Manipud Managbasatayo
Arthritis Kalkalpasko pay laeng a binasa ti artikulo a “Panangibtur iti Arthritis.” (Hunio 8, 1992) Nagsagabaak iti nakaro nga arthritis iti agarup 20 a tawtawen. Ngem agsipud ta awan ti naan-anay nga agasna, ken maamakak kadagiti dakes nga epekto dagiti agas, awan inaramidko a panangagas iti dayta. Itatta, kankanayonen a mariknak ti ut-ot, ket diak makaturog iti adu a rabii. Uray pay kasta, nabaelak ti nangbusbos iti 60 nga oras iti binulan iti Nakristianuan a panagebanghelio kas auxiliary payunir. Nupay kasta, bayat a kumarkaro ti sakitko ket umir-irteng dagiti susuopko, surotekto dagiti singasingyo nga agarsisio agingga iti kabaelak.
T. N., Japan
Nakalasat iti Kampo a Pagbaludan Kabasbasak ti artikulo a “Naiyadayo iti Pamiliak, Inkarik nga Agserbiak iti Dios.” (Pebrero 22, 1992) Nupay no naragsakanak a nakabasa iti naragsak a nagbanagan ni Gerd Fechner, masapul kadi nga ammuentayo pay ti kinaranggas ti tao iti padana a tao iti kasta pamay-an?
C. T., Estados Unidos
Maapresiartayo a dadduma kadagiti kapadasan a naisalaysay maipapan iti biag ni Gerd Fechner kadagiti kampo a pagbaludan ti Russia ket makariribuk kadagiti dadduma a managbasa. Ngarud naikagumaan ti panangliklik iti kasta unay a panangiladawan iti material. Nupay kasta, nariknami a nasken a maipasdek ti kinapudno a nangtignay ken ni Gerd Fechner a mangbiruk iti Dios. Dagiti naulpit a kapadasan ni Fechner ti ad-adda pay a nangipaganetget iti kinapudno nga “inturayan ti tao ti padana a tao maipaay iti pagdaksanna.” (Eclesiastes 8:9)—ED.
Dagiti Pagsasao iti Zulu Maysaak a balasitang a 15-años a kankanayon a mangbasbasa iti Agriingkayo! ket pagarupek a nagsayaatan dayta! Kunaek a pudno nga ammo dagiti artists ti ag-drowing. Idi nakitak ti drowing ti makapatawa a langa ti “baka” iti artikulo a “Dagiti Pagsasao ti Zulu” (Marso 8, 1992), diak maisardeng ti agkatawa. Diak maawatan no apay a madi kayat a basaen dagiti adu a tattao ti Agriingkayo!
J. N., Alemania
Hormones Diak maiyebkas iti sasao ti riknak idi naawatko ti artikulo a “Dagiti Hormone—Dagiti Nakaskasdaaw a Mensaheros ti Bagi.” (Abril 22, 1992) Idi Disiembre 1990, nadayagnosak nga addaan iti tumor iti pituitary. Gaput’ awan pulos ammok maipapan itoy a glandula, nagsirarakak a mismo. Ti nabiit pay nga artikuloyo ad-adda pay a linawlawagannak ken nangipaay iti ad-adda a pannakaawatko iti sakitko.
L. M., South Africa
Dagiti Apong Walo ti tawenko ket kayatko ti agyaman iti artikulo nga “Agimtuod dagiti Agtutubo . . . Apay Nakipagtaeng da Apong Kadakami?” (Hulio 8, 1992) Nanipud idi nakipagtaeng ni Apong a baket kadakami, tunggal agsanayak iti pagtokarak a keyboard harmonica, ibagana kaniak a nakapigpigsa ti ar-aramidek nga ungor. Ngem no dadduma padayawannak met, kas no mangibukbokak ti tsa iti tasana, ket kunana, “Pagyamanan.” Idi nabasak ti artikulo, nabigbigko a masapul a naasiak gayam ken ni Apong.
S. T., Japan
Kinakattigid Binasak a buyogen ti kasta unay nga interes ti artikulo a “Kinakattigid—Pagdaksan wenno Pagimbagan?” (Hunio 8, 1992) Kattigidak, ket nupay no awan ti nangup-upay kaniak idi ubingak pay a mangusar iti kattigid nga imak, narigat no maminsan ti makibagay. Kas pangarigan, narigat a suruen ti mangusar iti kartib. Ita addan lima nga annakko, ket kattigid ti buridekko a lalaki. Agarup makatawen a napalabasen, dinamagko no ania nga ima ti usarenna a mangipurruak ti bola. “Daytoy, Daddy,” kinunana, nga intayagna ti kattigidna. Kalpasanna dinamagna: “Daddy, apay a tunggal maysa usarenda ti sabali nga ima?” Agkatawaak pay laeng no panunotek daytoy a naisangsangayan a kanito.
D. C., Estados Unidos