Nakaskasdaaw ken Nakaam-amak a Paspasamak iti Baba ti Abut ti Ozone
DAGITI 125,000 a residente ti Punta Arenas, makin-abagatan unay a siudad ti Chile, ti nabayagen a nangputar kadagiti ang-angaw maipapan ti panagbiag iti “panungpalan ti lubong.” Ngem dagiti kellaat a nakaskasdaaw ken nakaam-amak a pasamak itay napan a tawen ti namagbalin iti ang-angaw a medio literal unay. Pampanunotenen ti dadduma a sientista a mabalin nga adda “banag a baro iti baba ti init.” Ti maysa a padamag iti The Wall Street Journal, Enero 12, 1993 ti mangipaay iti dadduma a detalye.
Ipadamag ni Felix Zamorano, maysa a kameng ti Atmospheric Studies Group idiay lokal nga University of Magallanes: “Idi Oktubre, inlistami ti kababaan pay laeng a tukad ti ozone. Immingpis ti ozone iti agarup kaguddua iti normal iti tallo nga aldaw ket bimmaba iti maibilang a napeggad a tukad.” Dagiti epekto ti lumanlanlan nga ultraviolet radiation manipud iti abut ti ozone layer “iramanda ti kanser ti kudil ken katarata, agraman ti pannakadangran ti phytoplankton, ti kangrunaan a taraon dagiti sibibiag a parsua iti danum,” kuna ti Journal.
Itay napan a tawen, “kaguddua iti pangen ti 1,200 a baka ni Radovan Vilicic ket binulsek ti conjunctivitis nga urayda la nagdidinnungpar a kas dagiti kotse, ket lima a baka ti natay iti bisin gapu ta dida makita ti pagarabanda.”
Kuna pay ti Journal: “Umasping iti dayta ti napasamak ken Jose Bahamonde. Makita iti rantsona, 125 a kilometro manipud ditoy, ti nagpintas a buya ti Strait of Magellan, ngem kaaduan kadagiti 4,300 a karnerona ti saan a makakita iti dayta, wenno aniaman pay a buya. Maag-agasan dagiti naimpeksionan a mata ti agarup 10% kadakuada, ket 200 iti arbanna ti nabulsek itay napan a tawen.”
Ikalintegan ti dermatologist a ni Jaime Abarca a “ti napasamak ditoy ket kabbaro unay iti lubong. Kas iti kinaimposible ti panagdisso ditoy Daga dagiti maipagarup nga agtataeng idiay Mars.” Umad-adu a pasientena ti adda sakit ti kudilda, immadu dagiti kaso iti sunburn, ket no idilig kadagiti kabbaro a kaso ti kanser-ti-kudil nga isu ti napegpeggad a kanser a melanoma ket ad-adu iti lima a daras ngem iti kadawyan. Kumbinsido unay a nainaig daytoy iti lumanlanlan nga ultraviolet radiation.
Ibilang dagiti residente ti Punta Arenas a parikut dayta a masapul a mataming. Dagiti sun block a nalako ti maysa a parmasia ket ad-adu iti 40 porsiento ngem itay napan a tawen. Adda serbisio ti telepono a mangipapaay iti impormasion maipapan ti tukad ti ultraviolet radiation. Tallo a lokal nga estasion ti radio ti mangipadpadamag met iti tukad ti ultraviolet radiation. Ibaga dagiti eskuelaan kadagiti estudiante nga agusarda iti kallugong, sun block, ken antiohos. Ngimmato iti 30 porsiento ti naglakuan ti maysa a tiendaan ti antiohos. Ket “maysa a rantsero ti mangpadpadas a mangdisenio iti antiohos para kadagiti karnerona.”
Kuna ni goberbador Scarpa: “Diak ilibak dagiti kinapudno. . . . Aniat’ kayatyo nga aramiden? Saantay maikabil ti intero a rehion iti maysa a balay.”