Manipud Managbasatayo
Nataenganen a Nagannak Naidalit iti pagiddaan ti katugangak-a-lalaki ket maiduol amin a masapulna. Yantangay mapaksuyan ti panunot ken bagik, pasaray maibusanak iti anus saak makaisawang kadagiti banag a pagbabawyakto met laeng. Isu nga idi nabasak dagiti artikulo maipapan “Ti Karit ti Panangaywan Kadagiti Nataenganen a Nagannaktayo,” (Pebrero 8, 1994), nalapunos unay ti riknak! Agyamanak unay kadakayo iti panangisaganayo iti daytoy a material. Dagiti artikulo ti mangpabilegto kaniak bayat nga itultuloyko nga aramiden dagiti annongek.
T. H., Japan
Agtawenak iti 16, ket kasapulan itan ni apongko a baket iti 24-oras a panangasikaso. Sangagasut innem a pulo a kilometro ti kaadayo ti pagnanaedanna. Isu a marigatan unay ti pamiliak. Agyamanak ngarud kadagiti artikuloyo. Makapabilegda unay.
M. R., Estados Unidos
Agtartrabahoak iti para-kagimongan nga ahensia a mangipapaay iti serbisio kadagidiay mangay-aywan iti nataenganen a nagannak. Masansan a pagkedkedan dagiti katrabahuak ti aniaman a naibasar-Biblia a literatura nga itukonko kadakuada. Nupay kasta, iti nabiit pay a miting[mi], inikkak ti tunggal maysa iti kopia dayta nga isyu. Inawat ti tunggal maysa! Nakitak ti maysa a katrabahuak a nangbasa iti dayta idiay lamisaanna.
B. H., Estados Unidos
Insingasingyo a direkta a kiddawen iti maysa kadagiti nainlasagan a kakabsat a lallaki ken babbai a tumulong iti panangaywan. Impagarupko idi nga awan ti agkedked no makiddaw dayta [kenkuana]. Ay ket, kayatko nga ilawlawag a nasuroken a sangapulo a tawen a siak ti mangay-aywan kadagiti nagannakko, ket no kiddawek kadagiti kakabsatko a tumulongda, dida ipaay dayta. Agnanaedtayo iti maysa a nalamiis, awan panangisakitna a lubong. Sapay koma ta maamiris dagiti tattao a ti panangaywan kadagiti nagannak ket saan a trabaho—no di ket pribilehio!
M. D., Estados Unidos
Kuna dagiti Kasuratan a ti panangaywan kadagiti miembro ti pamilia ket maysa nga obligasion dagiti Kristiano. “Pudno unay no ti asinoman dina taraonan dagidiay bukodna, ken nangnangruna kadagidiay kameng ti sangakabbalayanna, pinaglikudanna ti pammati.” (1 Timoteo 5:8)—ED.
Talaga nga apresiarek ti balakad nga ipaayan iti tiempo ti asawam ken bagim. Naliwayak nga inaramid daytoy iti napalabas, gapu ta pagarupko a maipangpangruna ti tiempo ti panangaywanko kadagiti nagannakmi ngem iti asawak—wenno panawen a maipaay iti bagik. Nupay kasta, naamirisko ti kinanainsiriban daytoy a balakad, ket ikagumaak nga agbalinto a natimtimbeng iti daytoy a banag.
M. O., Estados Unidos
Yaakar Agtawenak iti 14 ket kayatko ti agyaman kadakayo iti artikulo nga “Agimtuod Dagiti Agtutubo . . . Apay a Masapul nga Umakarkami?” (Pebrero 22, 1994) Idi agtawenak iti siam, nakiddaw ken tatangko, maysa a panglakayen iti kongregasion, nga umakar iti maysa a kabangibang a kongregasion. Nasurok nga uppat a tawenen ti kaaddami ditoy ket nasursuromin nga ipateg unay daytoy a kongregasion. Nakiddaw manen ita ken tatangko nga umakar iti sabali a kongregasion. Idi aldaw a nakiddaw ti yaakarmi, naawatmi daytoy a magasin. Tinulongannakam ken adingko a makasaranget a nasaysayaat. Maysa a pribilehio ti pannakayakarmi, ngem nagrigat a panawan dagidiay nasursuromin nga ayaten.
L. B., Inglaterra
Rasismo Ita la a nagundawayak a binasa ti Agosto 22, 1993 a ruar nga addaan serye ti “Agkaykaysanto Pay Aya Amin a Rasa?” Nasdaawak ken padayawak ti nasin-aw a pannakatarusyo iti daytoy komplikado a parikut. Kalkalpasko ti maysa a pangkolehio a kurso iti historia. Ngem iti siam laeng a panid, nangipaay ti magasinyo iti naurnos a historia, pannakailawlawag, ken remedio! Inartapanna amin nga intero a semestre ti kolehio a napnuan libro ken bitla a mangisuro.
R. J., Estados Unidos