“Siak ti Pannakamatana ket Isut’ Pannakasakak”

DA José Luis Escobar ken Artemio Duran agserserbida a kas panglakayen iti maysa a Kristiano a Kongregasion dagiti Saksi ni Jehova sadi Mexico. Ni José Luis ket bulsek, ket ni Artemio di makapagna.

Idi agedad ti 16, ni José Luis pagay-ayatna ti boksing. Iti maysa nga aldaw naimbitaran a mangisuno iti maysa a propesional a boksingero iti maysa a laban. Iti maikapat a rikos, nakarot’ pannakadangranen ti tunggal maysa ta napasardeng ti laban. Nupay naipaay ti panagballigi ken José Luis, ti pannakadangranna nagresulta iti panagbulsekna.

Nagturong ni José Luis iti tinunggal doktor ken bimmisita met kadagiti espiritista. Ngem awan ti makatulong kenkuana. Gapu ta napukawen ti namnamana, sumagmamano a daras a pinadasna ti agbekkel. Kamaudiananna isut’ nakasarita dagiti Saksi ni Jehova, naadalnat’ kinapudno ti Biblia, ket idi agangay indedikarnan ti biagna nga agserbi ken Jehova. Isut’ nabautisaran idi Agosto 1974.

Ni Artemio, iti kasumbangirna, ket serioso ti pannakaaksidentena idi 1981. Napasamak daytoy idi isut’ ilegal nga agbibiag ken agtartrabaho sadi Estados Unidos. Isut’ sinarungkaran dagiti nagduduma a pannakabagi dagiti relihiuso a grupo ket naibaga kenkuana nga isut’ dusdusaen ti Dios gaput’ dakes a kabibiagna. Kamaudiananna nakasarita met dagiti Saksi ni Jehova ni Artemio. Nagadal iti Biblia, nangaramid kadagiti nasken a panagbalbaliw iti biagna, ket nabautisaran idi Mayo 1984.

Itan dagitoy dua a lallaki agkaduadan iti isu met laeng a kongregasion Kristiano. Regular nga agkuykyogda iti binalaybalay a ministerio, agkuyogda nga agsarungkar kadagiti interesado a tattao, ken bumisbisita kadagiti miembro ti kongregasion tapno pabilgenda ida iti naespirituan. Ni José Luis ti mangiduron iti wheelchair bayat a ni Artemio ti mangiturong kenkuana iti papananda. Tukoyen ni Artemio ida kas maymaysa a bagi: “Siak ti pannakamatana ket isut’ pannakasakak.”