Manipud Managbasatayo
Kinaliday Pagyamanan iti seryeyo a “Kinaliday—Ti Maaramidanyo iti Dayta.” (Setiembre 22, 1993) Nagsangitak manipud iti umuna agingga iti maudi a panid. Pinaregtanak a mangusig kadagiti nabiit pay a rikriknak. Maamirisko itan a saan la a siak ti tao a naliday. Manginanamaak a maaramidko ti singasingyo ket maiyaplikarko dayta iti panagbiagko.
S. G., Estados Unidos
Kasta unay ti panangtukay kaniak dagidiay nga artikulo. Naagasanakon gapu iti nakaro unay a panagleddang ket nasarakak a ti kinaliday ti kangrunaan a kabusorko. Inaldaw a makidangdangadang ti malmaldaang a tao tapno malabanan daytoy a naulimek a mamapatay. Dagiti artikulo a kas iti daytoy ket gubuayan iti namnama.
G. P., Estados Unidos
Agtawenak iti 21 ken agserserbiak kas ministerial nga adipen iti maysa a kongregasion dagiti Saksi ni Jehova. Nagserbiak met kas maysa a payunir (amin-tiempo a managebanghelio). Ngem masansan a makidangdangadangak iti kinaliday. Dagiti artikuloyo ti sungbat kadagiti kararagko. Naayat ken manangandingay unay dagiti panglakayen iti kongregasion[mi], ngem naamirisko no kasano a mapasayaatko ti kasasaadko itan. Adun ti nagbalbaliw a kababalin ken tigtignayko.
R. P., Estados Unidos
Itay nabiit, napasarak ti panagleddaang. Nagrigat nga iyebkas no kasano ti kinadesperadok. Ngem mailadawanyo kadi ti pannakasorpresak idi naawatko ti Setiembre 22, 1993 nga Agriingkayo!? Uray la a diak nakasao! Nagyamanak ken Jehova ken dagus a binasak dayta. Pagyamanan iti nagsayaat-pannakaisuratna a serye nga addaan makagunggona a balakad.
C. F., Inglaterra
Dagiti Naiduma Unay a Pakasaritaan ni Ayat Nasdaawak idi nabasak ti maysa a padamag iti “Panangmatmat iti Lubong” a “Naiduma Unay a Pakasaritaan ni Ayat.” (Oktubre 22, 1993) Sakbay a nangrugiak a nakipagadal iti Biblia, agsursuratak kadagitoy a naiduma a pakasaritaaan ni ayat maipapan iti ayan-ayat dagiti homoseksual. Idi nabasak daytoy nga artikulo, kasta unay ti pannakaallukoy ti atensionko nga uray la pampanunotek pay laeng dagitoy a pakasaritaan, a no dadduma ket mangparnuayak manen iti panunotko kadagiti baro a pakasaritaan. Gapu iti panangilawlawagyo iti daytoy a suheto, nabalinak nga isardeng ti panangpampanunot kadagiti bambanag a kas kadagitoy.
S. S., Japan
Narelihiusuan a Pannakaidadanes Awanen ti pakasaritaan iti biag a kasta unay ti panangapektarna kaniak no di ti napauluan, “O Jehova, Pagtalinaedem a Matalek ti Balasitangko!” (Setiembre 22, 1993) Pinabilegna ti panunot ken pusok nga aniaman ti mapasarak tapno masalimetmetak ti kinatarnawko ken Jehova, kanayonto a saranayennak.
C. D., Estados Unidos
Imposible no dika maallukoy iti daytoy a pakasaritaan iti biag. Kuna ti balasitangmi a ni Esther a ti artikulo ket nagsayaat unay! Sapay koma ta tulongan ni Jehova dagiti annakmi a bumileg met iti pammati!
A. C., Francia
Pagyamanan iti artikuloyo a “Naballigi iti Sidong ti Ipapatay.” (Mayo 8, 1993) Tagtagiragsakenmi ti wayawaya ti relihion ditoy. Ngem ikarkararagko a matuladko koma ti ulidan dagitoy a kakabsat ken masalimetmetak ti kinatarnawko kadagiti amin a pakarigatan.
S. M., Brazil
Panangapresiar iti Ladawan Idi nakitak ti ladawan ti baro a lubong ti Dios iti akkub ti Oktubre 22, 1993 nga Agriingkayo!, naragsakanak unay. Miningmingmingak ti ladawan, nga ikarkararagko a mabalinakto koma ti agbiag sadiay. Kalpasan ti dua nga aldaw, miningmingak manen, ket kasta manen ti epektona. Pagyamanan unay iti kasta a nakaskasdaaw a pammaregta.
S. H., Estados Unidos
Diak am-ammo dagiti artist-yo, ngem ti gapuananda ket talaga a makaay-ayo! Dadduma kadagiti kapintasan pay laeng a ladawan a nakitak isu ti adda kadagiti libro ken publikasionyo. Maysaak met nga artist, ket talaga a maapresiarko ti napintas unay a gapuanan ti arte.
D. W., Estados Unidos