Kayatyo Aya a Linglingayen Dagiti Gagayyemyo?

SARSARDAM pay laeng, ken madama ti maysa a sosial a taripnong. Madamat’ panagraragsak ti amin a timmabuno idi naipakaammo a dua a babbaro ti manglinglingay babaen iti musika ken ababa nga skit.

Adun a daras a sibaballigi[da] a nanglinglingay, gapuna ninamnamada ti maysa a nabara a pammadayaw. Ngem iti bainda, panaglibbi, panagulimek, ken kamaudiananna, por komplemento a palakpak ti inawatda. Saan a naballigi ti pabuyada! Aniat’ gapuna?

No adda sagudayyo ket kayatyo nga iraman dayta iti gagayyemyo, madanagankay kadi di la ket ta madapasanyo met dayta? Aniat’ sekreto tapno talaga a maragsakan dagiti tao a malinglingay? Wenno nalabit saan a dakayo a mismo ti manglinglingay ngem addada kiniddawyo a manglinglingay kadagiti panagtataripnong idiay pagtaenganyo. No kastoy man ti kasasaad, kasanoyo a masigurado a maragsakanto dagiti sangailiyo iti presentasion?

Nabukel dagiti sumaganad a singasing agpaay iti pananglinglingay idiay pagtaengan babaen iti musika. Ngem maamirisyonto a kaaduan kadagiti pagalagadan ket agaplikar met iti dadduma a kita ti pananglinglingay, kas ti panangiparang kadagiti skit, panagpabuya iti slide, panagestoria, ken panangilanad kadagiti kapadasan.

Panangparnuay iti Nasayaat nga Atmospera

Ipapantayon a mangangaykayo iti panagtataripnong, nga addaan iti presentasion iti musika. Saan a kasapulan nga aduankayo (wenno dagidiay agakem) iti estilo ti panagkanta/panagtokar tapno makalinglingaykayo. Kinapudnona, saan unay a nalaing a manglinglingay ti dadduma a nasigo a musiko. Gapu ta ti pananglinglingay ramanenna ti panangammo no kasanot’ panangtulong iti tattao a mangparagsak a mismo iti bagbagida. Mangrugi daytoy babaen ti panangparnuay iti maysa nga atmospera a maiyataday iti panagraragsak. Kas pangarigan, mano a sangaili ti awisenyo?

Nabalballigikayo no bassit laeng a grupo ti awisenyo ngem iti dakkel. Ti bassit a grupo mangted iti gundaway iti tunggal maysa a makipatang ken tagiragsaken ti makilangen iti sabsabali. Kasta met a tapno maparnuay ti maysa a naragsak nga atmospera, mangisaganakayo iti pangrepresko, pannangan man wenno merienda laeng. No merienda laeng ti isaganayo, ipakaammoyo daytoy kadagiti sangailiyo tapno dida mangnamnama iti ad-adu [ngem iti insaganayo].

Napateg a tingitingen no kaanoyo nga iparang ti presentasionyo iti musika. Adu ti maragsakan iti kadawyan a pannakasangaili a saanda unay kayat wenno talaga a saanda a kayat ti masinga bayat iti pannangan wenno panagpapatang. No kastoy dagiti sangailiyo, ikkanyo ida iti gundaway [a mangiringpas iti ar-aramidenda] sakbay nga ipakaammoyo ti maysa a sorpresa a programa agpaay kadakuada. Daytoy ti naliwayan nga inaramid ti dua a baro a nadakamat itay. No inurayda laeng koma nga in-inut a nairingpas ti dadduma nga aktibidad, ad-adda koma a nagimdeng dagiti nagbuya kadakuada.

No adda planoyo a panagkakanta, mabalin a maamirisyo a nasaysayaat no aguummongkayo, kas koma iti panagtugaw iti aglikmut ti pagapuyan wenno iti suelo. Nasaysayaat ti panagkanta ti tattao no umiso ti rikna ken dagiti kasasaad. Adut’ maitulong ti panangparnuay iti nasayaat nga atmospera tapno masigurado a maragsakan dagiti sangaili iti presentasionyo. Daytoy met ti makatulong iti napamaysa a panagbuyada iti pananglinglingayyo babaen iti musika.

Dimtengen ti panawen tapno linglingayenyo dagiti sangailiyo. Kasanot’ naballigi a panangaramidyo iti dayta?

Panangallukoy Kadagiti Agbuya

Maragsakan ti kaaduan a tao a buyaen ti maysa a nasayaat a parang. Gapu ta iti maysa laeng a tawen a napalabas, 8,142,000 a tiket ti nalako kadagiti pabuya ti Broadway, a nakabiruk iti 253.4 milion a doliar! Ngem no ti panagpabuyayo ket maysa laeng a pagay-ayatyo nga aramiden ken awan met tangdanyo, maipasangokayo iti karit nga allukoyen ti interes dagiti managbuya a saan met a nagkiddaw iti pananglinglingayyo. Ti solusion? Iramanyo dagiti managbuya iti panangiparangyo iti sagudayyo. Adtoy ti sumagmamano a singasing:

Usarenyo dagiti kabisadoyo a material. Mamakdaar ti maestro ti gitara a ni Frederick Noad: “Masapul nga adda kabisadoyo a tokaren bayat nga agpampanunotkayo iti sabali pay.” Nasayaat ngarud no adda sumagmamano a kabisadoyo a tokaren agpaay iti masanguanan. Kunaen ni Mr. Noad: “Nasaysayaat no simple laeng ti tokarenyo ngem iti komplikado a saanyo met a kabisado.”

Iraman dagiti managbuyayo. Impaganetget ti maysa a musiko a batidon iti adu a tawen ti kinapateg ti pannakiraman dagiti agbuybuya, a kunkunana nga ibunonganna dagiti managbuyana kadagiti kopia ti kankantaenna sa awisenna ida a makidanggay iti panagkanta. Makatulong ti panangiraman kadagiti managbuya iti presentasionyo tapno mapagtalinaed ti naganaygay a panangsuportada.

Pagdudumaenyo. Kadawyan ti dadduma nga agtokar iti nakapuy ken di naganaygay. Ngem isingasing ni Frederick Noad: “Kanayon a pagdudumaenyo ti panagtokaryo, kas pangarigan, no maulit manen ti maysa a paset ti musika, masansan a nasayaat unay no tokarenyo iti napigsa ti damo [a pasetna] ken siaalumanay iti pannakaulitna, a gistay kas iti allingag ti unina. . . . Ti pannakapnek iti panagtokar ket agpannuray iti daytoy a panamagduduma a mangigiddiat iti panagtokar manipud basta panagbasa laeng kadagiti nota babaen iti instrumento ti musika.”

Paganaygayenyo ti bagiyo. Saan a naganaygay dagiti sangailiyo no madlawda nga alusiisen, agnerbios, wenno madanagankayo. Saanda met [unay] a maragsakan no pilpilitenyo a tuladen ti maysa a nalatak a musiko/managkanta. Narigat ti agbalin a naganaygay no amin nakamulagat kadakayo, ngem nasken a suruanyo ti bagiyo nga agbalin a kalmado ken nabiag, naganaygay, ken naragsak ti presentasionyo. Iti kasta naganaygayto met dagiti managbuyayo ken maragsakanda iti pananglinglingayyo.

Pagbalinenyo laeng nga ababa! Sumagmamano laeng ti kantaen ti epektibo a mananglinglingay ngem iti adda a tarigagayan dagiti agbuya. Iti maysa a kalalainganna a salas, mabalin nga alusiisenen dagiti tao kalpasan ti 20 wenno 30 a minuto. No malpasen ti presentasionyo, bay-an dagiti sangailiyo nga ituloyda ti makiraman iti nadumaduma nga aktibidad. Nalpasen ti pabuya, ngem kanayon a malagipdanto dayta buyogen iti panangipateg gapu ta il-iliwendanto manen dayta.

Panangparmek iti Panagnerbios

Uray dagiti propesional ket makidangdangadang iti panagnerbios. Ngem, nasursuroda a tenglen dayta ken agparang a naganaygay. Kasanoyo met a maaramidan dayta?

Umuna iti amin, agsaganakayo! Paneknekan ni Dale Carnegie, a mangus-usig iti rinibo a palawag iti kada tawen: “Ti laeng nakasagana a pumapalawag ti maikari a makapagtalek [iti bagina].” Pudno met daytoy kadagiti mananglinglingay. Dakkel ti maitulong ti nasakbay a panaginsayo, ken panagsanay sakbay ti presentasion. Bayat ti presentasion, ipamaysa ti panunotyo iti materialyo. Panunoten ken imdenganyo ti amin a toktokarenyo. Isingasing ni Frank Battisti ti New England Conservatory of Music: “Ti kapatgan nga aramiden ti maysa a tao isut’ panangipamaysa iti atensionna iti ar-aramidenna, ken di madanagan iti aniaman a panunoten ti asinoman maipapan iti dayta. No kastat’ maaramidanyo, dikayto pulos madanagan.”

No agkamalikayo, diyo ipadpadlaw kadagiti managdengngegyo. Mabalin a nadlaw ti dadduma, ket nalabit di ikankano ti dadduma. Sipsiputanda ti reaksionyo​—no ituloyyo ti umiso a panagtokaryo, a kas ket tay awan aniaman ti kamaliyo, kastanto met ti aramidenda.

Saguday a Mangidayaw iti Namarsua

No masansan a kiddawen dagiti gagayyem nga agtokarkayo, diyo dagus pagkedkedan, a kasla diyo kabaelan. No kayatda ti awan kamalina, saan kadi a pinilida koma laengen ti nairekord a musika? Kinuna ti maysa a balasang, a nalatak kadagiti gagayyemna gapu kadagiti iyur-urnosna a naragsak a panagtataripnong idiay pagtaengan: “Anian a makaparagsak no ti maysa a sangaili adda sagudayna iti musika ken umay a sisasagana a manglinglingay ken iramanna ti amin iti presentasionna!”

Wen, adut’ mangipateg iti rag-o a masarakan laeng iti nabiag a pananglinglingay idiay pagtaengan. Laglagipenyo met, a mabalin a tarigagayan dagiti gagayyemyo ti makapabileg a panaglinglingay, a rumigrigat a magun-odan kadagiti propesional a kumakanta/managtokar. Isu a no nasagutankayo iti saguday a manglinglingay iti sabsabali, mabalinyo nga usaren dayta a pangidayaw iti Naindaklan a Namarsuatayo, ti Manangipaay iti “isuamin a sagut a nasayaat ken isuamin a sagut a naan-anay.”​—Santiago 1:17.

[Kahon iti panid 16]

Kanayonan a Singasing

AGBALIN a nasigo. No makatokarkayo iti nadumaduma nga estilo, nupay sumagmamano laeng iti tunggal kategoria, adda gundawayyo a mangpennek iti kayat ken kiddaw dagiti agbuya.

Urnosenyo ti material iti makaay-ayo a pamay-an. Masansan a nasaysayaat ti mangrugi ken mangiringpas kadagiti ababa ken pagaammo ti kaaduan a kankanta. Nasaysayaat no ikabilyo iti katengngaan ti presentasionyo dagiti at-atiddog wenno narigrigat a kanta no kantaen/tokarenyo man ida.

Mingminganyo dagiti managbuyayo. Nupay ti panangperreng pagalusiisenna ida, mabalin a taldiapan ken kasaoyo ida kabayatan ti presentasionyo.

Saanyo a taktaken ti presentasionyo. Nupay ti masansan a panangabrasa makatulong iti kinaganaygay ti amin (agraman ti bagiyo), diyo lablabsen daytoy. Liklikanyo met ti atiddog a pannakasinga gapu iti nabayag a panangitono [iti boses/intrumento]. Saan unay a madlaw ti managdengngegyo ti bassit a depekto ti kanta/tokaryo ngem masuronda iti masansan a panagtaktak.