Manipud Managbasatayo

Dagiti Nakaikamangan Ti Pebrero 22, 1990, a bilang maipapan kadagiti nakaikamangan ket maapresiar unay. Dua a lawas a napalabasen napanko binisita dagiti nakaikamangak iti intero a maysa a lawas. Bayat ti ibibisitak, pinampanunotko ti artikulo ket inyaplikarko dayta iti tunggal kasasaad a naipasango kaniak. Maragragsakanak, ket idi pumanawakon, nagiinnungngokami ken nagbibinnisongkami. In-inanamaek ti ad-adu pay nga ibibisita kadakuada, ngem salimetmetakto daytoy a magasin iti kasta unay en kaso kasapulak ti maparegta babaen iti dayta.

A. G., Estados Unidos

Makeup Ti bennegyo nga “Agimtuod dagiti Agtutubo . . . ” ket makapabileg. Ngem iti artikuloyo maipapan iti makeup (Hunio 22, 1990), inusaryo ti teksto ti Biblia idiay Ezequiel 23:40, isu a nalawag a mangtuktukoy iti panangusar ti maysa a balangkantis iti eye shadow. Saan kadi a biddut ti panangikalinteganyo iti panangusar kadagiti kosmetiko?

T. H. H., Netherlands

Daytoy a teksto basta patalgedanna laeng ti kunaen dagiti arkeologo a ti makeup ket inusar idi dagiti babbai nga Israelita. Pudno, daytoy a bersikulo saritaenna ti maysa a balangkantis a ‘nangdigos iti bagina, pinintaanna dagiti matana, ken inadornuanna ti bagina kadagiti arkos.’ Nalawag, nupay kasta, daytoy basta iparangarangna laeng ti kinapudno a dadduma nga Israelita a babbai nagusarda kadagiti kosmetiko.—ED.

Panagsirarak Babaen iti Animal Awatenmi ti kinapudno iti komento dagiti Saksi ni Jehova maipapan iti tema a panagsirarak babaen iti animal (Agriingkayo! Hulio 8, 1990). Ngem pudno a mariknami a nasken a korehiren ti sasao a: “Ti sangalubongan a pagannayasan isut’ panangsuportar kadagiti agresibo unay a movimiento ti kalintegan dagiti animal.” Minoridad laeng dagiti militante ket aglatakda laeng babaen iti panangsaklaw ti pagiwarnak.

Imbagami a “dadduma”—saan nga amin—dagiti aktibista iti kalintegan dagiti animal “ket situtulokda a mangusar iti kinaranggas.” Ti sasao a masupsuppiat ket insao ti maysa a kangrunaan nga aktibista iti animal a taga Canada. Basta impadamagmi laeng dayta.—ED.

Pannakaadikto iti Crack Maysaak nga adikto iti crack iti lima a tawen. Pinadaskon iti adu a daras nga isardeng ti panagusar itoy a nakaam-amak a droga. Addaanak iti $150- agingga iti $200-nga-inaldaw a bisio! Ngem pagyamanan laengen ken Jehova a Dios, ta saanakon a maysa nga adikto iti crack! Babaen iti napasnek a panagadalko iti Saona, a kankanayon nga agkarkararag, ken makilanglangen kadagiti pudno a Kristiano, pinagbalinkon a napalabas a banag ti crack. Ti sekreto iti panangisardengko iti crack: Masapul nga isardengmo ti makilangen kadagiti tattao nga agus-usar itoy a droga!—Kitaenyo ti Agriingkayo!, Hulio 22, 1990.

[Nakalikaguman a mailimed dagiti initial], Estados Unidos

Nalaklaka a Panagpasngay Maipapan iti paset a panagpasngay iti “Panangmatmat iti Lubong” (Disiembre 8, 1989), palubosandak a mangibaga a kadagiti aw-away ken iti makin-amianan a katurturodan iti Pakistan, ti ugali a nakamasngaad nga agpasngay ket naus-usaren iti nakabaybayagen a tiempo. Awan duadua awananda kadagiti moderno a tugaw a pagpasngayan, ngem pudno a mangusarda iti tugaw a naaramid iti ladrilio ken bato.

F. U. B., Pakistan

CAT Scans Pagyamanan iti artikuloyo a “Maysa a Kompiuter a Makakita iti Unegyo.” (Hulio 22, 1990) Nakaeskediolak maipaay iti CAT scan sumagmamano a tawenen a napalabas, ngem nailawlawag dayta kaniak iti pamay-an a nangbuteng kaniak, ket nagkedkedak a mangala iti dayta. Ti artikulo tinulongannak a mangtingiting kadagiti pagimbagan ken pagdaksanna, ket itan nangaramidakon iti pannakipagkita iti doktorko.

A. S., Estados Unidos

Jaguars Tinagiragsakko unay ti artikulo a “Ti Naatap a Pusa ti Kabakiran.” (Agosto 22, 1990) Saanko a pulos a nabigbig no kasano a nakaskasdaaw unay dagiti jaguar. Nakapimpintasda nga animal ket pudno a mangipaayda iti dayag iti Dios.

L. F., Estados Unidos