Agimtuod Dagiti Agtutubo . . .

Kasanot’ Panangusarko a Siuumiso iti Makeup?

“KAYATMO kadi ti mangusar iti bassit a makeup?” Masdaaw ni Nina a makangeg ken nanangna nga agsaludsod. Dua a tawen a nasaksakbay, isut’ di napalubosan nga agusar iti makeup. Ngem iti daytoy a naisangsangayan nga okasion, maysa a reception ti kasar nga atenderanda, inkeddeng ni nanangna a tiempon a sursuruen ni Nina ti panangusar ti maysa a babai iti makeup. “Kasla agnerbiosak,” nalagip ni Nina. “Diak ammo ti umiso a panangusar iti dayta. Gapuna nangikabil ni Nanang iti bassit a lipstick ken kolorete iti rupak.”

Nalabit marikna met dagiti daddkkelyo nga umiso ti panangusaryo iti makeup.a No umiso ti pannakausarna—ken mammano—ti makeup papintasenna ti buyayo. No di umiso ti panangusaryo, nupay kasta, maisupadi ti epektona. “Dadduma a babbai ti ag-makeup ket napintas ti buyada,” kuna ti maysa a tin-edyer a lalaki. “Ngem dadduma a babbai nakalablabes ti makeupda, ket paglangaenna ida a nakabutbuteng.”

“No nakaranraniag a kolor ti usarenda, ket pudno a naraniag,” kuna ti maysa a tin-edyer a babai, “basta aglanglangada a pagkakatawaan!” Kasanot’ panangusaryo iti makeup iti pamay-an a mangpapintas—saan a mangpalaad—iti buyayo?

Dagiti Pagalagadan Manipud Sao ti Dios

Saanen a baro dagiti kosmetiko. Nasarakan a nailemmeng kadagiti rebbek ti Israel dagiti malukong wenno pallette a nagserbi iti nakaskasdaaw a moderno a panggep. Dagitoy “nausarda a mangisagana kadagiti kolor ti rupa” dagiti babbai nga Israelita. Sigun iti The Biblical Archaeologist, Pebrero 1955, “kasta unay ti panagusar . . . kadagiti kosmetiko” uray idi panawen ti Biblia.—Ezequiel 23:40.

Itatta, ti industria ti kosmetiko gumasgastos iti dua ribo a milion a doliar iti tinawen iti adbertising idiay laeng Estados Unidos. Babaen ti panangusarda kadagiti nagpipintas a modelo, itandudoda dagiti kaudian a “buya,” manipud iti “gagangay” agingga kadagiti naisangsangayan. Kastoy ti “buyayo,” kunaenda, no gumatangkayo kadagiti adu a kita ti kosmetiko. Nupay kasta, sumagmamano laeng a babbai ti aglanglanga a kas kadagiti modelo iti uso. Ket uray pay no nagballigida, ti baro a “buya” lauston sakbay ti pannakaibus ti umuna a tubo ti lipstick.

Tulongannakay ti Biblia a manglisi iti panangtengngel ti uso. Kunaenna: “Dikay umabuloy itoy a sistema dagiti bambanag, no di ket agbalbaliwkayo gapu iti pannakapabaro ti isipyo, tapno mapaneknekanyo no ania ti nasayaat ken makaay-ayo ken naan-anay a pagayatan ti Dios.” (Roma 12:2) Idi panawen ti Biblia, dadduma a Kristiano a babbai mabalin nga agannayasda nga agkawes kadagiti nagarbo a kawes ken napipintas nga estilo ti panagbubuok a nalatak idi. Ngem namalakad ni apostol Pablo: “Kasta met dagiti babbai agkawesda ti naemma, nga agarkosda a buyogen ti nakman ken saan a kinapalalo, saan a kadagiti buok a sinallapid ken balitok wenno perlas wenno pagan-anay a nangina.”—1 Timoteo 2:9.

Ti balakad ni Pablo dina ikkaten ti panagparangyo a napintas. Dayta basta kaipapananna laeng a ti itsurayo “naemma,” wenno maibagay, saan a pammarang; naemma ken nasirib, saan a karkarna wenno uso. Ti sao a Griego maipaay iti “kinaemma” adda kaipapananna nga addaan ‘panagraem iti opinion dagiti dadduma,’ ket nangnangruna a raemenyo ti opinion dagiti dadakkelyo. Ngarud kitaentayo no kasano a mainaig daytoy iti panagmakeup.

Sakbay ti Panagmakeup

Yantangay ti makeup papintasenna koma ti buyayo, saan a mangpataud iti maskara wenno pananglimo, nainsiriban ti panangaywan iti gagangay a buyayo ken ti intero a salun-atyo. Ti panangsalimetmet iti natimbeng a taraon ken umdas a panaginana ken ti kanayon a panagarsisio ad-adut’ maaramidanna a mangpapintas kadakayo ngem ti aniaman a makeup.

Ti konsultant ti kinapintas a ni Jane Parks-McKay paregtaenna pay dagiti agtutubo a babbai “a mangrugida kadagiti pamunganayan—kayatna a sawen, ti kanayon, epektibo a panangaywan iti kudil. . . . Adu a tattao baybay-anda ti kudilda . . . [ket kalpasanna] abbunganda ti saan a napintas a kudilda kadagiti kosmetiko a manginanama a daytoy ti mangpapintas kadakuada.”

Nasaysayaat ti epekto ti makeup iti nasayaat ti pannakaaywanna a kudil. Ilawlawag ti libro nga A Lifetime of Beauty: “Ti panangdalus iti kudil ket kasla panangisagana iti diding iti baro a pannakapinta: kasanoman ti kapintas ti kolor, di napintas ti pintura no addada rugit ken nagaspang a lugar iti sirok dayta. Ti saan unay a nadalus a kudil nalubed ken agarusiksik.”

Ngarud imbaga ti makeup artist iti Agriingkayo!: “Iti agsapa, ti ubing a babai mabalin a dalusanna ti rupana babaen iti nasayaat a pagdalus iti rupa. Pasarunuanna daytoy ti toner ti rupa ken ti nasayaat a moisturizer.”

Panangusig kadagiti Kasapulanyo

Itan, matmatanyo a naimbag ti rupayo ket usigenyo dagiti gamengyo ken pagkuranganyo. Addaankay aya iti natarnaw a matmata, nabusnagkayo, wenno nakasalsalun-at a padapada ti kolorna a kudil? Ket mabalin a bassit laeng wenno dikay pay kasapulan ti makeup. Iti kasumbangirna, nalabit adut’ lana ti kudilyo (gagangay iti kinatin-edyer) ket nalaka a kamuruen. Wenno mabalin a kayatyo a papintasen ti dadduma a paset ti rupayo (kas iti pingpingyo. Ti natimbeng a panangusar iti makeup mabalin a makatulong.

Idi panawen ti Biblia dadduma a babbai agusarda ti pintura a nangisit tapno agparang a ‘dakkel ti matada.’ (Jeremias 4:30) Itatta, ti eyeshadow, eyeliner pencils, ken dagiti likido nga eyeliner mausarda a kasta met laeng ti epektona. Dagiti foundation cream ken lotion pagpapadaenna ti di parehot’ kolorna a kudil. Ti kolorete papintasenna ti pingpingyo.

Ania ngay no kasapulanyo ti tulong iti panangpili wenno panangusar iti makeup? Addada libro a magun-odan kadagiti libreria ti publiko a makatulong. Ngem mabalin nga agkonsultakayo met ken nanangyo wenno iti natataengan a gayyem. Malagip ti maysa a tin-edyer a babai a managan Tina: “Inkuyognak ni nanang ket dinamagna iti makeup clerk no aniat’ kolor nga usarek.” Dagiti konsultant iti panagpapintas kadagiti mabigbigbig a tiendaan makaipaayda iti balakad no aniat’ maibagay a kolor iti kudilyo ken no kasano ti kasayaatan a panangusar iti makeup. Ngem yantangay ti trabahoda isut’ panaglako iti produkto, agannadkayo a dikay gumatang kadagiti produkto a pudno a dikay kasapulan. Ket agsipud ta naisangsangayan ti kasapulan ti Nakristianuan nga estilo ti panagbiagyo, siguraduenyo a dikay gumatgatang kadagiti kolor a napintas maipaay iti okasion iti rabii ngem saan a maibagay iti eskuelaan wenno kadagiti Nakristianuan nga ar-aramid.

Pamay-an ti Panagmakeup

Agduduma dagiti estilo ti makeup iti nadumaduma a daga. Ngem mabalin a maibaga dagiti sumagmamano a kaaduan a prinsipio:

Usigenyo ti kita ti Kudilyo. Yantangay kaaduan a tin-edyer nalana ti kudilda, mabalin a kayatyo ti nalaokan iti danum, awan lanana a makeup. Dagitoy nakuskusnaw, gapuna agparang a kasla saanka a nakamakeup. Adut’ makarikna a pakaruen ti nalana a makeup ti kamuro.

Basaenyo dagiti Etikita. Idiligyo dagiti ramen ti nalaka a kita ken ti nangina. Nangnangruna a napateg ti panangbasa kadagiti etikita no addaankay iti allergy iti makeup.

Agusar iti Nalawag a Silaw. No nalidem ti silaw, mabalin a napuskol ti maikabilyo a makeup. Yantangay ti maikabil a makeup ket kasla di napintas iti lawag ti init, agikabilkayo ti makeupyo iti asideg ti tawa tapno makitayo ti itsurana iti gagangay a lawag.

Agusar ti Makeup a Sagpaminsan. Ti panaglablabes iti uray naimbag a banag ket makadangran. (Idiligyo iti Proverbio 24:13; 25:27.) No di kayat ti “makeup” ti rupayo nalabes wenno napigsa unay ti kolor nga us-usarenyo. Ti nalabes a makeup paalasenna ti langayo ket mabalin pay a dakes ti pangipagarupanda iti moral a prinsipioyo. (Idiligyo iti Ezequiel 23:36-42.) Gapuna agtalinaedkayo kadagiti makaawis, saan unay a nasudi, a kolor. Sanayenyo ti mangikabil iti makeup tapno ti kolorete di agparang a kasla naiyuged iti rupayo wenno ti eyeshadow paglanglangaennakayo a kasla raccoon.

Dalusanyo a Naan-anay ti Rupayo. Kuna ti libro nga A Lifetime of Beauty: “Dikay matmaturog iti rabii a dikay ikkaten ti makeupyo . . . No mairuamkay a maturog a narugit, adda mulit ken natay a selula iti rupayo dina pabusnagen ti kudilyo.” Kuna pay ti maysa a dermatologo nga “agpeggadkayo iti impeksion ken panaggagatel no dikay dalusan ti makeupyo sakbay a maturogkayo iti tunggal rabii.” Agusarkay iti pangtunaw iti makeup, kas iti cold cream, a pangdalus iti rupayo.

“Ti kinapintas ubbaw,” kuna ti Proverbio 31:30, ket uray pay ti naarte a panangusar iti makeup dina abbungan ti negatibo a disposision wenno ti narabaw a panagpampanunot. Palagipannatay ti Biblia: “Ti pintasyo saan koma a ti arkos iti ruar . . . Ngem, dayta koma ti makin-uneg a kinataoyo, ti di agkupas a pintas ti kinaemma ken kinatalna ti espiritu, isu a dakkel ti pategna iti imatang ti Dios.”—1 Pedro 3:3, 4, New International Version.

[Footnote]

[Kahon iti panid 20]

Dagiti Peggad iti Makeup

Ipadamag ti mangitantandudo a managusar a ni Elaine Brumberg: “Adu a kemikal ken ramen ti kosmetiko ti umagsep iti kudil ket sumrekda iti bagi.” Dadduma a gagangay a nausar a ramen ket masuspetsa a makaited ti kanser.

Dadduma a ramen (gagangay dagiti bangbanglo ken preserbatibo) ti pagaammo a mangpataud ti allergy manipud iti panaggagatel agingga iti panagbaen. Pudno, dadduma a produkto ti “nasuboken maipapan iti allergy.” Ngem no kasano ti epekto ti maysa a produkto kadakayo ket maikeddeng laeng babaen iti kapadasan ken ti naannad a panangsukimat iti etikita.

Ti sabali pay a nasaknap a peggad isu ti pannakamulit iti bakteria. Ti mascara mabalin a pagaponan dagiti mikroorganismo a maiyakar sadiay manipud iti kalub ti mata wenno ramay babaen iti pagikabil iti mascara. Daytoy pataudenna ti impeksion iti mata no ti pagikabil ti mascara mangkur-it iti mata. Ti pannakamulit nangnangruna a parikut kadagiti sample ti tiendaan a sadiay dinosdosena a tattao ti nangideppel kadagiti ramayda. Irekomendar ngarud dagiti dadduma nga eksperto a liklikanyo ti panangusar kadagiti sample ti tiendaan iti rupayo.

[Ladawan iti panid 18]

Mabalin a maisuronakay ni nanangyo iti arte ti panangusar iti makeup