Manipud Managbasatayo
Dagiti Piesta Apaman a nagpatingga ti serye a “Dagiti Piesta—No Apay Di Selebraran Ida Dagiti Dadduma nga Ubbing” iti Nobiembre 22, 1993, nga Agriingkayo!, uray la a nagarubos dagiti lua ti ragsak iti pingpingko. Napadakkelak kas maysa a Saksi ni Jehova ket addaanak iti umasping a rikna a kas iti kaaduan kadagiti nadakamat nga ubbing. Kayatko a komendaran dagiti amin nga ubbing gapu ta nagsayaatda a paguadan! Kas maysa a nagannak, naparegtaak a nakaammo nga adu nga ubbing ti mangparparagsak ken Jehova nupay naganus pay laeng ti tawenda.
T. K., Estados Unidos
Agtawenak iti siam, ket diak pulos naammuan a ti Halloween ket nagdakes ken makarimon. Diak marikna a mapapaidamanak.
A. C., Estados Unidos
Idi ubingak pay, segseggaak ti Christmas ken Easter. Ngem ita naawatakon a pagano dagitoy a piesta ket awan serserbina ti panangalagad iti dayta a tradision. Kompleto ken nalaka a maawatan ti naited a panangilawlawag.
S. L. P., Alemania
Napadakkelak kas maysa a Saksi manipud idi agtawenak pay laeng iti 6, ket ita addaak kadagiti nasapa a 30’s. Impagarup ti adu a tattao a dakam kadagiti kakabsatko a lallaki, ken babbai ket mapapaidaman. Inlawlawagko kadakuada nga umaw-awatkam iti regalo iti intero a tawen ken siwayawaya nga ipapaay dagiti nagannakmi ti panawen ken bagida kadakami. Adu a bambanag ti ar-aramidenmi a sangsangkamaysa. Kanayon met nga idauluan ni tatangko ti linawas a panagadalmi kas pamilia iti Biblia. Dayta ti kasayaatan a naespirituan a sagut! Diak pulos nagpasugnod a di nangselebrar kadagiti piesta.
D. Y., Estados Unidos
Agtawenak iti 14 ket maikunak met ti kas iti naisalaysayyo. Agyamanak iti pannakaipablaak daytoy nga artikulo. Pinabilegnak a nakaammo a dadduma nga agtutubo ti mangitantandudo iti kinapudno.
C. A., Estados Unidos
Diak marikna a maikapkapisak iti aniaman babaen iti diak panangselebrar kadagiti piesta. Regregaluan ken ik-ikkannak ti pamiliak iti kuarta no kasapulak dayta. Addaanak kadagiti ay-ayam a tagtagiragsaken dagiti ubbing a kataebko [12].
L. C., Estados Unidos
Daytoy nga artikulo ti talaga a sungbat ti adu a kararagko. Talaga a saan a maawatan ti maysa dagiti rag-o ken danag ti panangpadakkel iti ubing agingga a ti dua a napnuan-lua a mata ti kumita kenka a kaslattay damdamagenna no apay nga adda nangrabak kenkuana. Ti balasitangmi ket adda iti kindergarten ita a tawen, ket nupay nagsirarakkami maipapan kadagiti piesta, narigatna pay laeng a maawatan dayta. Rinabii nga ikararaganmi isuna tapno agtalinaed a nabileg ken natured idiay eskuelaan. Idi kuan dimteng dagiti artikulo ti Agriingkayo! Makabasan ta isut’ adda iti maikapito-a-grado, isu a basta intedko tapno basaenna. Timmured ti pakinakemna bayat a binasana dagiti sasao ti dadduma nga ubbing ken nakitana dagiti ladawanda. Kabigatanna, inikkanna ti maestrana iti maysa a kopia.
G. M., Estados Unidos
Sursuronendak dagiti dadduma nga ubbing idiay eskuelaan gapu ta diak selselebraran dagiti piesta, isu nga impa-xerox-ko ti magasin ket inikkak ti dadduma kadakuada. Masiguradok a didakton sursuronen gapu ta ammodan a diak mapapaidaman.
K. H., Estados Unidos
Panaglugan iti Bus No malidlidayak, no dadduma agdaitak ken dumngeg kadagiti cassette ti Awake! Talaga a ti artikulo a “Panagbiahe ti Bus a Mapan Idiay Tengnga ti Australia” liniwliwanak. (Hunio 8, 1993) Kasla addaak sadiay, a makiramraman iti rag-o ken ragsak a tinagiragsak dagitoy a biahero. Pagyamanan unay.
A. W., Estados Unidos