“Panangsursuro iti Leksion ti Panangpanuynoy”
BAYAT nga umadanitayo iti panagngudo ti maika-20 a siglo, nakasursuro kadin ti intero a sangatauan iti leksion nanipud iti naranggas a historiana manipud idi 1914? Saan unay a mangnamnama ni Federico Mayor, direktor heneral ti UNESCO (United Nations Educational, Scientific, and Cultural Organization), iti maysa nga artikulo nga insuratna iti The Unesco Courier. “Ti lubong a ti itatanorna ket maawatan . . . dina idagadag ti naimpusuan a kinabara. Dagiti panangipangpangruna iti relihion, nasionalismo, panangidumduma iti rasa wenno tribo, panaginap: dagiti angin ti wayawaya siniliabanda dagiti pagsilawan ti gura . . . . Ti pannakarba ti maysa a daan nga urnos ti nangibati iti tay-ak a nakalukat iti amin a kita ti kapanunotan, a dadduma kadakuadat’ nariribuk—ket ti kinaranggas agkurri iti yan ti kinakawaw.”
Apay nga agkurri ti kinaranggas? Apay nga aggiginnura ken agpipinnatay ti tattao gapu laeng iti panagduduma ti relihion wenno nagtaudan a tribo? Idiay man dati a Yugoslavia, idiay India, idiay Makin-amianan nga Ireland, idiay Estados Unidos, wenno sadinoman ditoy lubong, maysa kadagiti agparang a makagapu isut’ di umiso nga edukasion. Imbes a sursuruen ti panangandingay ken panagraem iti maysa ken maysa, ti panaginap ken pananggura ti nasursuro ti tao kangrunaanna manipud kadagiti dadakkelda, eskuelaan, ken kagimongan.
Intultuloy ni Federico Mayor: “Baybay-antayon ti agpangadua a panangpanuynoy a mangipalubos kadatayo a panuynoyan ti di rumbeng a panuynoyan—ti kinapanglaw, panagbisin ken panagsagaba ti minilion a tao. No kasta ti aramidentayo, malak-amantayto ti panangngaasi ken panagkaykaysa.” Nagsayaat dagitoy a rikrikna. Ngem ania a praktikal a pamay-an ti mangbalbaliw iti nasipngetan nga espiritu nga adda iti sidong ti maaw-awagan a nalawagan a lubong?
Nasurok a 2,500 a tawenen ti napalabas, insurat ni Isaias dagitoy a sasao ni Jehova: “Amin dagiti annakmo maisuronto kadakuada ni Jehova, ket dakkelto ti talna dagiti annakmo.” (Isaias 54:13) Yantangay ti “Dios ket ayat,” maitutop laeng a dagidiay pudno nga agbibiag kadagiti prinsipiona sursuruendan ti kinatalna, saan ket a gubat; ayat, saan ket a gura; panangpanuynoy, saan ket a kinainget.—1 Juan 4:8.
Asino dagiti mangitantandudo iti daytoy a sursuro a mangiturong kadagiti tao iti talna ken ayat ken panangpanuynoy? Asino dagiti agbibiag iti panagkaykaysa agpapan pay iti naggapuanda a nasionalidad? Asino dagiti immawaten iti edukasion ti Biblia a nangbalbaliw iti intero a panangmatmatda manipud iti gura a nagbalin nga ayat? Isingasingmi nga usigenyo dagiti sursuro ken al-alagaden dagiti Saksi ni Jehova tapno maammuanyo no apay a pudpudno nga addaanda iti sangalubongan a panagkaykaysa.—Juan 13:34, 35; 1 Corinto 13:4-8.