Dagiti Tumtumpaw nga Isla ti Danaw Titicaca
BABAEN TI KORESPONSAL TI AGRIINGKAYO! IDIAY PERU
DAGITI tumtumpaw nga isla? Wen, dagiti isla iti daytoy a naisangsangayan a danaw iti Sud America tumtumpawda. Ket agnanaed dagiti tattao kadakuada.
Ti Danaw Titicaca, a beddeng ti Peru iti laud ken Bolivia iti daya, isut’ kangatuan a danaw iti lubong a mabalin a lasaten dagiti dadakkel a barko. Naisaad iti 3,810 metro iti ngatuen ti patas ti baybay, nayunnat iti 190 kilometro nga agpaamianan a laud ken agpaabagatan a daya ket nasurok a 80 kilometro ti kalawaan a pasetna.
Dadduma kadagiti adu nga isla ti Danaw Titicaca ti tumtumpaw nga ikamen iti nagango a totora, maysa a kasla runo a papiro nga agtubtubo kadagiti ababaw a paset ti danaw. Agtubo dagiti runo iti tukok ti danaw, lasatenda dagiti adu a metro a danum, ket tumayokda iti sumagmamano a metro iti ngato ti rabaw ti danum. Tapno maaramid ti isla, bayat a nakaramut pay laeng dagiti runo iti tukok ti danaw, mapilkoda ken malagalaga tapno maaramid ti kasla garami a kadsaaran, wenno basar, a nakasaad iti rabaw ti danum. Kalpasanna mapekpek dagiti runo iti pitak ket mapalagda babaen iti kanayonan a napukan a runo. Agnaed dagiti umili kadagiti kalapaw a runo a naibangon kadagiti tumtumpaw nga isla a runo.
Kuna ti The Encyclopædia Britannica a nabayagen nga agnanaed dagiti tattao kadagitoy nga isla. Kunana pay: “Dagiti agnanaed iti danaw mangaramidda kadagiti nalatak a balsada—dagiti bilog a naaramid kadagiti binettek a nagango a runo a kasla ti pisi a bulan a papiro a bilog a nailadawan kadagiti monumento ti kadaanan nga Egipto.”
Nabiit pay, nakagun-od dagiti Saksi ni Jehova ti maysa a lantsa [a pagluganan] a mapan mangasaba kadagiti tattao iti isla ti Titicaca. Ti lantsa ket paandaren ti maysa a motor ket makargana ti 16 a tattao. No mapan dagiti Saksi kadagiti pagtaengan kadagitoy nga isla a naaramid iti runo, kunada nga adda bassit panaggaraw ti rabaw ti badbaddekenda. Nakaragragsak ta, ti mensahe ti Pagarian ti Dios ket makagtengen uray kadagiti tattao kadagitoy nga adayo a tumtumpaw nga isla!