Manipud Managbasatayo

Chronic Fatigue Syndrome Uray la insangitmi ti panangapresiarmi a sangapamiliaan idi naawatmi ti Agriingkayo! maipapan iti CFS. (Agosto 22, 1992) Maseknan unay ti organisasion ni Jehova a mangted iti pannakaammo kadagiti saan pay nga aglaklak-am iti daytoy nakaro ken karkarna a sakit! Pagyamanan met, iti apresasion a naiyebkas kadagiti mangay-aywan kadakami a mangipakpakita iti kasta unay a panagsakripisio.

K. C., Australia

Kasla siak daydiay babai iti akkub. Dagiti artikulo ti nangted kaniak iti tured a mapan iti doktor ket bigbigek a talaga a masakitak. Ti panagleddaang ti nangipabasolak iti amin. Ngem agyamanak ken Jehova, awanen ti panagleddaang a nariknak.

M. A., España

Kamaudiananna, maysa a magasin maipapan iti CFS! Pinadasko nga inlawlawag iti sabsabali no aniat’ marikriknak ngem napaayak wenno napabainanak! Dagitoy nga artikulo ket pangarigan iti dagus a panangtaming dagiti publikasionyo kadagiti naintiempuan a pakasapulan dagiti tao.

F. C., Italia

Kasla diak patien nga adda met laengen sungbat dagiti saludsodko maipapan iti salun-atko. Agsagsagabaak iti CFS iti 14 a tawenen ket diak ammo no ania a talaga daytoy. Naggapuakon iti adu a doktor a mangibagbaga nga agledleddaangak wenno addaan parikut iti emosion. Nangipatulodak iti kopia daytoy a magasin iti 25 kadagitoy a doktor.

J. A. G., Brazil

Addan umdas a pannakaammok maipapan iti CFS. Ti kangrunaan a kasapulak isut’ nadakamatyo iti maysa a parapo idiay panid 14 a mangibagbaga iti solusion ni Jehova a Dios iti daytoy. Agyamanak unay! Makasangitak iti tunggal panangbasak iti dayta a parapo, nga itan ket gistay 50 a darasen!

S. D., Estados Unidos

Nupay agsangsangit ken agpigpigergerak, nairingpasko a binasa daytoy nga artikulo. Agsagsagabaak iti CFS. Nabayag sakbay a naammuanda ti sakitko. Ngem ti sakitko ket saan a kas ti kadagsen iti adda a marikriknak gapu ta di maawatan dagiti Kristiano a kakabsatko ti adda nga an-anayek. Kasla kanayon nga ammo ni Jehova no kaano nga ipaayannakam iti impormasion.

K. J., Estados Unidos

Ti balasangko nagsagaba iti CFS iti sumagmamanon a tawen, gapuna naragsakanak unay a nakaawat iti Agosto 22 nga Agriingkayo! Nalawag unay ti panangibinsabinsana kadagiti parikut nga uray la diak maidisso ti magasin agingga a diak naungpot dayta a binasa. Inulitko manen. Maysanto daytoy kadagiti magasin nga idulinko iti espesial a pagsalansanak kas nadaras a pagreperensiaan. Dakkel unay ti naaramidan daytoy a magasin kaniak nga isut’ pamkuatak nga agyaman.

M. E., Inglatera

Alkoholiko a Nagannak Agyamanak iti artikuloyo nga “Agimtuod Dagiti Agtutubo . . . Maysa nga Alkoholiko a Naganak​—Kasanoak nga Agballigi?” (Agosto 8, 1992) Ni tatangko ket agpapaimbag nga alkoholiko. Isut’ abusado agpadpada iti pisikal ken mental. Ubingak pay idi nangrugiakon nga uminom ket ngannganin agbalinak nga alkoholiko idi nangrugi ni nanangko a nakipagadal kadagiti Saksi ni Jehova. Maragsakanak a mangibaga a nagpabautisarakon idi Agosto 1991! Agaplikarak itan kas amin-tiempo a managebanghelio. Apresiarek unay ti pannakaawat [a naiyebkas] iti artikulo iti rikrikna dagiti agtutubo kadagiti alkoholiko a nagannak. Dungdunguenmi ida, ngem di kayat a sawen daytoy a panuynoyanmi ti ar-aramidenda.

L. W., Estados Unidos