Biag a Diakto Kayat a Baliwan

PAGBABAWIAN ti adu a tao ti panangiturongda iti biagda. Mabalin a kunada: ‘No maisublik la koma ti napalabas, nagadu a banag ti kayatko a balbaliwan!’ Ngem iti panangut-utobko iti biagko, nupay adda rigrigatna, daytat’ biag a diakto kayat a baliwan.

Pinadakkeldak dagiti nagannakko kas maysa a Saksi ni Jehova ket naipasagepsep iti pusok dagiti linteg ti Dios manipud kinamaladagak. (2 Timoteo 3:15) Diak malagip a naglanganak idi a timmabuno kadagiti gimong ken kumbension dagiti Saksi ni Jehova. Ken kas maysa a balasitang, nakikaduaak met kadagiti nataengan a Saksi iti panagbalaybalay tapno tulongan dagiti tattao a makasursuro maipapan iti namnama ti Biblia a biag nga awan inggana iti paraiso a daga iti sidong ti panagturay ti Pagarian ti Dios. (Mateo 24:14) Malagipko pay laeng idi agtawenak iti lima ken mangituktukonak iti bokleta a napauluan The Kingdom, the Hope of the World kadagiti sabsabali.

Damo a naammuan dagiti nagannakko ti kinapudno maipapan ti Pagarian ti Dios idi 1917. Nupay mannakimisada, nabigbigda ti kinapudno iti maysa a palawag idiay Bridgeton, New Jersey, E.U.A., nga impaay ti maysa nga agdaldaliasat a pannakabagi ti Watchtower Society. Dimngeg met ni lolok iti daydi a palawag, ket nakumbinsir met a ti nangngeganna ti kinapudno. Ket idi agtawenakon iti 14, iti maysa a kumbension dagiti Saksi ni Jehova sadi Detroit, Michigan, nagpabautisarak a mangisimbolo nga indedikarkon ti biagko ken Jehova.

Kadagidi a tawen, naangay ti linawas a panaggigimongmi agpaay iti panagadal iti Biblia iti salasmi. Kamaudiananna, nakagatangda iti maysa a tiendaan a napagbalin a Kingdom Hall. Kadagidi a tiempo, mabilbilang laeng dagiti Kingdom Hall. Ngem ita, iti sangalubongan, pinullo a ribu dagitan a pagtataripnongan ti nasurok a 70,000 a kongregasion dagiti Saksi ni Jehova.

Panangrugi iti Amin-Tiempo a Serbisio

Rinugian ni nanangko ti karerana kas ministro iti amin-tiempo idi 1939 ket nagtultuloy a kasta agingga iti ipapatayna idi agtawen iti 85. Nangrugikam ken manongko a Dick iti karerami iti amin-tiempo a serbisio idi Abril 1, 1941, idi kangitingitan ti Gubat Sangalubongan II idiay Europa ken nasaknap ti pannakaidadanes dagiti Saksi ni Jehova gapu iti neutral a takdermi maipanggep iti politika.

Tallo kadagiti agkabanuag a lallaki a Saksi idi iti kongregasionmi ti nasentensiaan iti lima a tawen iti pagbaludan gapu iti neutralidadda. Anian a makaparegta a makita a sibibiag pay la ti dua kadagidi a lallaki ken agserserbida pay laeng kas panglakayen iti kongregasion! Nagserbi idi ni manongko idiay Brooklyn Bethel, ti sangalubongan a hedkuarter dagiti Saksi ni Jehova, sadi Nueva York, ket agserserbi pay laeng kas maysa a panglakayen iti ilimi a Millville, New Jersey.

Nakarigrigat kadagiti Saksi ni Jehova dagidi a tawen ti gubat idiay Estados Unidos, kas iti sadinoman a lugar. Masansan nga adda panagderraaw. Napapanaw dagiti ubbing manipud eskuelaan. (Kitaenyo ti Hulio 22, 1993 nga Agriingkayo! maipapan iti pakasaritaan ti biag ni Lillian Gobitas Klose.) Naibalud ti rinibu kadagiti naespirituan a kakabsatmi a lallaki, isu a dakami a babbai ti nagannong iti nadumaduma a rebbengen iti kongregasion. Isu a nupay ubingak pay la idi, nagbalinak nga adipen iti literatura. Babaen iti tulong ni Jehova, nalasatanmi dagiti narigat a tawtawen ti gubat, ket idi nawayawayaanen dagiti kakabsat a lallaki manipud iti pagbaludan, rimmang-ayen dagiti bambanag.

Iti daydi a tiempo a simmarungkar iti kongregasionmi ni Lyman Swingle, manipud Bethel. Pinaregtanak a mapan idiay Brooklyn ken tumulong iti panangsaranay kadagiti padami a Saksi idiay Europa kalpasan ti Gubat Sangalubongan II. Isu nga idi Marso 1948, napanak idiay Brooklyn.

Naragsak a Tawtawen iti Kabbaro a Kongregasion

Naitimpuyogak iti kabbaro a kongregasion ti Brooklyn Center. Daydi ti damo a kongregasion a nabuangay idiay Siudad ti Nueva York ken kadagiti kabangibangna sakbay ti Gubat Sangalubongan I, nupay saan a kasta ti naganna idi. Masarakan dayta idi idiay Brooklyn Heights. Ngem idi simmangpetak idiay Brooklyn Center idi 1948, adda daytan iti pagsabatan ti 5th Avenue ken 8th Avenue idiay Brooklyn. Iti ngangngani 30 a tawen, dayta a maab-abangan a disso ti nagserbi kas paggigimonganmi, agingga a nagatang ti maysa a kabbaro a patakder iti asidegna met laeng.

Nakalalagip daydi damok nga aldaw a nangasaba idiay Brooklyn​—idiay Henry Street. Medio maikawaak a mangasaba iti dakkel nga ili. Ngem di nagbayag, naam-ammok ti maysa a naasawaanen nga agtutubo a babai a nakaipaimaak iti literatura ti Biblia ken sitatallugod a makiinnadal iti Biblia. Idi agangay, isut’ nagbalin a dedikado nga adipen ni Jehova, kas ti dua nga annakna. Ti barona a ni Arthur Iannone ti madama nga agserserbi idiay Brooklyn Bethel ken ti asawana a ni Linda, agraman ti baroda ken manugangda.

Nalawa ken nabunga ti teritoria a pangasabaan ti kongregasionmi. Babaen iti tulong ni Jehova, naimatangak ti adu nga inyadalak iti Biblia a nakaammo iti kinapudno ken nagpabautisar. Agingga ita nga aldaw, dadduma ti agserserbin kas ministro iti amin-tiempo iti pagilianmi. Daddumat’ misioneron iti adayo a luglugar. Daddumat’ panglakayenen iti kongregasion. Ket adu ti nagserbin iti dadduma pay a pribilehio kas matalek a manangiwaragawag ti naimbag a damag ti Pagarian ti Dios.

Nakaskasdaaw ti irarang-ay. Iti dati a maymaysa a kongregasion iti Siudad ti Nueva York ken iti kabangibangna, adda ngangnganin 400 idiay Siudad laeng ti Nueva York. Anian a nakaay-ayat a lagipen ti pannakiramanko iti dadduma iti daytoy nga ilalawa!

Rimmang-ay ti Interes Dagiti Pranses ti Pagsasaoda

Idi dekada ’60, adu ti nasarakanmi a taga Haiti a Pranses ti pagsasaoda iti teritoria ti kongregasionmi. Saanda unay a makapag-Ingles wenno pulos a dida makapag-Ingles. Maysa a karit dayta. Kasanomi a matulongan ida a makaammo nga ad-adda pay maipapan iti Biblia? Diak ammo ti agsao iti Pranses, ngem babaen iti Ingles a kopia ti kangrunaan a katulongan a libro ti Biblia iti maysa nga imak ken ti Pranses a patarus dayta a libro iti sabali nga imak, nabaelak nga indauluan dagiti panagadal iti Biblia.

Nupay kasta, awan pay la ti gimong iti Pranses a mangtulong kadagitoy a tattao tapno rumang-ayda iti naespirituan. Isu a no adda asinoman a misionero a Saksi a sumarungkar idiay Brooklyn ken makasao iti Pranses, dagus a makiddaw ti tulongna. Maysa kadagiti immuna nga immandingay kadakami isu ni Nicolas Brisart, ti coordinator ti Komite ti Sanga idiay Guadeloupe. Isut’ damo a nagpalawag iti Pranses iti publiko idiay balay ti Kabsat Bertha Luisdon, a matalek pay laeng nga agserserbi ken Jehova. Duapulo ket pito ti timmabuno.

Kaskasdi, idi a tiempo, malaksid iti Español, awanen ti ganggannaet ti pagsasaona a kongregasion idiay Siudad ti Nueva York. Isu a narigat a panunoten ti pannakaipasdek ti maysa a talaga a Pranses ti pagsasaona a kongregasion. Kinapudnona, ad-adda nga awan ti pangnamnamaan idi impakaammo kadakami ti agdaldaliasat a manangaywan nga adda pagannurotan idi a tiempo a maidagadag kadagiti tattao nga agnanaed iti daytoy a pagilian a sursuruenda ti Ingles.

Ni Kabsat Fred W. Franz, nga idi agangay ket nagserbi kas presidente ti Watch Tower Society ket gubuayan iti pammaregta. Kinunana: “No pagayatan ni Jehova, Mary, addanto ti Kongregasion dagiti Pranses.” Makaparegta met ni Kabsat Harry Peloyan, ti mangidaulo a manangaywan ti Kongregasion ti Brooklyn Center. Kinunana a kadagiti rabii a di mausar ti Kingdom Hall, mabalinmi nga usaren dayta iti impormal a Panagadal iti Libro ti Kongregasion ken miting publiko la ketdi no adda sangaili a makapagsao iti Pranses.

Iti daydi a tiempo, adun ti bautisado a kakabsat a lallaki manipud Haiti nga immakar ditoy, ngem awan pay lat’ aduan kapadasan a mangidaulo iti pagsasao a Pranses. Ngem naammuan ni Kabsat Timothy Galfas, a nageskuela idiay Paris ken maysan a kameng ti pamilia ti Brooklyn Bethel ti kasasaadmi. Kada Sabado kalpasan ti panagtrabahona idiay Bethel, rummuar, ket birukenmi dagiti kakabsat a lallaki ken babbai a taga Haiti nga agnanaed ditoy ngem dida ammo no sadino ti pakitimpuyoganda.

Di nagbayag, ag-40 a tattao ti makitimtimpuyogen kadakami. Kiniddawmi iti manangaywan iti sirkito nga agsurat iti Sosiedad tapno anamonganda ti pormal a Panagadal iti Libro ti Kongregasion iti Pranses. Anian a yamanmi idi napatgan daytoy a kiddaw! Kalpasanna, nakaawatkam met iti pammalubos a maaddaan iti regular a palawag publiko ken linawas a Panagadal iti Pagwanawanan.

Ti Damo a Kongregasion Dagiti Pranses

Idi Disiembre 1, 1967, naawatmi ti pannakaanamong ti pannakaipasdek ti Pranses-ti-pagsasaona a kongregasion, ti damo idiay Estados Unidos. Ti met la Kingdom Hall dagiti kongregasion ti Brooklyn Center ken Prospect ti usarenna. Anian a ragsakmi idi! Pagaammomi nga ad-adda a rumang-ay iti naespirituan dagiti amin iti pagsasao a maawatanda. Maapresiar met unay ti suporta dagiti kakabsat kas da Harry Peloyan, George Haddad, ken Carlos Quiles, a nangbukel iti komite ti serbisio ti Brooklyn Center iti rigrigatmi kadagidi a tawtawen.

Nagpartak ti iyaadumi. Di nagbayag, nabuangayen dagiti baro a kongregasion dagiti Pranses idiay Manhattan, Queens, ken Nyack, Nueva York. Timmulong iti daytoy nga ilalawa da Jeff Keltz ken Tom Cecil ti Brooklyn Bethel. Nagserbi ni Kabsat Keltz kas manangaywan ti sirkitomi, ken ni Kabsat Cecil iti Komite ti Kumbension Distritomi. Timmulong met dagiti sabsabali, kas dagiti misionero a gapu iti sakit, masapul nga agsublida idiay Estados Unidos manipud kadagiti pagilian a Pranses ti pagsasaoda. Nagdakkel unay ti naitulongda! Maysa kadakuada isu ni Stanley Boggus, nga agserserbi kas mangidaulo a manangaywan ken kasandi a manangaywan iti sirkito.

Anian a nagragsak a tiempo a makita a rimmang-ay ti bassit a grupo dagiti Pranses idiay 5th Avenue ken 8th Street iti pinulpullo a kongregasion ken duan a sirkito! Kinapudnona, idi Abril 1970 ti damo a pannakaangay ti asamblea sirkitomi iti Pranses. Ni Kabsat Nathan H. Knorr, ti presidente idi ti Watch Tower Society ti nagpalawag kadakami iti rabii ti Biernes ken pinaregtanakam a naimbag. Iti dayta a kalgaw, inangaymi met ti damo a kumbension distritomi iti maysa a palapala iti sirok dagiti bleacher idiay Roosevelt Stadium sadi Jersey City, New Jersey. Nadagaang ken natapuk idi, ngem naragsak ti nasurok a 200 a timmabuno a dimngeg iti intero a programa, agraman iti drama, iti Pranses.

Makaparagsak met idi 1986, a napalubosankam a mangusar iti Assembly Hall dagiti Saksi ni Jehova idiay Jersey City agpaay iti kumbension distritomi. Iti maysa a kumbension iti Pranses itay napalabas a tawen, 4,506 ti timmabuno ket 101 ti nabautisaran. Kabayatanna, naangay met idiay Florida ti sabali pay a kumbension iti Pranses.

Dagiti Matalek a Kakuarto

Sabali pay a paset ti biagko isut’ naragsak a pannakikaduak kadagiti kakabsat a babbai nga amindat’ agserserbi idi iti amin-tiempo iti maysa nga apartment idiay Brooklyn. Addan idiay Bethel ti immuna a dua (da Rose Lewis Peloyan ken Madelyn Murdock Wildman). Kalpasanna, ti pay dua (da Lila Rogers Molohan ken Margaret Stelmah) ket nagbalin met a kameng ti pamilia ti Bethel. Dua pay a sabsabali (da Barbara Repasky Forbes ken Virginia Burris Beltramelli) ti nageskuela idiay Watchtower Bible School of Gilead ket agserserbida pay laeng idiay Guatemala ken Uruguay.

Kas agkakabsat, kanayon nga adda tiempo a pagsasaritaanmi ti maysa a Nainkasuratan a teksto a pangirugi iti aldawmi, sakam mapan iti panggedanmi ken iti ministerio. Agawidkam iti rabii a nabannog ken mabisin ngem naragsak! Adu dagiti makapabileg a kapadasan a pagririnnanudanmi! Kas pangarigan, iti maysa a gundaway, inyadalak ti maysa a balasang, ni Elisa Beumont Farina, a mangipapilit a ti panagadalna ket maangay iti 10:00 t.r. Napartak ti irarang-ayna. Iti damo a panangikuyogko kenkuana iti ministerio, kinunana: “Dika ipappapan a kanayon a mangasabaak!” Ngem isut’ nagbalin a ministro iti amin a tiempo ket idi agangay, nageskuela idiay Gilead, ken nagserbi iti adu a tawen idiay Ecuador. Isut’ agserserbi pay laeng iti amin a tiempo idiay Trenton, New Jersey.

Dadduma kadagiti kakuartok ket naaddaan iti annak a nangapresiar ken nagserbi met ken Jehova. Itay napan a tawen, nakiasawa ti balasang (ni Jodi Robertson Sakima) ti maysa kadagiti dati a kakuartok (ni Virginia Hendee Robertson) ken agserserbi itan a kadua ni lakayna idiay Brooklyn Bethel.

Kadagiti nagbalin a kakuartok, a ti bilangda ket nasurok a 20, maragsakanak a mangibaga nga amindat’ nagtalinaed a matalek ken Jehova, ket adu kadakuada ti agserserbi pay laeng iti amin-tiempo a serbisio.

Panangtagiragsakko iti Sangalubongan a Pamiliami

Maysa a gubuayan iti rag-o kaniak a nakaam-ammo iti adu a Saksi iti dadduma a lugar. Kas pangarigan, yantangay agtataengkami iti asideg ti hedkuarter ti Sosiedad, naaddaankam iti pribilehio a makilangen kadagiti estudiante ti Gilead nga eskuelaan dagiti misionero, a masarakan idi idiay Brooklyn Bethel.

Dua nga estudiante, da Guenter Buschbeck, ti madama nga agserserbi iti sanga idiay Austria, ken ni Willi Konstanty, nga agserserbi idiay sanga ti Alemania, ti naitimpuyog iti Kongregasion ti Brooklyn Center bayat nga ages-eskuelada idiay Gilead. Anian a gubuayan ida iti pammaregta! Addaanda iti positibo nga impluensia kadagiti kakuartok nga idi agangay ket nagbalin met a kalatda ti serbisio ti Gilead.

Namin-adu a daras a naaddaanak iti pribilehio nga isaknap ti pannakigayyemko iti sangalubongan a pamilia babaen iti panagdaliasatko iti ballasiw taaw. Natabunuak dagiti kumbension internasional ket nakitak manen, kadagiti nakaidestinuanda, dagiti adu a naggraduar iti Gilead a datin nga am-ammok.

Maysa a Makapnek a Biag

No mennamennaek ti biagko, maikunak a nagsayaat dayta​—maysa a naragsak a biag a napnot’ bendision. Nupay naaddaanak iti adu a kadawyan a parikut a rumsua iti daytoy a sistema dagiti bambanag, awan a pulos ti panggapuak a pagbabawian ti napalabas wenno tapno isardeng ti nasudi a pribilehio ti amin-tiempo a serbisio.

Idi ubingak pay, impasagepsep kaniak ni nanang dagiti sasao idiay Salmo 126:5, 6: “Dagiti agmula kadagiti lulua aganidanto iti ragsak. Ti mapan ket agsangsangit nga agawit iti bin-i nga imulana, awan duadua nga agawidto a siraragsak, nga ikuyogna dagiti binettekna.” Dayta a teksto ti agserserbi pay laeng a maysa a giya kaniak. Aniaman dagidi a problema, tinulongannak ni Jehova a nangrisut kadakuada ken salimetmetan dayta a rag-o.

Ti biagko ket biag a diakto kayat a baliwan. Diak pagbabawian ti panangipaayko iti 53 a tawen ken Jehova iti amin-tiempo a serbisio. Segseggaak ti agtultuloy a panagserbik kenkuana iti agnanayon idiay baro a lubongna.​—Kas insalaysay ni Mary Kendall.

[Ladawan iti panid 16]

Ni Mary Kendall