No Pagpeggaden ti Uram ti Bunggoy
TI URAM ket naalas a sao kadagiti manangorganisar iti okasion publiko. Tinawen, ti uram mamataud iti rinibribo nga ipapatay ken nakaam-amak a pannakadangran. Nangnangruna a napeggad no aguurnong ti bunggoy iti maysa a naserraan a lugar. Ania ti maaramidan dagiti mangay-aywan iti konsierto, pabuya, kumperensia, ken dadduma pay nga ummong a mangpabassit iti peggad iti uram? Ania ti maaramidan dagidiay adda iti bunggoy a mamagtalinaed a natalged kadagiti bambanag? Ket no talaga a rumsua ti uram, aniat’ maaramidan a mangpaadu iti gundaway iti pannakalasat?
Tapno maaddaan iti impormasion maipapan kadagitoy a bambanag, inimtuod ti Agriingkayo! ti maysa nga opisial iti uram idiay Ireland. Isut’ mangsansanay kadagiti bombero ket addaan adu a kapadasan kadagiti uram.
No mainanama ti bunggoy maipaay iti maysa nga okasion, aniat’ mabalin a maaramidan dagiti mangay-aywan a mamagbalin a natalged kadagiti bambanag?
Ti umuna nga addang isut’ panangsigurado a ti patakder nga usarenyo ket natalged. Masapul nga addaan iti umdas a pagruaran para kadagiti amin nga adda iti patakder tapno makalisida a dagdagus no tumaud ti pakasapulan. Kasta met, tunggal pagruaran masapul a nalawag a mamarkaan ket awan koma dagiti aniaman a makalapped. Amin a pasilio ken agdan masapul nga awanan kadagiti aniaman a makalapped iti amin a tiempo. Dagiti emerhensia a ruangan masapul a malukatan nga agparuar ken nalaka a malukatan.
Ti urnos iti panagtugaw mabalin a mangiparang iti karit kadagiti patakder nga awanan kadagiti pirme a tugaw. Nasken unay ti panangurnos kadagiti tugaw a maitunos iti lokal a pagalagadan iti uram. Siguraduenyo nga amin nga atendant ken usher ammoda nga aramiden ti kasta no adda emerhensia. Dagidiay a makinrebbeng iti kinatalged masapul nga ammoda no sadino ti yan dagiti pagpatay iti apuy ken no kasano ti panangusar kadakuada. Naladawen ti panangbasa ti instruksion kalpasan ti panangrugin ti uram. Laglagipenyo met, a ti umuna unay kalpasan ti panangaramid ti panagibakuit isut’ panangawag iti departamento iti uram.
Adda kadi aniaman a maaramidan dagidiay a timmabuno iti kasta nga okasion a mangpasayaat iti kinatalged?
Kinapudnona adda! Agammangaw dagiti tattao a dagus kadagiti di nasayaat nga aglawlaw. Gapuna ammuenyo a naimbag ti kaaduan a pannakaibalabala ti patakder isu a pakaaramidan ti okasion. Paliiwenyo no sadino ti yan dagiti pagruaran ken dagiti ruangan nga emerhensia. Dikay agam-ammangaw. Taginayonenyo ti disiplina. Umimdeng a naimbag iti aniaman a naipaay a panangiturong ket surotenyo ida. Iti iruruar iti patakder, magna a sipapartak, ngem dikay agtaray wenno agiduron.
Ipaganetgetko ti pannakasapul a rummuar a dagdagus. Kaaduan a tattao dida mabigbig no kasano kapartak ti panagsaknap ti apuy. Tulonganyo dagiti nataengan ken dagiti nakapuy no makitayo a marigatanda. Apaman a nakaruarkayon iti patakder, aglisikayo iti pagruaran tapno dikay serraan dagidiay adda iti likudanyo, ket kalpasan a nakaruarkayon, dikay pulos padpadasen ti sumrek manen iti patakder agingga a naipakaammon a natalged dayta.
Aniat’ balakadyo kadagiti nagannak?
Kadagiti dadakkel a bunggoy dagiti nagannak masapul a kanayon a kaduada dagiti babassit nga annakda wenno siguraduen a dagitoy ti adda iti aywan dagiti natataengan, mapagtalkan a tao. Bayat ti emerhensia ti uram, dagiti maam-amak a nagannak a mangsapsapul kadagiti mapukpukaw nga annakda iti bunggoy ket mabalin a mamataud kadagiti amin a kita iti parikut.
Ti kadi peggad iti apuy limitado laeng iti nakaro a pudot?
Saan. Gagangay ti asuk ken dagiti makasabidong a gas a mangpapatay iti apuy. Uray pay no saan unay a makapapatay, dagiti nakapudpudot a gas rautenda dagiti organo ti pagangsan ken ti sistema nerbio dagiti makalang-ab kadakuada. Daytoy mabalin a pagtignayenna dagiti tattao iti di nainkalintegan a pamay-an. No nakaro ti asuk, apputenyo ti agongyo ken ngiwatyo babaen iti panyo. Daytat’ di makasalaknib kadagiti makasabidong a gas, ngem makatulong dayta a mangsalaknib kadagiti dadakkel a partikulo a mabalin a mamataud iti pannakaulaw.
No napuskol unay ti asuk, padasenyo ti agtalinaed iti sibay ti diding tapno maliklikan ti pannakariro. No dikay makakita wenno makarikna ti maysa a diding, magnakayo nga agturong iti maymaysa a direksion agingga a makasarakkayo iti maysa; kalpasanna surotenyo dayta agingga a makagtengkayo iti maysa a ruangan wenno maysa a tawa. Laglagipenyo, met, nga iti napnot’ asuk a kuarto, ad-adut’ angsen nga angin iti asideg ti daplat, ken ad-adda a makakitakayo sadiay.
Aniat’ maaramidan ti maysa a tao no nauram ti kawesna?
Ti kadadaksan a maaramidanyo isut’ panagtaray. Daytoy rubrobanna laeng ti apuy. Imbes ketdi, agiddakayo iti daga ket agtulid. Daytoy ti mangiyadayo iti gil-ayab iti rupayo ken mainanama a mangiddep iti apuy.
Ti kamaudianan a sao maipaay kadagiti managbasami?
Manginanamaak a dikayto mapadasan a pulos ti uram. Daytat’ nakabutbuteng a kapadasan. Ngem no mapadasanyo, dagitoy dagiti sumagmamano a pagalagadan ti napaneknekan a makatulong. Ket laglagipenyo, ibilang a serioso unay ti peggad iti uram. Dikay laglag-anen dayta wenno ibilang nga ang-angaw. Daytat’ saan nga ang-angaw.
[Blurb iti panid 20]
No agnanaedkay iti maysa nga otel, kankanayon aya a sapulenyo no sadino ti yan ti kaasitgan a pagruaran sakbay ti pannaturogyo iti rabii?