Panangsarungkar Manen iti Russia

MAYSA KADAGITI KANGRUNAAN A NAMALBALIWAN TI SIGUD NGA UNION SOVIET ISUT’ WAYAWAYA A MAPAGSASARITAAN TI RELIHION. GINUNDAWAYAN TI ADU A RUSO DAYTA A WAYAWAYA TAPNO USIGEN DAGITI SURSURO TI BIBLIA. TI IMBUNGANA, KET GISTAY, MAYSA A MODERNO-ALDAW A MILAGRO.

ANIAN a siddaawko idi Hulio 28, 1993, idi pinidutko ti New York Times iti agsapa ket nakitak iti makinsanguanan a panidna ti nagdakkelan a retrato ti bautismo a naala idiay Moscow! Addaan dayta iti kapsion: “Ti pannakawayawaya iti relihion idiay Russia ket nangyeg kadagiti kumberte idiay Locomotive Stadium ti Moscow agpaay iti pannakabautisar ti nagadu a tattao kas Saksi ni Jehova.”

Kagapgapumi ken baketko manipud Russia maysa la nga aldaw sakbay dayta. Tinabunuanmi ti bautismo ti 1,489 a tattao. Talaga a dayawenmi ti Nakristianuan nga ayat nga impakita dagiti Ruso ken ti interesda kadagiti naespirituan a bambanag. Ti maysa a kapadasanmi kalpasan ti pangserra a sesion ti kombension iti rabii ti Domingo ti mangyilustrar iti daytoy.

Idi inyawidnakam ti Metro iti hotelmi, nakiabayak iti maysa a baro a nalabit 18 wenno 19 ti tawenna. Inyawatko kenkuana ti tract ti Biblia, iti Ruso, nga Aniat’ Namnama kadagiti Ing-ingungoten a Natayen?a Kalpasan ti panangukagna bassit iti dayta, inyawatna ken nanangna. Isu nga inikkak manen ti agtutubo iti sabali. Iti dayta, intudona ti panglukat a saludsod, “No matay ti tao, agbiagto aya manen?” ket, iti timek a mangipadlaw iti panagduadua, dinamagna iti Ingles, “Patiem kadi daytoy?”​—Job 14:14, King James Version.

Iti panangperrengko kenkuana, ken buyogen iti natibker a panamati, simmungbatak: “Talaga a patiek dayta!” Sa dagus nga impasarunsonko: “Panunotem daytoy. Ti biagtayo kas intelihente, managpanunot a tattao ket maysa a milagro. Adda la ketdi maysa a Nangatngato a Persona a nangputar kadagiti linteg a mangikeddeng iti itatanortayo kas tattao. Isu a patiek a Daytoy a Kangatuan kabaelanna met a parsuaen manen ti natay a tao tapno agbiag manen.”

Dagus a binasa ti agtutubo ti tract. Idi nalpasnan, inyawatko ti broshur iti Ruso a Pudno Aya a Maseknan ti Dios Kadatayo?* Kayatna a maammuan ti ad-adu pay, ngem masapul a dumsaagkamin iti sumaganad a pagsardengan ti subway. Nupay adda tren a kamkamakamen ti agtutubo ken ni nanangna iti dayta a rabii, dimsaagda iti subway ket nakisaritada kadakami iti sumagmamano pay a minuto. Kalpasan ti panangaramidmi iti ababa a komento maipapan iti programa a panagadal ti Biblia, impakitak kenkuana ti direksion iti likudan ti broshur no sadino ti mabalinna a suratan agpaay iti kanayonan nga impormasion.

Pimmanawkam iti Russia kabigatanna, ngem dinto malipatan dagiti kapadasan a kas iti daytoy.

Sangkapanunotmi ti Russia

Sangkapanunotko ti nagadu a bilang dagiti kabbaro a nabautisaran kalpasan a naikkat kamaudiananna ti pannakaipawil dagiti Saksi ni Jehova iti sigud nga Union Soviet idi Marso 1991. Dagus a nayurnos ti pito a kombension idi kalgaw ti 1991, ket 7,820 ti naitaneb iti danum. Sa, kadagiti kombension iti kalgaw ti 1993​—agraman ti maysa a tinabunuanmi idiay Moscow​—11,238 ti naitaneb.

Nadlaw ti adu nga umili a Ruso ti naregta a panagebanghelio dagiti Saksi idiay Russia. No panunotenyo ti tignay dagiti Ruso kadagiti sursuro ti Biblia, talaga a kasla milagro dayta.

‘Kasano a naaramid daytoy nagpartak nga irarang-ay?’ pinampanunotmi. ‘Kasano katibker dagitoy a Ruso kadagiti Nakristianuan a sursuro?’

Idi kinuna ti maysa a pagassawaan nga agnanaed idiay Moscow a mayurnosda ti pagdagusanmi no sumarungkarkamto manen idiay Russia, rinugianmi a plinano ti panagbiahemi. Rimmayray ti gagarmi nga agbiahe idi nakaawatkam kadagiti kanayonan a report maipapan iti naisangsangayan nga interes dagiti Ruso kadagiti kinapudno ti Biblia.

Managpadagus a Ruso a Pamilia

Simmangpetkami idi Hulio 24 nga awit-awitmi dagiti maleta iti pagdagusanmi idiay Moscow​—dua-kadsaaranna nga apartment nga agsangapulo minuto a pagnaen manipud pasdek nga apartment dagiti gagayyemmi. Iti pamilia a pagdagusanmi, ni laeng 15-tawenna a Katia ti adda iti pagtaengan a nangkablaaw kadakami. Rabii ti Domingo idi, ket adda pay la iti Nakristianuan a ministerio ti dadduma a miembro ti pamilia.

Di nagbayag, simmangpeten ti dadduma a miembro ti pamilia​—ni Galina, ti ina; ni 13-tawenna a Zhenia, ti buridek a babai; ken kamaudiananna, ni Viktor, ti ama. Saanda unay a makasao iti Ingles, ket dikam met makasao unay iti Ruso. Nagbalin la a nalaka ti panagsasarita no adda dagiti Ingles-pagsasaona a gagayyemmi nga agserbi kas managipatarus ngem nagrigaten no awandan. Nangusarkami iti diksionario a Ruso-Ingles ken mangiladawan a senias. Nalaing a makikomunikar da Katia ken Zhenia, tangay nasursuroda ti senias dagiti tuleng.

Naggigiddan a nabautisaran ti pamilia, dua pay la a tawen ti napalabas. Ni Viktor ket ministerial nga adipen iti kongregasion, ket nakairuamanen a busbosen dagiti babbalasang ti bakasionda idiay eskuelaan iti ad-adu a tiempo iti ministerio. Bayat nga ages-eskuelada, saanda a nagkedked a mangisarsarita iti pammatida. Kinapudnona, ti panangasabada ti nakaallukoyan ketdi dagiti autoridad iti ruar ti distrito ti eskuelaanda. Naparegtakam met a nakaammo a mangidadaulo ti pamilia iti 28 a linawas a panagadal ti Biblia iti pagtaengan dagiti interesado!

Nalawag, ti nakaipamaysaan ti panunot ti tunggal miembro ti pamilia isu ti panagadal iti Biblia ken ti Nakristianuan a ministerio, ket nakitami a nagunggonaan ti biagda. Impamatmatda ti kinaragsak.​—Aramid 20:35.

Kabesadoda ti Biblia

Sakbay a maturogkami iti rabii, sinubokko ti pamilia kadagiti teksto ti Biblia. Umuna, dinamagko no ania ti kunaen ti Apocalipsis 21:3, 4. Dagus, gistay naggiddan dagiti babbalasang a nangyebkas iti dayta. Insarunok a dinamag ti Isaias 2:4. Ammoda met dayta, nga uray la nagusarda pay kadagiti senias a mangipamatmat iti pannakapanday dagiti kampilan a mapagbalin nga arado.

Nagtultuloyak babaen kadagiti teksto iti Isaias a mangibagbaga iti panagturay ti Pagarian ken dagiti bendision ti baro a lubong, kas ti Isaias 9:6, 7; 11:6-9; 25:8; 33:24; 35:5, 6; ken 65:21, 22. Nupay dida inuk-ukag ti Bibliada, nabaelan ti pamilia a sinaguday ti linaon ti tunggal teksto. Pasaray ipakita dagiti babbalasang nga ammoda ti teksto babaen kadagiti mangiladawan a senias, kas iti ubing a mangidaldalan iti maysa a leon.

Iti maysa a rabii inusigmi dagiti teksto a mangyam-ammo iti Dios, a pinagminarmi dagidiay mangpaneknek a nababbaba ni Jesus ngem iti Dios sa ti Dios ken ni Jesus ket saan a maymaysa a persona no di ket agkaykaysada. Nabaelan ti pamilia a sinaguday ti linaon dagiti teksto kas ti Juan 10:30, Juan 17:20, 21, ken 1 Corinto 11:3. Nasdaawkam ken baketko iti kinalaingda iti Biblia.

Iti bigat ti Martes, nagtataripnong ti nasurok a sangapulo kadakami ken nagkakaduakam a nagbiahe babaen iti Metro a nagturong iti nagpintas a parke a nangbusbosanmi iti dua ket kagudua nga oras a nakisarsarita kadagiti tattao maipapan iti Biblia. Biningaymi ti grupo ken nagtrabahokam a sagdudua. Maysa kadagiti nakaduak isu ni Nadia, maysa a Ruso a balasang a nangipakita iti makaay-ayo a kinatakneng iti yaasidegna kadagiti tattao ken pannakisaritana kadakuada. Nagsigo a mangiturong iti atension kadagiti panggep ti Dios iti Biblia. Nakunak iti bagik, ‘Aduan kapadasanen daytoy nga agibumbunannag.’ Kalpasanna naklaatak a nakaammo nga isut’ agtawen laeng iti 17 ken dua bulan pay laeng a nabautisaran!

Nagadu ti kasta a kapadasanmi, a pangikunaan a naisangsangayan ti kasasaad idiay Russia. Manipud pannakarbek ti Komunismo, imparangarang dagiti Ruso ti gagarda a mangusig kadagiti sursuro ti Biblia. Edukado unay ti kaaduan kadakuada, ken pagay-ayatda ti agbasa. Nalaka a makabasa ken makatarus uray dagiti ubbing, kas paneknekan ti isasarungkarmi iti maysa a Ruso a pamilia a nakasursuro kadagiti kinapudno ti Biblia idi adda pay laeng dagiti Saksi iti sidong ti pannakaipawil.

Kinuna ti barito ti pagassawaan nga adda kayatna a saludsoden. Babaen iti maysa a managipatarus, isut’ nagkiddaw. Natukay ti riknak iti dayta isu a kinunak a no isuratna ti kiddawna, itedkonto dayta kadagiti manangipablaak ti Agriingkayo! Dagus a nagtugaw ken nagsurat. Ti sumaganad isut’ pannakaipatarus ti insuratna. Ti surat ket naretrato idiay panid 25.

“Agsursurat ni Serosha manipud Russia agpaay iti Watchtower Society. Pito ti tawenko, ket mangaskasabaakon a kaduak da Tatang ken Nanang. Pagay-ayatko ti makisarita iti tattao maipapan ti Pagarian ti Dios. Pagay-ayatko met a basaen ti magasin nga Agriingkayo! Maminsan laeng iti kada bulan a dumteng dayta ditoy Russia iti Ruso idinto ta iti Ingles a pagsasao ket mamindua iti makabulan. Kayatko unay a mamindua met koma daytoy a magasin iti kada bulan, gapu ta pagay-ayatko unay, unay, unay dayta. Pangngaasiyo ta aramidenyo daytoy.”

Nagrigat a panawan dagiti nagayyemmi idiay Moscow. Iti kasta a kaababa a tiempo, nasursuromi ida nga ayaten a sidudungngo.

No Idilig iti Damo a Kinakristiano

Pimmanawkam a nagpa-Tallinn, Estonia, babaen iti pangrabii a tren. Sadiay a nakitami dagiti nagpipintas a baro a pasilidad a pakatartarawidwidan ti trabaho a panangasaba iti dayta sigud a republika ti Union Soviet. Tallo nga aldaw kalpasanna, naglugankam iti tren a nagpa-St. Petersburg. Kadagita a lugar nagdamag dagiti padami a Kristiano maipapan iti trabaho a panangasaba idiay Moscow. “Ti kaaddami sadiay ken pannakakitami iti irarang-ay,” insungbatko, “ti timmulong kaniak a mangtarus a nasaysayaat iti naisurat iti damo a paset ti Aramid 17 ken iti sursurat kadagiti taga Tesalonica.”

Kanayon idi a pagsiddaawak a naipasdek ti kongregasion idiay Tesalonica nabatad iti unos ti sumagmamano a lawas a panagministerio ni apostol Pablo sadiay. Pakasdaawak met nga iti uneg ti makatawen wenno nasurok, insurat ni Pablo kadagitoy kabbaro a Kristiano ti dua a surat maipapan kadagiti nauneg a naespirituan a bambanag kas iti panagungar ken ti ‘pannakarabsut a maipan kadagiti ulep,’ “aldaw ni Jehova,” ti pannakaipukkaw ti “talna ken talged!,” ken “ti kaadda ni Apotayo a Jesu-Kristo.” (1 Tesalonica 4:13-17; 5:1-3; 2 Tesalonica 2:1, 2) Ti naregta a trabaho dagidiay a nagkauna a Kristiano, kas bungana, ti nangpataud iti umuna-siglo a milagro​—maysa a nataengan, nabileg iti naespirituan nga internasional nga organisasion dagiti manangaskasaba iti ababa la a tiempo. Agarup sangapulo a tawen kalpasanna, insurat ni Pablo a ti “naimbag a damag” ket “naikaskasaba[n] kadagiti isuamin a parsua nga adda iti baba ti langit”!​—Colosas 1:23.

Para kaniak, ti mapaspasamak idiay Russia ket mayasping iti napasamak idi umuna a siglo.

Ti Panagregget a Mangtaginayon iti Irarang-ay

Ti Russia isut’ kadakkelan a pagilian ditoy daga, isu a nalawag a dakkel ti trabaho a panangiwanwan iti rinibo sadiay a mangaskasaba iti naimbag a damag ti Pagarian ti Dios.​—Mateo 24:14.

Kuna ti Biblia maipapan kadagidiay a nakangngeg maipapan iti Kinakristiano idi umuna a siglo: “Ti ima ni Jehova adda kadakuada, ket maysa a dakkel a bilang dagiti nagbalin a manamati bimmaw-ingda iti Apo.” (Aramid 11:21) Anian ti pannakaimatangmi iti pannakayaplikar dagidiay a sasao kadagiti Kristiano a kakabsattayo idiay Russia! Sapay koma ta agtalinaed ti tay-ak ti Russia a naluom agpaay iti naespirituan a panagani, ket sapay koma ta rinibo pay sadiay ti makiraman iti nagsudi a pribilehio a tumulong kadagiti sabsabali iti dalan ti biag.​—Naipatulod.

[Dagiti Footnote]

[Dagiti ladawan iti panid 24, 25]

Ngato: Ti pamilia a nagdagusanmi. Ngato ken kanawan: Panangasaba iti parke. Makimbaba a kanawan: Ni Serosha ken ti suratna

[Ladawan iti panid 26]

Dagiti kabbaro a pasilidad ti Watch Tower idiay Tallinn, Estonia