Agurokkay Kadi?

NAPIGSA kadit’ panagurokyo? Dadduma a tattao napigsat’ panagurokda ket dida pay ketdi mapuotan dayta. Gapuna, dida ammo no apay a mariingda nga agkakapuy ken maul-ulaw. Ti sakitda ket pagaammo kas apnea iti pannaturog. Bayat a maturog ti tao nga addaan iti kastoy a sakit, lumukay dagiti masel ti karabukob a mamagtalinaed kadagiti pagangsan a nakalukat agingga nga agserra ti pagangsan. Mabalin nga agmaysa a minuto ti lumabas sakbay a ti tao ket makaanges ken makariing iti apagbiit. Kaaduan kadagiti agsagaba iti apnea dida ammo a masinga ti pannaturogda. Ti kakaisuna a pakaammuan isu ti kakuartona a masansan a mariing gapu iti panagurok[na]. Patien dagiti eksperto a ti apnea ket makaituggod kadagiti aksidente iti panagmaneho ken panagtrabaho ken pakaigapuan ti pannaka-istrok ken pannakaatake ti puso.

Adda kadi remedio? Ibalakad ti Complete Home Medical Guide (Columbia University College of Physicians and Surgeons): “Ad-adu iti 20 a daras nga apektado dagiti lallaki ngem dagiti babbai. Nalukmeg ti nasurok a kagudua kadagiti agsagsagaba, nga ad-adda a mangikompromiso iti normal a panagtaray ti angin. Gapuna, ti panangkissay iti dagsen, ti maysa a napateg a paset ti panangagas.” Isingasing ti isu met la a gubuayan a mabalin a kasapulan ti maysa nga operasion a mangkissay iti pakasingaan iti pagangsan kadagiti nakaro a kaso.