“No Apay Diak Rambakan ti Krismas”

DADDUMAT’ agkuna a mapapaidaman ti annak dagiti Saksi ni Jehova agsipud ta dida rambakan ti Krismas. Ngem usigenyo ti salaysay a “No Apay Diak Rambakan ti Krismas” nga insurat ti maysa nga 11-años a Saksi idiay California, E.U.A., kas maysa nga assignment-da iti klase:

“Iti adu a tattao, ti Krismas kaipapananna ti adu a bambanag​—sagsagut, pamilia, sagsagut, taraon, sagsagut, panangiraman, sagsagut, ayat, sagsagut, Santa Claus, sagsagut, kdp. Kaskasdi a manmano a panunoten itatta dagiti tattao ti kaipapanan ti Krismas wenno no apay a rambakanda dayta. No agrambakda, gagangayen a panunotenda ti Krismas kas ti panagkasangay ni Jesu-Kristo, maysa a tiempo agpaay iti pamilia ken, siempre, adu a sagsagut. Adu a tattao ti maasian kadagiti Saksi ni Jehova agsipud ta pagarupenda a mapapaidaman dagiti annakda. Ngem pudno kadi a maikapkapiskami iti maysa a banag? Usigentayo no apay a di rambakan dagiti Saksi ni Jehova daytoy a piesta.

“Kas maysa a Saksi ni Jehova, diak rambakan ti Krismas gapu iti adu a rason. Ti maysa ket, daytat’ saan a kasangay ni Jesus. Kuna ti Biblia nga adda dagiti pastor iti taltalon a kadua ti karkarneroda. Idiay Jerusalem, dayta ket nakalamlamiis a kalam-ekna ken masansan nga adda niebe. Saan a mabalin nga agnaed dagiti pastor iti ruar bayat dagitoy a bulbulan. . . . Nupay kasta, adu pay ti usigentayo.

“Ti Krismas ket saan laeng a di kasangay ni Jesus no di ket daytat’ pulos a di rinambakan dagiti immuna-siglo a Kristiano. Agpannuray ti nagtaudanna iti kadaanan a piesta dagiti Romano a Saturnalia, a mangrugi iti Dis. 17 ken agpatingga iti Dis. 25, ti ‘pannakaipasngay ti di maparmek nga init.’ Idi maikapat a siglo, inkeddeng ti dadduma nga opisial a Romano a rambakan ti kasangay ni Jesus iti Dis. 25, nalabit tapno pagsantuen ti pagano a piestada.

“Di ngarud pakasdaawan a naiparit ti Krismas iti adu a nadumaduma a pagilian. Itatta dadduma a tattao (kas kadagiti Saksi ni Jehova) sinurotdan ti ulidan dagiti immuna a Kristiano. . . .

“Ramrambakak idi ti Krismas​—agingga idi agtawenak iti uppat. . . . No maipapan ti pannakapaidam, pudno a saan a mapapaidaman dagiti Saksi ni Jehova. Magun-odanmi dagiti sagut iti intero a tawen. Dagiti laeng banag a pakaikapisanmi isu dagitoy pagano a piesta ken dagiti katupagda a pagano a rambak.”

Nupay insurat ti mannursuro iti papel, “Saan nga amin a tattao tarigagayanda dagiti sagut,” insuratna met, “Nagsayaat unay ti naaramidam,” ket inikkanna ti estudiante iti “A.”