Manipud Managbasatayo
Kissiw Agsuratak a mangiyebkas iti dakkel a pakaseknak iti artikuloyo maipapan iti kissiw. (Hunio 22, 1990) Kunaenna a tapno saan a makagat ni Sandra ti dilana wenno bibigna bayat ti panagkissiw, ti asawana mangikabil iti libro iti ngiwatna! Daytoy maibusor kadagiti amin nga aramid a panangagas iti daytoy a pagilian. Kas maysa met a kissiw a mismo, pudno a diak kayat ti siasinoman a mangaramid iti daytoy kaniak, ta daytoy mabalin nga agbanag iti pannatukkol dagiti ngipen.
L. M., Inglatera
Ti artikulo saan a mangar-aramid kadagiti rekomendasion iti panangagas no di ket isalsalaysayna ti personal a kapadasan. Kaaduan nga autoridad ibalakadda iti publiko a dida mangisingit kadagiti natangken a bambanag wenno dagiti ramay iti ngiwat ti tao nga agkiskissiw wenno ikagumaan a ngangaen dagiti panga. Ti panangaramid iti kasta ad-adut ipaayna a pakadangran ngem pagimbagan, a mangdangran agpadpada iti biktima ken ti tumultulong. Nupay kasta, ti direktor ehekutibo iti New York Epilepsy Institute impanamnamana iti “Agriingkayo!” a ti panangikabil iti maysa a banag a nalukneng bassit (kas iti nakupin a panio) iti sikigan ti nakanganga a ngiwat ti biktima mabalin a lapdanna ti pannakadangran ti ngiwat.—ED.
Panagsikog ti Tin-edyer Masapul a mangipaayak iti komplimento kadakayo maipapan iti nagsayaatan a balakad nga intedyo iti artikuloyo maipapan iti panagsikog ti tin-edyer. (Mayo 8, 1990) Iti edad a 16, impasngayko ti anakko a babai. Nupay no mayat ti amana a mangikasar kaniak, binalakadannak ti pamiliak nga ubingak pay unay. Tinulongannak ti pamiliak agingga a nakiasawaakon kamaudiananna. Adu a tawtawen kalpasanna rinugiak ti nakipagadal iti Biblia kadagiti Saksi ni Jehova. Itatta agserserbin ti anakko a babai kas amin-tiempo a ministro. Maragsakanak unay ta diak inregreg wenno simrek iti nasapa unay a pannakiasawa!
L. B., Estados Unidos
Makaupay a mabasa a nupay no dagiti nangtagibi a nagannak mabalin a makaipaayda a nasaysayaat iti ubing iti namaterialan, ti ayat ken panangipateg ket kasayaatan nga ipaay dagiti nagannak a mismo. Kas nangtagibi nga ina, ti pasetko isut’ nagsayaatan a pribilehio a mangpadakkel iti bassit nga anakmi a lalaki iti daldalan ni Jehova.
C. R., Pederal a Republika ti Alemania
Dispensarendakami no ti artikulo nakapataud iti di pannakaawat. Adu a nagtagibi a nagannak nangaramidda iti nagsayaatan a trabaho a panangipaay kadagiti annakda iti kasapulan a suporta ken ayat. Nupay kasta, ti artikulo salsalaysayenna ti posibilidad a ti ubing a naipatagibi mabalin a saan a mapadakkel kadagiti Nakristianuan a pagalagadan. No kasta ti kaso, ti di naikasar nga ubing a babai dina koma kunaen nga awan ti maipaayna iti anakna. Mabalinna ti mangpadakkel kenkuana iti pagalagadan ti Biblia ket ipakitana kenkuana ti pudno nga ayat—banag a napatpateg ngem kadagiti amin a pagimbagan iti ekonomia.—ED.
Dagiti Garantiya Ti artikuloyo a “Naimbag nga Ammuem ti Garantiyam” (Hunio 8, 1990) naglaon kadagiti naimbag a singasing. Ti sabali pay a banag a pampanunotek ket dadduma a garantiya ket agepekto laeng iti pagilian a nakagatangan ti banag, uray pay no ti managpataud sangalubongan ti serbisiona. Gimmatangak iti nalatak a kamera iti sabali a pagilian, ket idi nakitak nga addaan depekto, dagiti lokal a pannakabagi ti kompania dida kayat a tarimaanen.
J. K., España
Pagyamanan iti pammalagipyo. Basaenyo dagiti amin a garantiyayo a siaannad!—ED.
Lima a Gagangay a Kinaulbod Pagyamanan iti artikuloyo. (Mayo 22, 1990) Dayta pinaregtana ti panagpampanunotko ket nausar unay iti panangtulong kadagiti dadduma a mangilasin iti nasayaat a panagrason ken awan ti mamaayna a panangallilaw.
R. C., Italia
Dagiti Dinosaurs Ti artikulo maipapan kadagiti dinosaurs (Pebrero 8, 1990) ket praktikal unay iti pagilianmi, a sadiay adu a tattao ti mamati iti ebolusion. Nangrugi a nagparang ti Agriingkayo! iti pagilianmi iti damdamo unay iti daytoy a tawen. Basaenmi ti tunggal bilang a buyogen ti panagregget.
F. C., Czechoslovakia