UFO’s—Mabalin Kadi a Mailasinda?

Kasanot’ panangilawlawag dagiti sientista iti UFO’s? Daydi Dr. Donald H. Menzel, nga astronomo ti Harvard, ken ni Philip Klass, dati a senior editor ti Aviation Week, ti dua kadagidiay nangsukimat ti tema dagiti nakitkita a UFO. Patalgedanda a dagiti UFO’s ket aktual nga IFO’s (identified flying objects). Idi maimbestigar, dagiti UFO’s nagbalinda a nailasin a bambanag wenno epekto, kas weather balloons (lobo), dagiti pagipablaak nga eroplano ken helicopters iti rabii, laylayap, wenno sun dogs.a

Inlawlawag ni Philip Klass ti UFO’s kas natural a pasamak wenno kas di umiso a panangbigbig. Kas maysa a pangarigan, sigun kenkuana, dadduma a UFO’s ti nasuspetsa kas maysa a kita ti bola a kimat, wenno plasma. Nupay kasta, nasiglat dagiti kritikona, nga agkuna a dagiti plasma, wenno highly ionized gases, nakaab-ababat’ biagda ket di umdas a mangilawlawag iti problema. Kunana a dadduma a UFO’s a nakitkitan iti radar ket gapuanan dagiti kasasaad ti panniempo. Nupay kasta, sigun kadagiti dadduma nga operetor ti radar, daytoy a panangilawlawag saanna a sungbatan ti kasla intelihente a kababalin a mapalpaliiw no maminsan. Ti kapanunotan ni Klass a ta dagiti tattao a bigla a maisarang iti apagbiit a di ninamnama a pasamak “mabalin a napalalo ti panagkamalida iti panangpadpadasda a panangdeskribir nga apagpag-isu iti nakitada.”

Idiay librona a Pseudoscience and the Paranormal, kuna ni Terence Hines a ti “naannad a panangimbestigar ti nangibunga kadagiti diretsa a natural a panangilawlawag uray kadagiti makapakellaat-awengna a report ti UFO. . . . Pinagbalin a nalawag amin dagitoy a kaso ti ngangngani interamente a di kinamapagtalkan ti report dagiti nakakitkita. Iti ngangngani tunggal kaso, ti report dagiti saksi dakkel panagdudumada manipud iti aktual a pammaregta, ngem iti sumagmamano laeng a kaso a sipapakinakem nga agul-ulbod dagiti saksi. Ti pannakaammoda no maipapan ti ‘rebbeng’ a langa dagiti UFO ti nangimpluensia kadagiti reportda, agraman kadagiti epekto ti ar-arapaap ti panagkitada.”

UFO’s—Iturturong Kadi dagiti Persona Manipud Law-ang?

Ti popular a teoria a ta dagiti UFO ti mabalin a nainaig kadagiti intelihente a persona manipud makinruar a law-ang. Daydi Dr. James McCampbell ket pangulo dagidiay nakagteng itoy a konklusion. Isut’ namakdaar: “Agparang a maysa nga especie dagiti aglaplapusanan kinasariritna a ganggannaet ti pudno nga agbalbalinen nga ad-adda a nasingsinged a paset ti aglawlaw ti dagatayo.” Ni Major Donald E. Keyhoe, “maysa a retirado nga opisial ti Marine Corps a nagbalin nga agsulsulo a mannurat . . . ti immun-una a nangipopular ti UFOs ket kunana a dagita ti extraterrestrial a lugan ti law-ang,” sigun ken Philip Klass, mannurat ti UFOs—The Public Deceived. Impakpakauna met ni Keyhoe ti “dagiti biag manipud law-ang” a teoria ket sana impakdaar: “No ti panggep dagiti ganggannaet isut’ yaakarda iti Daga, daytat’ nangiyusuat ti allon ti buteng ken panagnerbios.”

Ti sabali pay a kapanunotan a nangalat’ interes ti dadduma nga imbestigador a ta dagiti UFO ti mamasirib a biag nga agindeg iti “kaasping nga uniberso.” Sigun itoy a teoria, dagitoy a biag nalabit “kabaelanda nga iturong dagiti elektrikal a sirkito ti isip ti tao.” Babaen itoy nga abilidad, maipato a mabalinda a kontrolen dagiti natauan a gobierno. Kuna ti dadduma a mablin naikonektarda “kadagiti intelihensia [a ramanenna] ti nalalatak a narelihiusuan a movimiento ti lubong, dagiti datdatlag, dagiti anghel, dagiti al-alia, dagiti enkantada, dagiti dakes nga espiritu, ken umas-asping kadagita.”—UFO and The Limits of Science, ni Ronald D. Story.

UFO’s—Mailasintay Aya Ida?

Kas napaliiwtayon, dadduma nga imbestigador medio positiboda a mailasinda amin dagiti UFO kas natural a bambanag wenno pagaammon a karkarna. Dadduma, nupay kasta, idatagda dagiti kabukbukodanda a naisangsangayan a teoria.

Idi a ti Condon Report ken ti tema ti UFO’s ti banag a pakaseknan unay ti publiko a nangipaay ti Agriingkayo! ti repaso iti tema agraman diskusion ti sumagmamano kadagiti ad-adda a nakaskasdaaw a kaskaso.b Nagtengan ti Agriingkayo! ti konklusion a “ti kadakkelan amin a report [ti UFO] ti namunganay kadagiti isu met laeng a kita dagiti bambanag nga innaganan ti Project Blue Book [ti immun-una a panagsirarak ti gobierno]: Dagiti planeta, eroplano, balloon, layap, ar-arapaap.”

Intuloy ti artikulo: “Ti naan-anay a panangimbestigar [a nagupgop iti Condon Report] ti nanglawlawag ti paset a naaramidan dagiti pisikal ken sikolohikal a panangtirtiritir. Inlawlawagna no kasano a dagiti ordinario a bambanag, a makitkita iti tangatang kadagiti tattao a di makailasin kadakuada nalabit iti sidong dagiti karkarna a kasasaad, ti mabalin agkamali iti pannakaawat, a padakkelen iti panagibagabaga, nga ad-adda met a maipadamag nga aglablabes kadagiti diario, ket agtungpal kas dagiti lugan ti law-ang a mangidisso kadagiti babassit a berde a tattao manipud Marte.”

Ti opisial a Condon Report ken dagiti konklusion kas iti ngato, a napakuyogan kadagiti napabassit a report ti UFO, ti kasla namagpatingga iti banag kadagiti adu. Nupay kasta, dua a dekada kalpasanna nakitatayo a kaskasdi dagiti UFO ti mangal-ala manen ti atension ti publiko. Kas nadakawat iti umuna nga artikulotayo, kuna ti maysa a mannurat ti maysa a prominente a pagbasaan a maysa a baro nga elemento ti nainayon. Agbibiagtayo nga addaan nalikudan a “nauneg ken apokaliptiko a panagbutbuteng’ bayat nga umadanitayo iti tawen 2000.

Timmanor pay dagiti ad-adda a pagpangpangaduaan manipud kadagiti nabiit pay a saosao nga iti napalabas ti Estados Unidos ken uray dagiti dadduma a gobierno ti mabalin a di nangikankano wenno nangabbong ti sumagmamano nga ebidensia ti UFO’s. Ti mannurat ti maysa a 1988 a publikasion ti nanggundaway iti Freedom of Information Act, a naipasdek idi 1966 idiay Estados Unidos, agraman dagiti gubuayan iti dadduma a pagilian, a mangurnong ti impormasion a sigun kenkuana “paneknekanna nga awan panagduadua nga adda ti nagdakkelan a panangkalub iti tema a UFO.”—Above Top Secret, ni Timothy Good.

Ni Gary Kinder, iti librona a Light Years, nangpataud ti salsaludsod no ania a pammaneknek ti kasapulan tapno kumbinsiren dagiti agtuturay iti kaadda dagiti UFO. Nasaona ti kuna ti maysa a managpaliiw: “Aniat’ mangbukel ti pammaneknek [kadagiti UFO]? Rebbeng kadi nga agdisso pay ti maysa a UFO idiay River Entrance ti Pentagon, nga asideg iti Joint Chiefs of Staff Offices? Wenno pammanekneken no ti estasion ti radar iti daga madetektaranna ti UFO, mangibaon ti jet a mangsaneb iti dayta, nakita dayta ti piloto ti jet, ket sumerra iti radarna, nga itarayan laeng ti UFO iti naisalsalumina a kinapegges?”

Iti kasumbangirna, inrason ni Propesor Hines a ti 997 panid a dokumento a nairuar, a saklawenna ti panawen manipud 1949 ingganat’ 1979, saanna nga impalgak ti ranta ti panangkalub ti gobierno. Kunana: “Ti panangsukimat iti sekreto a pappapel ti CIA ken dagiti dokumento ti UFO ipalgakna ti maysa nga ahensia a bassit interesna iti pagsidsiddaawan ngem agduadua iti extraterrestrial (ruar ti daga) a teoria. Dagitoy a dokumento . . . suppiatenna met ti masansan maulit-ulit a sasao ti panangkalub ti gobierno iti ‘kinapudno’ maipapan kadagiti UFO.”

Maysa kadagiti kangrunaan a rason iti kinakurang ti pammaneknek a ta awan pay UFO a naipabpabuya iti publiko, ken awan pay met aniaman nga extraterrestrial a persona a nangidatag nga opisial ti bagbagida a makita ti publiko. Mainayon pay, kuna ni Propesor Hines, “awan retrato ti UFO a maikukuenta a pudpudno a mangipakpakita ti aniaman malaksid iti di nalawag nga itsurana wenno aglaplapusanan a lawag.” Masansan, nailasin dagiti eksperto ti UFO kas di umiso a pananginterprete kadagiti pannakakitkita ti Venus wenno ti dadduma a nailangitan a bagi. Kaawatan nga awan solusion ti problema ti UFO makapnek kadagiti amin.

Idi a ti Condon Report addan iti damdamag, maysa a nangipatulod ti artikulo iti Agriingkayo! ti nangsalaysay a pribado ti sumagmamano kadagiti resulta a kadua ti maysa kadagiti naikameng a sientista nga agtartrabaho idiay Boulder, Colorado. Agparang a ti kapanunotan ti sientista a ta kadagiti di nailawlawag a kaso, dagiti kapadasan ti UFO ramanenna ti maysa a kita dagiti “mental a pannakaawat.” Gapuna, nupay nagadu kadagiti nakitkita a UFO ti nailawlawag a sientipiko kas pisikal a bambanag wenno di umiso a pannakailasin, mabalin a dadduma ket ramanenna dagiti mental wenno sikolohikal a kapkapadasan wenno pannakaawat.

Adda Kadi Impluensia ti Okulto?

No repasuen dagiti mental wenno sikolohikal a kapadasan ti dadduma a nangipadpadamag ti pannakaidennada kadagiti UFO, posible met a mabigbig ti panagasping kadagiti espiritistiko wenno dadduma pay a di mailawlawag ti siensia a paspasamak. Maysa a pangarigan iti daytoy isut’ pammaneknek ni John H. Andrews iti librona a The Extraterrestrials and Their Reality. Iti panagyamanna iti tulong iti panangaramidna ti libro, kunana: “Dakkel a panangipateg ti mapan met kadagiti uppat a tao ti law-ang [“dagiti ET iti pisikal a natauan a bagbagi a nakilalaok kadatayo a di nadnadlaw”] a nangibagbaga kadagiti estoriada kaniak ken tinarigagayanda a di mainagnaganan, kadagiti nagadu a medium ken kalasugan a nangbadang kaniak kadagiti adu nga eksperimentok, kadagiti extraterrestrials gapu kadagiti adu a makaited impormasion a mensaheda.” Maipapan kadagitoy a “tao ti law-ang,” kunana: “Medio intelihenteda amin; aminda ti kalasugan kadagiti di makita a persona.”—Idiligyo ti 1 Samuel 28:7, 8; Efeso 6:12.

Kuna pay met ni Andrews nga isut’ nakaawat kadagiti mensahe manipud ruar ti daga (extraterrestrials). Inlistana ti sumagmamano kadagitoy kas: “Awan dayta banag kas ni patay. . . . Awan dayta banag kas ti naimbag wenno dakes. [Idiligyo ti Genesis 3:3, 4.] . . . Ti panamarsua, ebolusion, ken reinkarnasion ti maikari nga ar-aramid nga agtigtignay iti Uniberso. . . . Dakami [dagiti ET] dikam immay ditoy a mangkontrol wenno agturay kadakayo, no di ket mangiwanwan kadakayo. . . . Ti Daga dandanin aglasat iti nakaro, makadidigra a panagbalbaliw. Inton malpasen dagitoy a panagbalbaliw, basbassit pay ngem 1/1,000 iti agdama a populasion ti sibibiagto!”

Sasawen met ti Biblia dagiti extraterrestrials, dagiti espiritu a parparsua, kas kadagiti natulnog nga anghel ken dagiti nasukir, dagiti immalsa nga anghel a nagbalin a dagiti sairo. Iti historia ti Biblia, iti namin-adu nga okasion ti Dios nagusar kadagiti matalek nga anghel a makikomunikar kadagiti tattao. (Genesis 22:9-18; Isaias 6:1-7) Kaskasdi nga us-usaren ni Satanas dagiti sairo a paspasurotna a mangallilaw ti sangatauan kadagiti isuamin a kita ti pilosopia, dagiti uso, memmensahe, komunikasion, ken dagiti kulto a mangiyadayo manipud mensahe a ti Pagarian ti Dios, ti nailangitan a gobiernona, dandanin agturay iti naipasubli a daga.—Idiligyo ti Lucas 4:33, 34; Santiago 2:19; Apocalipsis 12:9; 21:1-4.

Ti Kristiano nga apostol Pablo nangted ti rumbeng a pakdaar iti impluensia ti demonio kadagiti maudi nga al-aldaw idi a nagsurat: “Ngem ti naipaltiing a sao nalawag ti panagkunana a kadagiti maud-udi nga aldaw dagiti dadduma suminadanto iti pammati, nga ipangagda dagiti mangallilaw a naipaltiing a sasao ken dagiti sursuro dagiti demonio.”—1 Timoteo 4:1.

Ti pananglaglagip no kasano ti kaunegtayon kadagitoy apokaliptiko nga al-aldaw, saanen a maikanatad kadagiti Kristiano ti panangbusbos ti napateg a tiempoda a mangim-imbestigar kadagiti nauneg a bambanag iti daytoy a kita. Imbes ketdi, maseknantay ketdi kadagiti mas napatpateg a karit itatta, nga awan sabali, ti panagtulnog iti bilin ti extraterrestrial a nasantuan nga anghel a nangiwaragawag: “Agbutengkay iti Dios ket isu dayawenyo, ta dimteng ti oras ti panangukomna, ket agdaydayawkayo iti Daydiay nangaramid iti langit ken iti daga ken iti baybay ken kadagiti ubbog dagiti dandanum.”—Apocalipsis 14:6, 7.

[Dagiti Footnote]

[Kahon iti panid 10]

UFO’s—Ti Sientipiko a Panangmatmat

“Ti astronomia ken UFOs agnaigda: no ad-adut’ ammo ti tao maipapan ti astronomia, adayo a basbassit met dagiti makitkita a UFO.”—Astronomy, Disiembre 1988.

“Ti Venus ti kararaniagan kadagiti amin a planeta iti tangatang ti rabii ken isut’ responsable kadagiti adu a report ti UFO ngem iti aniaman a sabali pay a maymaysa a banag. . . .

“Dagiti moderno a radar ti eropuerto automatiko itan a mailasinda ti amin a lugan ti tangatang iti deppaarda . . . Bayat nga agbalbalin a nalalaing dagiti radar a mangilasin nga apagpag-isu ti lugan ti tangatang ken arisiten dagiti gubuayan ti biddut, ti bilang dagiti report ti radar maipapan ti UFO bimmababa iti ngangngani zero. Siempre, no pudno koma dagiti UFOs, namnamaen ti maysa . . . a ti moderno a radar ti mangparang-ay ti bilang dagiti makitkita a UFOs iti radar. . . .

“Iti ngangngani uppatapulo a tawen a panagimbestigar, awan uray maysa nga autentiko a retrato ti UFO a naala ket awan uray maysa a piesa ti pudpudno a perdi wenno dadduma a pisikal nga ebidensia a nasarsarakan. Dagiti nakaskasdaaw-awengna a pannakakita a maipadpadamag a tinawentawen ket, tinawentawen, no masukimatda a naimbag, agpukawda met iti alingasaw ti di umiso a pannakakita, di umiso a pannakailasin, ken parparbo.”—Pseudoscience and the Paranormal, ni Terence Hines.

“Kaaduan kadagiti gulo ti agtataud manipud ti kinapudno a ti tangatang mangiparparang ti ngangngani awan inggana a nadumaduma a karkarna a buya ken bambanag, a mammano laeng ti mabalin a makaenkuentro ti maysa a tao iti panagbiagna. Ket inton daytoy ti mapasamak, mabalin nga isut’ maallilaw a mangipato nga isut’ nakakita ti maysa a naisangsangayan unay—imbes a maysa laeng a di pamiliar. . . .

“Mammano a ti aniaman a tema addaan kasta unay a kinasuitik, kinabagtit, kredulidad, narelihiusuan a panagmauyong, kinakurang, ken kaaduan kadagiti dadduma pay a di makaay-ayo a natauan a kababalin.”—The Promise of Space, ni Arthur C. Clarke.

“Kayatko koma a makita dagitoy nauuneg a sasao a maikitikit iti ruangan amin dagiti templo ti siensia: ‘Ti kadadakkelan a pannakadadael ti isip isut’ panamati iti maysa a banag gapu ta daytat’ tarigagayan ti maysa a kasta koma.’”—Louis Pasteur, maika-19 siglo a sientista a Pranses.

[Ladawan iti panid 8]

Depende iti anggulo ti panagkita, dagiti balloon ti panagipablaakda no rabii, dagiti eroplano, ken dagiti helicopters mabalin mapagkamalian kas UFO’s

[Credit Line]

Nite Sign, Inc.