Umuna nga Internasional a Kumbension Dagiti Saksi ni Jehova iti Russia
TI St. Petersburg, Russia, ket nalatak iti awag dagiti agtataeng sadiay a “dagiti naraniag a rabii”—panawen nga agarup tallo a lawas iti Hunio a ti langit ket saan a naan-anay a nasipnget. Ngem ti Hunio 26 agingga ti 28 iti 1992 ket naisalsalumina.
Kadagidiay nga aldaw, inangay dagiti Saksi ni Jehova ti maysa a kumbension a nangawis iti atension, saan nga iti literal a raniag a kanayon a mangsilsilnag iti siudad ti St. Petersburg, no di ket ti naespirituan a lawag nga isilnag dagiti pudno a Kristiano. Gapuna ti tema iti kumbension ket: “Dagiti Managawit iti Lawag.”
Daytoy ti kaunaan nga internasional a kumbension dagiti Saksi iti dati nga Union Soviet. Addada dagiti delegado manipud agarup 30 a pagilian iti intero a lubong a ramanenna ti Alemania, Britania, Canada, Denmark, Estados Unidos, Finland, Italia, Japan, Netherlands, Norway, Sweden, ken Switzerland.
Kanayonanna pay, dimmar-ay ti agarup 29,000 a Saksi manipud iti dati nga Union Soviet. Dadduma ti naggapu idiay Estonia, Georgia, Latvia, Lithuania, Moldova, ken Ukraine. Nakaskasdaaw ti kaadu ti timmabuno no panunuten ti sagsagabaen ti Russia a narikut a panagbaliw ti ekonomiana. Maipateg ti kaadda dagiti delegado a Russo a nagdaliasat iti agarup 8,000 kilometro manipud Vladivostok ken dadduma pay a luglugar iti makindaya a kosta ti Russia.
Ti kaaduan a gangannaet a delegasion ti naggapu iti kabangibang a Finland a nasurok a 10,000 ti timmabuno. Nabingay ti istadium iti dua a benneg—ti Russo ti pagsasaoda ken ti Finnish ti pagsasaoda, a tunggal maysa ti naaddaan ti bukodna nga entablado a nakaiparangan ti programa.
Dagiti Panagsagana
Ti nakaangayan ti kumbension isut’ 42-ti-tawennan a Kirov Stadium, a masarakan iti isla ti Krestovsky, sumagmamano a kilometro manipud ti sentro ti St. Petersburg. Malaonna ti agarup 60,000 ket daytoy ti maikadua a kadakkelan nga istadium iti dati nga Union Soviet. Masirpatan iti likudan dagiti danum ti Neva River nga agturong nga agayus iti Gulf of Finland.
Nupay kasta, masapul a matarimaan ti istadium. Nadalusan dagiti pagayusan dagiti ibleng ken nabangon dagiti kanayonan a kasilias. Napintaan ti agarup 30 kilometro a natukan-tukad a pagtugawan idiay istadium. Kasta met, natabasan dagiti babassit a kayo iti aglawlaw ti istadium agraman dagiti ruot. Nabusbos ti adu a lawas a nangiringpas iti daytoy a trabaho.
Panagbiahe ken Pagdagusan
Pudno a dakkel a trabaho ti panangiyurnos kadagiti panagbiahe ken pagdagusan dagiti nasurok a 17,000 a naawis a gangannaet a delegado. Ngem mannakitunos unay dagiti autoridad a Russo saan laeng a kadagiti opisina dagiti konsul no di ket uray kadagiti beddeng a pagsukimatan ken iti internasional nga eropuerto idiay St. Petersburg.
Naaramid dagiti urnos kadagiti 32 nga otel a pagdagusan dagiti 17,000 a gangannaet a delegado. Napadagus dagiti 29,000 a delegado manipud iti nagduduma a paset iti dati nga Union Soviet kadagiti 132 nga eskuelaan ken day-care centers. Kinasapulan met dagiti delegado dagiti pagluganan iti tunggal aldaw nga agturong iti pagkumbensionan, ket gapu itoy agarup a 390 a bus ti naarkila.
Naaddaan ti taraon dagiti adu a gangannaet a delegado kadagiti nagdagusanda nga otel. Nupay kasta, sumagmamano a bulan kasakbayan ti kumbension, inyebkas dagiti autoridad idiay St. Petersburg ti pannakaseknan iti pannakataraon dagiti rinibo a delegado nga aggapu iti nagduduma a paset iti dati nga Union Soviet. Kinunada nga awan ti umdas a taraon iti siudad ken masapul a mangitugot dagiti Saksi kadagiti bukodda a taraon.
Ket kasta nga agpayso ti inaramidda. Nangipatulod dagiti sumagmamano a sanga ti Watch Tower Society kadagiti adu kargamento ti taraon. Ti sanga laengen ti Finland ket nangidonar iti 200 tonelada a taraon agpaay iti kumbension! Kanayonanna pay, nangitugot dagiti kaadduan a gangannaet a delegado iti sumagmamano a de lata a karne, napakebbet a prutas ken nuts, tinapay, ken dadduma pay a taraon. Iti maudi nga aldaw ti kumbension, naiwaras kadagiti delegado idiay istadium a naggapu iti dati nga Union Soviet dagiti nailugan iti trak a kinahon a taraon tapno adda makanda bayat ti panagbiaheda nga agawid.
Nasaknap a Kampania a Mangipakaammo
Ti St. Petersburg ti maikadua a kadakkelan a siudad iti Russia, nga addaan agarup lima a milion nga umilina. Iti kaunaan a gundaway, napalubosan dagiti Saksi ni Jehova idiay Russia a nangiwayat iti nasaknap a kampania a mangipakaammo.
Nangrugi daytoy di nasingsinga a kampania sumagmamano a lawas sakbay ti kumbension. Nayimprinta iti Russo ken naiwaras ti agarup maysa a milion a handbill. Iti makinsango a paset ti handbill isut’ maysa nga imbitasion agpaay iti palawag publiko iti programa iti malem ti Sabado. Iti likudanna, naibinsabinsa ti programa iti aldaw ti Domingo. Kasta met a nganngani 750,000 a kopia ti tract nga Aniat’ Patpatien dagiti Saksi ni Jehova? ti naiwaras kadagiti agnaed ti St. Petersburg. Inyam-ammo daytoy kadakuada dagiti sursuro dagiti Saksi.
Simmangpet idiay St. Petersburg ti kaaduan kadagiti delegado maysa wenno uppat nga aldaw sakbay ti kumbension. Bayat dagidiay nga aldaw, rinibo kadagiti delegado ti adda kadagiti lansangan a mangiwarwaras kadagiti handbill ken mangituktukon kadagiti tract ken dadduma pay a literatura iti Russo. Kasta met a naisagana dagiti dadakkel a billboard ken naikabilda kadagiti kanayon a mapagnaan a lansangan iti St. Petersburg. Agarup tallo metro ti kangato ken 1.5 metro ti kaakabada, nga addaan de kolor nga imbitasion agpaay iti palawag publiko iti sango ken likudanda. Naipaskil pay ket ti dadduma kadagiti pagserkan dagiti kanayon a napno ti tao nga istasion ti subway.
Ti Programa
Kamaudiananna, dimteng ti umuna nga aldaw ti kumbension, a tinabunuan ti nasurok nga 45,000! Naibagay ti programa a pakagunggonaan dagiti adu a delegado a di makatarus iti Russo wenno Finnish. Kas pangarigan, naiparang dagiti sumagmamano a palawag iti Ingles ken naipatarus iti Russo ken Finnish. Imparang ti pito a kameng iti Bagi a Manarawidwid dagiti Saksi ni Jehova ti sumagmamano kadagitoy a palawag.
Tunggal aldaw iti kumbension, adda dagiti padamag ken kapadasan manipud kadagiti nadumaduma a pagilian a mangitamtampok iti panangbendision ni Jehova iti trabaho a panangasaba kadagidiay a pagilian. Dagitoy a damag, agraman kapkapadasan ket naiparang met iti Ingles ken naipatarus iti Russo ken Finnish.
Inlawlawag ti palawag publiko iti benneg dagiti Russo ti saludsod a pakaseknan ti kaadduan a Russo ita. Ti paulona ket “Pudno Aya a Maseknan ti Dios Kadatayo?” Kalpasan ti palawag, naragsakan dagiti delegado nga immawat ti baro a broshur a Pudno Aya a Maseknan ti Dios Kadatayo? iti Russo ken Finnish.
Saan pay a magun-odan iti Russo ti pagkantaan nga us-usaren dagiti Saksi ni Jehova iti panaggigimongda. Gapu itoy, nangisagana ti Watch Tower Society iti maysa nga espesial a broshur a naglaon kadagiti kantaen bayat iti kumbension. Immawat dagiti delegado a Russo kadagiti bukodda a kopia bayat ti iseserrekda iti istadium. Anian a makaay-ayo a denggen ti 46,000 a tattao manipud 30 a nagduduma a pagilian a mangikankanta iti dayaw ni Jehova a Dios kadagiti bukodda a pagsasao, agraman iti Russo!
Iti adu a dekada, naisuron ti teoria ti ebolusion iti adu a paset ti lubong, agraman kadagiti teritoria iti dati nga Union Soviet. Naan-anay itan a nakabalan dagiti Saksi ni Jehova kadagitoy a pagilian a mangibutaktak kadagiti kinaulbod iti daytoy a teoria ken isaknap ti kinapudno maipapan iti Namarsua iti biag. Anian a rag-o dagiti delegado iti pangserra a sesion iti agsapa ti Domingo idi nga inruar ti maysa a kameng ti Bagi a Manarawidwid ti libro a Life—How Did It Get Here? By Evolution or by Creation? iti pagsasao a Russo! Maysa a sagut a kopia ti nagun-odan ti amin.
Napakaammuanen a nasaksakbay dagiti gangannaet a delegado nga adu kadagiti Saksi idiay Russia ti awanan Biblia. Isu a rinibo a Biblia iti Russo ti naitugot kas sagut. Naummong dagiti Biblia iti maysa a pagummongan a maipanto kadagiti kongregasion dagiti Saksi ni Jehova ken maiwaras kadagiti agkasapulan ti kopia.
Nasdaawda!
Iti Sabado, iti intero a bigat ken nasapa a malem, kanayon nga adda idadar-ay dagiti sangaili a di-Saksi iti istadium. Adut’ magagaran a makakita iti mapaspasamak. Adut’ nasdaaw. Kaaduan kadakuada ti saan pay a pulos a nakangngeg maipapan kadagiti Saksi ni Jehova sakbay nga immawatda iti imbitasion agpaay iti palawag publiko. Adut’ nakangngeg maipapan ti kumbension babaen iti brodkas ti damdamag iti telebision. Ti kangatuan a bilang dagiti timmabuno iti kumbension ket 46,214.
Kinuna ti maysa nga agtutubo a babai a kameng iti Russian Orthodox Church: “Dayawek unay dagiti Saksi. Natalna, managraem, ken nadayawda a tattao.” Kinuna pay ti maysa a lalaki: “Inanamaenmi a maaddaan pay iti ad-adu a kumbension dagiti Saksi ni Jehova ditoy St. Petersburg.” Maysa a Major Sergeant iti polisia ti Russia, wenno militia, a natudingan nga agbantay idiay pagkumbensionan ti nagkuna a “makaparagsak unay ti adda iti kumbension.”
Kinuna ti maysa a lokal nga opisial a ‘minatmatan dagiti sabsabali dagiti Saksi ni Jehova kas maysa nga aglemlemmeng a sekta iti kinasipnget a saan nga umiso ti panangtratoda kadagiti ubbing ken iti bagbagida a mismo. Ngem makitak a normalda, naragsak a tattao, naim-imbag pay ngem kadagiti tattao nga am-ammok. Natalna ken mannakikappiada, ken agdidinnungngoda iti maysa ken maysa.’ Innayonna pay: “Diak pulos maawatan no apay a padpadaksendakayo dagiti tao.”
Iti malem ti Sabado, pinadas ti dadduma a riribuken ti kumbension. Nagawitda kadagiti dadakkel a bandera nga addaan ulbod a pammabasol maibusor kadagiti Saksi. Bayat a dumakdakkel ken lumalaaw ti bunggoy dagiti manangriribuk, nangayab dagiti polis kadagiti katulongan a puersa tapno salakniban dagiti delegado iti kumbension. Nagpatingga laeng dagiti manangriribuk iti makinsango a pagserkan. Iti ngudo ti aldaw, basta pimmanawda laeng a napaay.
Maysa kadagiti delegado iti kumbension a nakaimatang iti napasamak ti nasdaaw iti kinamannakitunos dagiti polis. “Nasdaawak idi nakitak dagiti polis a nangaramid iti naisalsalumina a panagregget a mangsalaknib kadatayo. Itay laeng napalabas a dua a tawen, naibilang dagiti Saksi ni Jehova kas kabusor ti Estado. Ngem ita, dagiti polis a mismo ti mangsalsalaknib kadatayo!” Sipupudno nga inyebkas ti maysa nga opisial ti polis ti rikriknana idi kinunana iti sumagmamano a delegado: “Saanmi a kayat nga agbutengkayo kadakami. Addakami ditoy tapno salaknibandakayo ken siertuen no nasayaat met laeng ti amin.”
Nasayaat ti amin. Uray ti panniempona. Namaga, kalalainganna, ken nalawag ti panniempo iti tunggal aldaw ti kumbension.
Rinibo ti Nabautisaran
Kadagiti adu, ti tampok iti kumbension isut’ pannakabautisar ti rinibo. Impadamag ti maysa a kongregasion idiay St. Petersburg nga addaan 254 nga agibumbunannagna a 108 ti nagbautisar! Saan nga umdas dagiti sasao tapno iyebkas ti rag-o dagiti delegado idi nakitada a timmakder ti 3,256 a kandidato iti bautismo. Inyimtuod ti nagpalawag dagiti dua a saludsod maipapan iti dedikasionda ken Jehova, ken simmungbatda iti natibong a “da” (wen).
Kalpasan ti maysa a kararag, naiturong dagiti kandidato a babbai kadagiti pagsukatanda, ket dagiti lallaki met kadagiti bukodda a pagsukatan. Bayat a ginasut kadakuada ti nangpanaw iti arena, nagkikinnablaawda kadagiti timmabuno babaen ti panangipayapayda iti im-imada.
Nagsangit gapu iti rag-o ti adu kadagiti timmabuno. Nagpalpalakpak nga awanan ressat ti dadduma iti nasurok nga 45 minuto. Saanen a mamedmedan ti maysa a delegado a Finnish ti rikriknana ket isut’ nakasangit. Ilawlawagna: “Idi 1943, naawisak nga agserbi iti armada ti Finland a makidangadang maibusor kadagiti Russo. Daytat’ nakaro unay a gubat. Ket ita, iti daytoy a kumbension, nakitak ti rinibo a Russo a nangidedikar iti biagda ken Jehova! Idi nakitak ti dadduma kadakuada a naka-wheelchair ken agpilaypilay, nagsangitak. Inimtuodko ti bagik: ‘Beteranoda met kadi iti gubat? Isuda kadi dagiti sinugatan dagiti soldado a Finnish?’ Nalabit tulongannak itan ni Jehova a mangandingay kadagiti kakabsatko a Russo.”
Inapresiar kadi dagiti kakabsat a Russo-ti-pagsasaoda ti probision ni Jehova iti daytoy tallo-aldaw a naespirituan a piesta a naisagana kadakuada, daytoy kaunaan a dakkel a kumbension idiay St. Petersburg? Idi ingudngudo ti maudi a nagpalawag ti pangserra a sasaona, kinunana: “Kangrunaan iti amin, agyamantayo ken Jehova a Dios iti daytoy naisangsangayan a kumbension.” Timmakder dagiti timmabuno ket sibabara a nagpalpalakpakda iti nasurok a lima a minuto. Daytat’ maysa a napaut a pammadayaw ken Jehova!
Pudno a tultulongan ni Jehova a Dios, ti Gubbuayan ti lawag, dagiti rinibo a managawit iti lawag kadagitoy a dagdaga a dati a paset ti Union Soviet. Kalpasan ti nasurok a 70 a tawen iti pannakapawil ken pannakaidadanes, nalawag itan nga iti naundayen a panawen a tungtungpalen ni Jehova ti karina idiay Isaias 60:22, a kunana: “Ti bassit agbalinto a sangaribo, ket ti kabassitan maysa a nabileg a nasion. Siak, ni Jehova, aramidekto a nadaras iti tiempona.”
[Kahon iti panid 27]
Dadduma a Kumbension
Innem amin a kumbension ti naangay itay napan a kalgaw iti dati nga Union Soviet. Adda dagup ti timmabuno a 91,673, ket 8,562 ti nabautisaran. Daytoy kaipapananna a 9.3 porsiento iti bilang dagiti timmabuno ti nabautisaran kadagitoy a kumbension. Siempre, daytoy a porsiento ket nangatngato pay koma no awan dagiti 17,000 a gangannaet a delegado idiay internasional a panagtitipon idiay St. Petersburg.
Kinuna ti Visoki Zamok, a naipablaak idiay Lviv (dati a Lvov): “Pudno a nakita ti kinamanangaasi ken kinapasnek idiay istadium bayat ti tallo nga aldaw ti kumbension. Nupay nagadu ti timmabuno, kaskasdi a nadalus pay laeng ti lugar a kas idi sakbay ti kumbension. Iti sadinoman adda ti mapagulidanan nga urnos ken talna.”
Itan ta tagiragsakenen dagiti Saksi ni Jehova ti wayawaya iti panagdayaw iti Dios a sipapanayag iti dati nga Union Soviet, adu kadagiti adda sadiay ti naaddaan ti gundaway a nakakita a mismo no ania ti pudno a kasasaad dagiti Saksi. Kinuna ti Krasnoyarskii Komsomolets, maysa a diario a Russo: “Dagitoy makaawisda, mannakigayyem, ken naan-anay a saan a makinamnamin iti politika; iparparegtada ti kinagaget, saan a ti ‘nalaka a pananggun-od ti kuarta.’”
Dagiti Kumbension iti Dati nga Union Soviet
PETSA SIUDAD KANGATUAN A TIMMABUNO NABAUTISARAN
Hunio 26-28 St. Petersburg,Russia 46,214 3,256
Hulio 10-12 Lviv, Ukraine 15,011 1,326
Alma-Ata,Kazakhstan 6,605 829
Hulio 17-19 Kharkov, Ukraine 17,425 2,577
Hulio 24-26 Irkutsk, Siberia 5,051 536
Tallinn, Estonia 1,367 38
NAKAGUPGOPAN 91,673 8,562
[Ladawan iti panid 24]
Impakaammo dagiti billboard ti kumbension
[Dagiti Ladawan iti panid 25]
Aw-awaten ti maysa a delegado a Russo ti bukodna a kopia ti Biblia
Nausar dagiti espesial a broshur a pagkantaan
[Dagiti Ladawan iti panid 26]
Makaparagsak a 3,256 ti nabautisaran