Apay Nakaad-adu ti Ulbod a Pakdaar?

Ti Panungpalan ti Lubong​—Kasanot’ Kaasidegna?

NAISALAYSAY ti estoria maipapan iti maysa nga ubing a lalaki nga agay-aywan ti karnero dagiti bumario. Tapno mangtignay iti panagdanag, maysa nga aldaw impukkawna, “Lobo! Lobo!” idinto nga awan met ti lobo. Dagus a rimmuar dagiti addaan pang-or a bumario a mangpapanaw ti lobo, ngem naammuanda nga awan met gayam. Nagay-ayatanna dayta ta idi kuan inulit manen ti ubing ti ikkisna. Dagus manen a rimmuar dagiti bumario nga addan kadagiti pang-or, ket naammuanda laeng a maysa manen nga ulbod a pakdaar. Idin agpayso nga immay ti lobo, ket imkis ti ubing, “Lobo! Lobo!” ngem impagarup dagiti bumario a sabali manen nga ulbod a pakdaar. Masansanen a naallilawda.

Kasta met ti nagbanagan dagidiay mangiwaragawag iti panungpalan ti lubong. Iti panaglabas dagiti siglo nanipud idi kaaldawan ni Jesus, nakaad-adun dagiti di natungpal a padto ta adun ti di mangikankano kadakuada.

Kinuna ni Gregory I, papa nanipud 590 agingga iti 604 K.P., iti suratna iti agturay ti Europa: “Tarigagayanmi met a maammuan ti Kinatan-okyo, kas naammuanmi kadagiti sasao ti Mannakabalin-amin a Dios iti Nasantuan a Kasuratan, a ti panungpalan ti agdama a lubong asidegen ket umadanin ti awan patinggana a Pagarian dagiti Sasanto.”

Idi maika-16 a siglo, impadto ni Martin Luther, ti nangbuangay iti Iglesia Luterano, a ti panungpalan asidegen. Sigun iti maysa a pannakabagi ti linteg, kinunana: “Iti biangko, siguradoak a ti aldaw ti panangukom asideg unayen.”

Maipapan iti maysa kadagiti immuna a grupo dagiti Baptist, naipadamag: “Patien dagiti Anabaptist idi nasapa pay a Maika-16-Siglo a mapasamak ti Milenio idi 1533.”

“Kuna ni Edwin Sandys (1519-1588), Arsobispo iti York ken Obispo iti Inglatera . . . , ‘Manginanamatayo a daytoy nga iyaay ti Apo asidegen.’”

Naadaw a kunkuna ni William Miller, a kaaduanna a mapadayawan iti pannakaibangon ti Iglesia Adventista: “Naan-anay a makumbinsirak nga iti nagbaetan ti Marso 21, 1843, ken Marso 21, 1844, sigun iti pamay-an ti panangkuenta dagiti Judio iti tiempo, umayto ni Kristo.”

Ti kadi saan a pannakatungpal dagita a padto ibilangna dagidiay nagipadto kadakuada kas ulbod a mammadto, sigun iti kaipapanan ti Deuteronomio 18:20-22? Kunaen dayta a teksto: “Ngem ti mammadto a mangyebkasto iti sao a sikukuspag iti naganko a diak imbilin kenkuana a sawenna wenno sawennanto iti nagan dagiti sabali a didios, dayta met la a mammadto matayto. Ket no sawem iti pusom: ‘Kasano ti panangammominto iti sao a di imbaga ni Jehova?’ no ti mammadto agsao iti nagan ni Jehova, no ti banag saan a sumaruno wenno di maaramid dayta, dayta ti sao a saan a sinao ni Jehova.”

Adda dadduma a mangiyebkas kadagiti naisangsangayan a padto maipapan iti panungpalan ti lubong tapno awisenda ti atension ken dagiti pasurot, ngem dadduma ti sipapasnek a makumbinsir a pudno dagiti waragawagda. Iyeb-ebkasda dagiti pananginanama a naibatay kadagiti bukodda a panangipatarus iti dadduma a teksto ti kasuratan wenno pisikal a pasamak. Dida ibagbaga a dagiti padtoda ket direkta a palgak a nagtaud ken Jehova isu nga agipadpadtoda iti nagan ni Jehova. Gapuna, kadagita a kaso, no di pumayso dagiti saoda, saanda ngarud a mamatmatan kas ulbod a mammadto kas kadagidiay napakdaaran idiay Deuteronomio 18:20-22. Gapu ta managbiddutda a tattao, di umiso nga impatarusda dagiti bambanag.a

Gapu ta dida malapdan kadagiti immuna a pannakapaay, kasla naparegta ti dadduma iti iyaadani ti tawen 2000 ket nagipadtoda manen maipapan iti panungpalan ti lubong. Ti The Wall Street Journal a Disiembre 5, 1989, nangipablaak ti maysa nga artikulo a napauluan “Panangsegsegga iti Milenio: Umadu Dagiti Mammadto, Asidegen ti Panungpalan.” Iti iyaadani ti tawen 2000, ipadpadto ti nadumaduma nga ebanghelikal nga umay ni Jesus ket ti 1990’s “maysanto a tiempo ti riribuk a saan pay a naimatangan idi.” Idi maisursurat daytoy, ti kaudian ket napasamak idiay Republika ti Korea, a sadiay ti Mision Maipaay iti Umay nga Al-aldaw impadtona nga idi Oktubre 28, 1992, iti tengnga ti rabii, umayto alaen ni Kristo dagiti manamati nga ipan idiay langit. Nagipadles met ti dadduma pay a grupo a mangipadpadto ti pannakadadael.

Daksanggasat ti panaglayus dagiti ulbod a pakdaar. Kasda la kadagiti ikkis ti ubing a pastor a lobo-lobo​—dinton ikankano dagiti tattao, ket inton umay ti pudno a pakdaar, dinto met maikankano dayta.

Ngem apay adda pagannayasan a mangiyebkas kadagiti ulbod a pakdaar iti adun a siglo agingga iti kaaldawantayo, kas kinuna ni Jesus? (Mateo 24:23-26) Kinuna ni Jesus kadakuada, kalpasan ti panangibagana kadagiti pasurotna maipapan kadagiti nadumaduma a pasamak a mangtanda iti isusublina, kas mabasatayo idiay Mateo 24:36-42: “Maipapan iti dayta nga aldaw ken oras, awan ti makaammo no kaanonto uray pay dagiti anghel ti langit, uray pay met toy Anak, no di laeng ni Ama. Ta kas kadagiti aldaw ni Noe, kastanto ti yaay toy Anak ti tao. . . . Agsalukagkayo ngarud, ta dikay ammo no ania nga oras ti iyaay ti Apoyo.”

Naibaga kadakuada a saanda laeng nga agsalukag ken agsagana no di ket agsiputda a buyogen ti panagsegga. Kuna ti Roma 8:19: “Ta ti nasged a tarigagay ti sangaparsuaan ur-urayenna ti pannakaiparangarang dagiti annak ti Dios.” Nakaisigudan ti tao a no sipapasnek nga inanamaen ken tarigagayantayo ti maysa a banag ken segseggaantayo dayta, pampanunotentayo a matungpalto ti inanamatayo iti asideg a masanguanan uray no kurang dagiti pammaneknek. Ti reggettayo ti makagapu a mabalin a maiyebkas dagiti ulbod a pakdaar.

Ania ngarud ti mangilasin iti pudno a pakdaar manipud kadagiti ulbod? Maipaay iti sungbat, pangaasiyo ta kitaenyo ti sumaganad nga artikulo.

[Footnote]