Bato nga Apug—Gagangay Ngem Napateg
Babaen ti koresponsal ti Agriingkayo! idiay Belgium
NAPATEG A BATBATO! Ti termino tignayenna ti pannakakita kadagiti adu a kolor: diamante, esmeralda, rubi, sapiro, bato nga apug. Bato nga apug? Wen, ti nanumo a bato nga apug ket maysa a napateg a kita ti bato. Idiay Belgium, kas kadagiti adu a luglugar, makasarakkayo kadagiti bato nga apug iti dandani isuamin a lugar. Daytat’ mausar a pagibangon kadagiti simple a pagtaengan ken kasta met kadagiti pagsidsiddaawan a monumento. Maigiddato iti dayta, mabalin met nga aramiden a kas graba. Ngem ania daytoy a banag a masarakan kadagiti adu a luglugar? Ti bato nga apug ket maysa a bato nga addaan apug a naglaon iti nasurok a 50 porsiento a calcium carbonate. Rimsua dayta gapu kadagiti nadumaduma a pamay-an, a nangpataud kadagti nadumaduma a kita ti bato nga apug. Dagiti animal iti taaw kas kadagiti kappo, biruruko, ken dagiti corales mangalada iti calcium carbonate manipud iti danum ket usarenda dayta a mangaramid kadagiti ukis ken tulangda. Dagiti tultulangda mabatida no matay dagiti animal. Gapuna kuna ti The World Book Encyclopedia: “Kaaduan a suson ti bato nga apug kadagiti amin a paspaset iti daga ket sigud a kappo wenno mekmek ti corales ken pitak.” Maporma ti bato nga apug no mailasin ti calcium carbonate manipud iti solusion no maatianan ti danum a nakarunawanna. Dadduma ti maisina a direkta iti danum, a maurnongda iti aglawlaw dagiti ubbog agraman dagiti danaw ken taaw. Dagiti panagbalbaliw iti daga ti makagapu a timpuar dagiti daga a natinep idi iti danum. (Idiligyo ti Salmo 104:8.) Ngarud adu ti bato nga apug. Sigun iti maysa a pattapatta, dayta buklenna ti 20 porsiento dagiti amin a batbato iti tukok. Ngem ti bato nga apug nalawag nga adut’ usarna.
Ti tisa, a buklen dagiti mikroskopiko a tultulang dagiti babassit nga animal iti taaw, ket bato nga apug. Ngem kasta met ti marmol. Maporma ti marmol no dagiti naipempen a bato nga apug ket mapudotan ken mapandagan iti nakawatwatiwat a tiempo. Adu a nalatak a dadakkel a rukib, kas ti Carlsbad Caverns idiay Estados Unidos, addaanda kadagiti napipintas nga stalactites ken stalagmites wenno dagiti timmangken nga apug nga agbitbitin iti atep ken timmadol iti daplat ti rukib. Dagitoy mapormada babaen ti panagtedted ti danum nga addaan calcium carbonate.
Ti Karit ti Panangala iti Dayta
Nupay kasta, saan a nalaka a gun-oden ti bato nga apug. Dagiti pagtibagan ti bato, maparnuayda babaen ti panangikkat iti daga a nanggabor iti nakaipempenan ti bato nga apug. Babaen iti adu a bannog, ken iti di nakapapati a kinaandur, dagiti managtibag idi immuna a tiempo kalienda dagiti akikid a kanal tapno maitag-ayda dagiti pedaso ti bato, nga iwalinda dagiti kadadakkelan a bato. Sumaruno ti karirigatan a trabaho a panangburak kadagitoy a bato babaen iti maso.
Itatta, dagiti makina ti mangaramid kadagitoy a makabannog a trabaho. Uray pay no napeggad ti trabaho idiay pagtibagan, dakkel unay ti pakasapulan kadagiti bato ta nasursuron ti tao ti mangtaming iti risgo iti panangminas iti dayta. Dagiti nasasayaat a bato nga apug masansan a maala babaen ti panangusar kadagiti dinamita a nabannayat a bumtak. Ti nasaysayaat pay, mabalin a ragadien dayta.
Panagibangon Babaen iti Bato nga Apug
Ti bato nga apug ket nasayaat a pagibangon. Ngamin pasayaaten dayta ti pananglapped iti iruruar ti pudot wenno koriente iti maysa a patakder. Ti maysa a 30-centimetro a pader a naaramid iti bato nga apug pagtalinaedenna a padapada ti temperatura iti uneg uray pay no ti temperatura iti ruar agbaliw iti 20 degrees Celcius. Ti pannakasedsed ti bato a pader ti mamagtalinaed iti temperatura ti kuarto a kalalainganna iti makin-uneg a sikiganna.
Nasayaat met a manglapped iti uni ti bato nga apug. Mainayon pay, no siuumiso a mataming ti bato nga apug, agbalin pay dayta a di agagsep iti danum. Ti carbon dioxide iti tudo mangporma iti mangsalaknib a suson a manglapped iti danum iti rabawna.
Kasta met, napintas ti bato nga apug. Ti nalatak nga Arc de Triomphe idiay Paris ket maysa laeng a pangarigan iti nalatak a patakder a naibangon iti bato nga apug. Nakadkadlaw met dagiti dadakkel a piramid iti Egipto, a naibangon kadagiti pedaso ti bato nga apug nga agdagsen ti agingga iti 16 a tonelada! Ti marmol ket maysa a kita iti bato nga apug a mabalin a pasilengen. Ti napaut a kinasilengna ken kinapintasna ti namagbalin iti marmol a pili dagiti eskultor a kas ken ni Michelangelo.
Bato nga Apug ken ti Apug
Siempre, saan nga amin a bato nga apug mausar iti kasta a naisangsangayan a pakausaran. Adut’ maikabil kadagiti paggilingan, ti umuna a tukad iti panangaramid kadagiti nagduduma a napapateg a produkto. Idi tiempo ti Biblia, kas pangarigan, naammuan ti tao ti mangpataud iti apug (calcium oxide) babaen ti panangpadapo iti bato nga apug. Idi, maaramid daytoy babaen ti pananguram iti dayta kadagiti kasla sarangusong wenno kakasla tubo a pagapugan. Ti apug ti kangrunaan a ramen ti palitada ket nausar idi kadaanan a tiempo a pagpalitada kadagiti diding ken pangpapudaw kadagiti diding ken dagiti tanem.—Deuteronomio 27:4; Ezequiel 13:10; Mateo 23:27; Aramid 23:3.
Adu pay laeng dagiti napapateg a pakausaran ti apug. Iti dadduma a pagilian mabalin nga inumen ti danum agsipud ta nausar ti apug a mangdalus iti dayta. Ti danum a naikkan iti apug, nga addaan calcium carbonate wenno calcium sulfate, ket salaknib iti panagsika. Ti apug mausar met a mangtimbeng iti panagalsem ti daga. Pasayaatenna ti panagsagepsep ti danum ken panagpasngaw ti angin iti daga, ngarud makatulong a mangpataud kadagiti nasustansia a taraon. Ken mausar pay ti apug iti panagaramid iti asukar.
Pudno unay, nakaad-adu ti mailista a pakausaran iti bato nga apug ken dagiti produktona. Nupay kasta, pagaammotayo a ti pananggun-od kadagiti bato nga apug pataudenna dagiti parikut. Dagiti nauuneg a pinagtibagan mangibatida kadagiti dadakkel nga abut a masansan a mabaybay-an ket agbalinda a naalas a buya. Dagiti bario iti aglawlaw ti pagtibagan madigosda kadagiti puraw a tapuk, ket dagiti tao iti asideg maringgoranda iti ungor ken pannakayegyeg gapu iti panagbettak dagiti dinamita.
Nupay kasta, no amirisenyo amin dagiti pakausaranna, ti bato nga apug ket pudno a napateg a bato. Pudno, saan a diamante dayta. Ngem, adda kadi patakder wenno monumento a naaramid iti diamante?