Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g94 2/22 p. 30
  • Manipud Managbasatayo

Awan video-na ti napilim.

Pasensiakan, adda problema iti pannakai-load ti video.

  • Manipud Managbasatayo
  • Agriingkayo!—1994
  • Umasping a Material
  • Manipud Managbasatayo
    Agriingkayo!—1993
  • Aborsion—Saan a Pudno a Solusion
    Agriingkayo!—2009
  • Addaan Kadi ti Sungbat Dagitoy a Relihion?
    Agriingkayo!—1993
  • Aborsion—Dayta Aya ti Solusion?
    Agriingkayo!—1995
Kitaen ti Ad-adu Pay
Agriingkayo!—1994
g94 2/22 p. 30

Manipud Managbasatayo

Rasismo Iti seryeyo nga “Agkaykaysanto Pay Aya Dagiti Amin a Rasa?” (Agosto 22, 1993), inlawlawagyo ti suheto maipapan ti panangidumduma iti pulí. Ngem apay a limitado laeng iti dayta? Saan kadi a paset ti kinatao ti saan unay a makilangen iti maysa a naiduma? Panunotenyo ti panangidumduma iti nagbaetan dagiti negosiante ken dagiti propesional, iti nagbaetan dagiti taga siudad ken dagiti taga bario, iti nagbaetan dagiti ubbing ken nataengan. Ita adda pagannayasan a nakarot’ pannakaikalamiat ti panangidumduma iti pulí gapu iti politika ken dadduma pay a rason.

B. G., Alemania

Adda pay dadduma a nalatak a kita ti panangidumduma, ngem kadawyan a dida ituggod ti panagsagaba, panangilupitlupit, ken panagsisina a kas ti maituggod ti panangidumduma iti pulí. Gapuna, patienmi a rumbeng nga ikkanmi ti naisangsangayan a pannakataming daytoy naintiempuan a suheto.​—ED.

Kanta ti Billit Kabasbasak ti artikulo a “Kanta ti Billit​—Maysa Laeng a Napintas a Tono?” (Hunio 22, 1993) Maragsakanak a nakaammo nga adda gayam kaipapanan dagiti kanta ti billit, a nalabit nga ipagarup ti dadduma a basta makaay-ayo laeng nga uni. Pagyamanan iti panangipablaakyo kadagiti artikulo a mangibaga kadatayo maipapan kadagiti nakaskasdaaw a pinarsua ni Jehova.

A. P. C., Brazil

Nadakamat ti artikuloyo ti maysa a Britano a sientista a nakapaliiw nga adda sumagmamano a song thrush a nangtulad iti uni ti telepono iti kantada. Kasta met la ti kapadasanmi ken baketko. Itay napan a tawen, nangaramid dagiti song thrush iti umokda iti asideg ti pagtugawan idiay hardinmi. Tapno saanda a mapabutngan, nagsagawisiwkam met iti apagbiit iti umarngi iti kantada no kasta nga asitganmi ti umokda. Iti daytoy a primavera, kankantaen metten ti sumagmamano a song thrush ti kanta nga insagawisiwmi itay napan a tawen!

K. M., Alemania

Aborsion Agtawenak iti 14, ket tinulongannak dagiti seryeyo nga “Aborsion​—Ti Pannakabukel ken ti Panangkettel iti Biag” (Mayo 22, 1993) nga ad-adda a mangtarus iti kinapateg ita daytoy nga isyu. Impaganetgetna a nupay ti sikog ket adda iti bagi ti babai, saan la a ti bagina ti maapektaran iti aborsion. Sibibiagen ti sikog manipud pay pannakaiyinawna​—saan a maysa la a tipkel ti tisyu. Para kaniak, rumbeng a maiparit ti aborsion.

J. R. W., Estados Unidos

Nupay nabatad a kondenaren dagiti Kasuratan ti panagparegreg, ti “Agriingkayo!” ket di makinamin iti politika ken saan a kameng ti aniaman a grupo a mangilablaban iti pannakaiparit ti aborsion. Imbes ketdi, dagiti artikulomi ket nadisenio a mangtulong kadagiti tattao a mangiyaplikar iti Sao ti Dios iti biagda.​—ED.

Ubbing a Maup-upay Kayatko ti agyaman unay iti serye ti artikulo nga “Ubbing a Maup-upay​—Kasano a Matulongan Ida?” (Hulio 22, 1993) Nangipaay dayta iti makagunggona nga impormasion a mangtulong kadakami a nagannak a mangtarus no kasano a maupaymi met gayam iti kasta unay dagiti annakmi, gapu iti kurang a kapadasanmi wenno pannakaupay.

M. L. S., Italia

Ti lubong ket nagbalinen a lugar a pakaupayan uray payen dagiti ubbing. Masansan a malmaldaangak gapu kadagiti makasair a pangawag kaniak dagiti dadakkelko no nabuntog ti panaggargarawko. Masair unay ti riknak. Naawatak manipud kadagiti artikulo a manipud pay aldaw ti pannakaipasngayda molmoldienen dagiti nagannak dagiti annakda. No agbalinakto man a maysa a nagannak, agbalinakto a manangngaasi ken mannakirinnason kadagiti annakko.

N. K., Japan

Kasta unay ti panangapektar kaniak dagiti artikulo. Inabusonak ni nanangko. Dagiti artikulo impaawatda kaniak no apay a maupayak kadagiti dadduma a kasasaad ken no apay a mariknak a kasla awan serserbik ken kurang ti panagtalekko iti bagik. Talaga a tinulongandak nga agtalek ken Jehova. Nasakit pay la ti nakemko, ngem ammok nga inkarina a punasennanto dagiti dakes a pakalaglagipan iti puso ken isip. Makaliwliwa unay kaniak daytoy.

E. B., Inglaterra

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share