Manipud Managbasatayo
Doble a Panagbiag Kayatko ti agyaman kadakayo iti artikulo nga “Agimtuod Dagiti Agtutubo . . . Doble a Panagbiag—Asinot’ Rumbeng a Pagipudnuan?” (Enero 8, 1994) Idi agtawenak iti 16, nangrugiak a naginum, nagsigarilio, ken naki-date a di naam-ammuan dagiti dadakkelko. Talaga a tinulongannak dagitoy nga artikulo a makaamiris nga awan ti mailimed manipud kadagiti sisisiput a mata ti Dios.
T. T., Fiji
Pananggun-od iti Kuarta Kabasbasak dagiti serye “Ti Pananggun-od iti Kuarta—Sadinot’ Pagtungpalanna?” (Marso 22, 1994) Nangipaay dagiti artikulo iti ekselente a pannakailawlawag ti suheto. Diak ammo a mapaspasamak pay laeng dagita a nakalkaldaang a kasasaad kadagiti immakar a trabahador ken dagiti pamiliada. Maasianak unay kadakuada.
G. M., Estados Unidos
Umiso ti panangiladawanyo iti nakapimpiman a kasasaad idiay pagtrabahuan ken ti nababa a sueldo. Nakalkaldaang nga ibaga no kasano ti panangmatmat ti dadduma kadagitoy a trabahador—saan a kas tattao nga addaan rikrikna a kas kadatayo. Wen, “ti tao inturayanna ti tao a maipaay iti pagdaksanna”!—Eclesiastes 8:9.
K. V., Estados Unidos
Kanser ti Suso Iti seryeyo a “Kanser ti Suso—Pagam-amkan ti Isuamin a Babbai” (Abril 8, 1994), awan ti nadakamatyo maipapan kadagiti panagadal a mangipamatmat a ti panagpasuso mabalin a kissayanna ti posibilidad ti panagkanser ti suso.
B. J. M., Alemania
Ladingitenmi a dimi inraman daytoy. Nupay kasta, dayta a banag ket nailawlawag iti artikulo a “Ti Pagsayaatan ti Gatas ti Ina,” a nagparang iti ruarmi a Setiembre 22, 1993.—ED.
Binusbosko ti sumagmamano a tiempo iti maysa a Kristiano a kabsat a babai a naikkat ti susona. Isut’ agtawen iti 62 ken malmaldaang unay. Malagipko a diak ammo no aniat’ ibagak idi kas pangsaranay. Gapu kadagiti komento a dinakamatyo kadagiti artikulo, maipaayko itan kenkuana ti umno a panangsaranay.
D. H., Estados Unidos
Agdua tawen itan manipud idi naoperaak gapu iti kanser ti suso. Tapno maammuak ti impormasion maipapan iti suheto, gimmatangak iti encyclopedia ti medisina, ngem bassit laeng ti naammuak. Ti artikuloyo, nupay kasta, ti nangsungbat kadagiti saludsodko. Talaga a liniwliwadak.
M. G., Italia
Siam a tawenen ti napalabas manipud idi natay ni nanangko gapu iti kanser ti suso. Siam la idi ti tawenko, ket diak pay la idi maawatan ti napagteng kenkuana. Talaga a nakasangitak idi binasak dagidiay nga artikulo sa ket nalagipko isuna. Pagyamanan unay iti pannakaawat nga impaayyo kaniak iti maud-udi a sumagmamano a tawen ti panagbiagna.
K. F., Estados Unidos
Dagiti Biktima ti AIDS Nabasak ti artikuloyo a “Panangtulong Kadagidiay Addaan iti AIDS.” (Marso 22, 1994) Positibo nga addaanak iti HIV ket naamirisko a narigat unay a maaklon ti artikulo. Nagsangit unay ti pamiliak gapu iti saem ken ti rikrikna ti pannakailaksid.
B. J., Estados Unidos
Makipagladingitkami kadagiti amin nga agsagsagaba iti nagtetengngaanmi. Inkagumaan ti artikulomi ti agbalin a natimbeng kadagiti kasapulanda agraman dagiti pakaseknan ti kaaduan. Yantangay ti Linteg ti Dios iti Israel ti nangipaalagad iti nainget a pamuspusan tapno masalakniban ti salun-at ti intero a nasion, mariknami a mayanatup nga isingasing dagiti nainkalintegan a panagannad iti salun-at. (Idiligyo ti Levitico 13:21, 33.) Bigbigenmi a “saan a masapul nga agamak unay ti maysa a makipulapol kadagiti tattao nga addaan AIDS.” Nupay kasta, adu ti agamak latta agpapan kadagiti pammasiguro dagiti doktor. Pinaregtami ngarud a pagraeman dagiti agsagsagaba iti AIDS ti rikrikna ti sabsabali a mabalin nga alusiisen iti panangipakitada iti pisikal a kinadungngo. No ania ti kayat dagiti di naakaran a tattao iti daytoy a banag ket personal a desisionda. Iti aniaman a kasasaad, amin a Kristiano rumbeng nga addaanda iti naimpusuan a tarigagay a mangipakita iti kinamanangaasi ken pannakipagrikna kadagiti agsagsagaba.—ED.
Naparegtaak unay iti pannakaipaay ti kasta a makipagrikna ken nagsayaat-pannakaisuratna nga artikulo. Nangnangruna nga apresiarek dagiti singasing a nupay rumbeng a yaplikartayo “dagiti sapasap a panagannad,” rumbeng nga ipakitatay met ti pannakipagrikna ken mangipaaytayo iti mangisakit a tulong.
M. H., Estados Unidos