmi ti rabii a nagsasarita ken nagkakatawa ken nagay-ayam iti dama.

Simmublin ti Biagko iti Dalanna

Iti sumaganad nga agsapa simrek a nasapa ti nars a mangindieksion kaniak. Nakabilbileg dayta, ket kasla awan ti limmabas a tiempo idi addaak manen iti kuarto a pagpaimbagan. Nabibiit ngem idi ti operasion—sangapulo nga oras itatta—ket ti kablaaw a nagun-odak ken ti pamiliak idi nariingak ket makaparagsak unay. Ti nakaisem a Dr. Richardson ti nangibaga kadakami a naikkaten amin a tumor, ket manginanamakamin iti naan-anay a panagimbag. Kamaudiananna, bayat ti panangagasna ken panangsukatna ti benda iti sugatko, pinagkatawanak babaen ti panagkunana: “Bethel, isardengtan ti panagkitkitata.” Anian a panagyamanmi ken ni Jehova ken kadagiti nagsasayaatan a dodoktor!

Nagipaimaak kadagiti ad-adu a libro ken polieto maipapan iti Pagarian ti Dios kadagiti adu a nakasaritak. Maysa kadagiti libro, ti Mabalinyo ti Agbiag nga Agnanayon iti Paraiso a Daga, ti imparangko ken Dr. Richardson. Sinuratak ti awan suratna a panidna:

“Addada sumagmamano laeng nga okasion a kasapulan ti panagyamantayo iti maysa a tao iti panangispalna iti biagtayo. Yantangay awan duadua a masansan a sika ti umawat iti kasta a panagyaman, kayatko a siguraduen a maammuam no kasano kapateg ti amin a naaramidam para iti pamiliak ken siak. Mabigbigko a limitado ti panawen ti panagbasam, ngem no addanto manen okasion a mangagaska kadagiti Saksi ni Jehova iti masanguanan, inanamaek a daytoy a libro mabalin a makagunggonanto kenka iti panangawatmo no apay a kastoy ti pammatik. Buyogen ti adu nga ayat ken panagyaman, Bethel Leibensperger.”

Nakaruarak walo nga aldaw kalpasan ti maikadua nga operasion ket napanak idiay Kingdom Hall iti dayta a rabii. Dua a bulan kalpasanna rinugiakon ti nangmaneho iti kotsek. Intuloyko manen ti amin-tiempo a ministeriok kas maysa kadagiti Saksi ni Jehova. Nabaelak pay ti timmabuno kadagiti historiko a kumbension dagiti Saksi ni Jehova idiay Poland idi Agosto 1989.

Simmublin ti biagko iti dalanna.

[Kahon iti panid 22]

Laglagip ti Maysa nga Ina

Dayta a rabii timmabuno ni Bethel ken ni tatangna iti maysa a panagadal iti Biblia. Malidlidayak; diak maibturan. Diak makaibtur ket nagiddaakon. Iti sumaganad nga agsapa kimmaro. Diak makabangon ket rinugiakon ti nagsangit. Sititibker a kinuna ti asawak: “Masapul a nabilegtayo ken naragsak gapu ken ni Bethel.” Kalpasanna inarakupnak ken nagkararag iti apagbiit, nga ikabilmi ti bagbagimi ken ti masanguananmi a naan-anay iti im-ima ni Jehova ken dawaten ti bileg a makalasat kadagiti umay nga al-aldaw. Kasla danog iti takkiag a namagbalin kaniak a nakapuy a munieka a nagbalin a manangsuportar nga ina.—Judith Leibensperger.

[Kahon iti panid 23]

Laglagip ti Maysa nga Ama

Ti anakko a babai, ni Bethel, ket maysa a regalo ti Dios iti naladawen a panagbiagko. Kasla estoria ti relasionmi. Nanipud idi kinaubing ni Bethel, nagkadkaduakami a nangaramid kadagiti bambanag. Nagrukobkami kadagiti kataltalonan a nangadal kadagiti naarte nga ar-aramid ti Dios bayat ti panangmatmatmi kadagiti atap a sabsabong. Nagaramidkami kadagiti tao-tao a niebe. Nagsaritaanmi dagiti nauuneg a bambanag ken dagiti minamaag a bambanag. Nagparintumengkami a nagkararag iti pannaturog no isut’ nakapajaman a nakatugaw iti nagbaetan ni nanangna ken siak. Arakupenmi dagiti pada a Saksi nga agnanaed kadagiti adayo a dagdaga. Iti pagtaenganmi asikasuenmi dagiti misionero ken kaaduan kadagiti dedikado a babbai ken lallaki nga agserserbi iti Dios a sumursurot iti addang ni Jesu-Kristo. Maymaysa ti pammatimi, ket maymaysa ti arapaapmi iti Paraiso. Dimmakkel a managayat kadagiti tattao ken makasapul iti panagayatda. Ti panagbiagmi kas maysa a pamilia ket simple ken makaay-ayo—agingga ita. Ti ‘panawen ken gasat’ a kunaen ti Eclesiastes a mapagteng dagiti amin ket napagtengmi. Iti maysa nga aldaw daytoy a nagdakkelan a parikut iti medisina inyabbungotna dagiti nasipnget nga anniniwanna. Awan ti pakdaar, ti nakaam-amak nga ipapatay—ti kadadaksan a kabusor ti tao—kellaat a dimteng kadakami—Charles Leibensperger.

[Ladawan iti panid 24]

Ni Bethel ken dagiti dadakkelna kasanguanan la unay ti maikadua nga operasion