Idayaw ti Reporter ti Kiev Dagiti Saksi
NAGSAYAAT ti panangidayaw ni Oleksa Kurpas iti kumbension nga inangay dagiti Saksi ni Jehova idiay Kiev, Ukraine, Agosto 5 agingga iti 8, 1993. Nagsurat idiay Democratic Ukraine idiay Kiev idi Agosto 10:
“Di pay nakakita ti Republican Stadium ti kasta a timmabuno iti nabayagen a tiempo . . . Agasenyo, 64,000 a tattao (a mairaman kadakuada dagiti rinibribu a ganggannaet) a nagnaed kadagiti hotel, bumisita kadagiti paglakuan, aglugan kadagiti transportasion ti publiko. . . . Nagsayaatan ti panagtataripnong dagiti Saksi ni Jehova. Dagiti nagpalawag napalakpakanda iti nakapigpigsa (kas idi immuna a tiempo), ket nagayus dagiti lulua iti rupak.
“Saan nga am-ammo dagiti amin a tattao daytoy a relihion. Ti nakaidumaanda iti pammati nga Orthodox, patien dagiti Saksi ni Jehova a ni Jesu-Kristo ket Anak laeng ti Dios, ket ti nasantuan nga espiritu isu ti puersa ti Dios, wenno pannakabalin, (a kaipapananna, a saanda nga awaten a nagkaykaysa dagiti tallo iti Nasantuan a Trinidad). Isuroda nga awan ti impierno. Kalpasan ti nakaam-amak a panangukom, mapagbalinto ti lubong a maysa a paraiso, a sadiay agbiagto dagiti nalinteg a tattao ket matayto dagiti managbasol. Dagiti pasurot daytoy a pammati ipangpangrunada nga asikasuen ti pamiliada. Daytoy ket nasantuan a banag, ti pudno a pakaibatayan dagiti bambanag, ti kapintasan ken kabaraan a banag iti lubong. Mannakigayyemda unay kadagiti kakabsatda a lallaki ken babbai (ken ad-adda pay a nakaskasdaaw—kadagiti tattao iti sabali a pammati). Diak pay nakakita ti banag a kas itoy. . . .
“Napasamak ti makaawis unay a banag idi Sabado, Agosto 7. Itoy nga aldaw idiay International Convention dagiti Saksi ni Jehova, iti kaanoman awan pay kasta a bilang ti nabautisaran, agdagup iti 7,402. Gapu itoy a naisangsangayan ken nagpateg nga addang, innem a dadakkel a mabalin a rakraken a pool ti masarakan iti pagtarayan idiay Stadium. Innem a pulo a nataengan a lallaki ti nangbautisar babaen ti panangitaneb iti danum kadagitoy a kabbaro a manangaskasaba iti naimbag a damag. Nagpaut ti intero a seremonia iti 2 nga oras ken 15 a minuto. . . .
“Dagiti baro nga adalan pinunnoda ti lima a seksion ti stadium ket pinalakpakan ida dagidiay Saksi ni Jehova a timmabuno iti kumbension. Ti bilang dagidiay nabautisaran idiay Kiev linab-awanna ti napalabas a kangatuan a bilang idi 1958 [7,136], iti kumbension internasional idiay Nueva York. Kaaduanna, babaen iti kasta a nagsayaat ti panagandarna nga organisasion a kas [iti organisasion] dagiti Saksi ni Jehova, daytoy a relihiuso a panagtignay iti asideg a masanguanan siguradonto a maallukoyna dagiti adu nga Orthodox a kararua nga addan iti dayta a pammati iti nabayagen a tiempo.
“Sapay koma ta pakawanendak dagiti pangulo ti nadumaduma a relihion, ngem no dida isardeng dagitoy awan mamaayna a panagaapa iti ummongda a mismo, mapukawdanto dagiti ginasut a ribu a relihiuso a tattao. Impakita daytoy a kumbension a talaga a mabalin a magun-odan ti kappia ken panagtutunos dagiti tattao iti nadumaduma a nasionalidad ken manipud kadagiti nadumaduma a pagilian.”
[Ladawan iti panid 24]
Dadduma kadagiti 7,402 a nabautisaran idiay kumbension ti Kiev, Ukraine