Yelo a Linnaaw​—Asinot’ Nagtaudan ti Kinapintasna?

APAMAN a lumamiis ti angin a napunno iti sengngaw iti rabii, saannan a matengngel ti amin a danum. Agtedted ti sobra a kas linnaaw. Ngem no bumaba ti temperatura agingga nga agbalin a yelo, tumangken ti sobra a danum​—kayatna a sawen, labsanna ti panagbalinna a likido a linnaaw ket maurnong a yelo. Dagiti maporma a kristal a linnaaw ket kakasla plato ken umaspingda kadagiti kristal a niebe. No maurnongda kadagiti paladpad ti tawa iti balbalay, nakaay-ayatda gapu iti makaawis a geometriko a disenioda ken kasla laso a debuhoda. Nakapimpintasda.

Ngem adda pay sabali a nalawlawag a porma dagiti linnaaw a kristal a maawagan yelo a linnaaw (hoarfrost). Innem ti sikigan dagitoy a naglungog a nakatud-aw nga espada a yelo, ket no mapagtitipon dagitoy iti ruar, nagpipintas ti buyada ket maitutop a maawagan a sabsabong a yelo. Bigbigat iti maysa a naraniag nga agsapa idiay Yosemite National Park, California, nasarakan a timmubo dagitoy a sabsabong a yelo iti rabaw dagiti bato nga adda iti dandanum ti Karayan Merced nga agayus a lumasat iti Ginget Yosemite. Nakapimpintas[da] met, ken pinataud dagiti pisikal a linteg nga impasdek ti Namarsua iti uniberso. “Maikarika, Jehova, a mismo a Diosmi, nga umawat ti dayag ken ti dayaw ken ti pannakabalin, agsipud ta pinarsuam dagiti isuamin a bambanag, ket gapu iti pagayatam napaaddada ken naparsuada.”​—Apocalipsis 4:11.