Manipud Managbasatayo
Dagiti Ay-ayam Kabasbasak ti nagsayaat nga artikulo a “Nagannak—Pilienyo a Naimbag Dagiti Abalbalay ti Anakyo.” (Setiembre 8, 1994) Kas maysa a naganak, apresiarek unay ti impormasion. Nupay kasta, kayatko ti mangnayon iti maysa a mamakpakauna a singasing. Pangngaasiyo ta pakdaaranyo dagiti managbasa iti posibilidad a mabalin a malmes ti babassit nga ubbing kadagiti timba wenno baldi uray bassit laeng ti linaonda a likido.
E. V., Estados Unidos
Maapresiar ti pammalagip.—ED.
Nagdinniskutirkam idi iti baritok maipapan iti tarigagayna nga igatangak iti ay-ayam a mariknak a di mayanatup kenkuana. Tangay ubing pay, marigatan nga umannugot iti panangikalintegak. Bayat a nagpatangkami, kinitami ti koreo, a nakairamanan ti kabaruan nga Agriingkayo! Agpadakam a nasdaaw a nakakita iti paulo nga “Ammoyo Kadi No Aniat’ Abalbalayen ti Anakyo?” Nagustuanna dagiti artikulo ken nangrugi a naawatanna ti panangikalintegak.
W. F., Estados Unidos
Pagyamanan kadagiti artikuloyo. Nganngani 13 ti tawenko ken pagay-ayatko dagiti aktibidad iti ruar ti balay, arts ken crafts, ken panagtokar iti piano. Idi ubingak pay, nagaramidak kadagiti bukodko nga ay-ayam. Kayatko nga aramiden dagitoy a bambanag ngem ti panagay-ayam iti video gapu ta ipariknada kaniak nga adda magapuanak. Inanamaek a nakatulong dagitoy nga artikulo iti dadduma nga ubbing a makaamiris a makaparagsak dagitoy a bambanag.
C. S., Estados Unidos
Hippopotamus Pagyamanan iti panangipablaakyo iti padamag a “Nangisalakan ti Hippopotamus!” (Oktubre 8, 1994) Nagutugotak a nangbasa ti wagas ti panangisalakan ti hippopotamus iti impala. Para kaniak, agingga ita, ti hippo ket basta maysa a dakkel nga animal iti danum nga ingangana ti nagdakkelan a ngiwatna tapno ipakitana dagiti dadakkel a ngipenna. Diak kunaen a pagay-ayatko idi dagidiay nga animal, ngem binalbaliwan daytoy nga artikulo ti kapanunotak.
Y.H., Japan
Pakasaritaan ti Maysa a Soldado a Taga Israel Kabasbasak ti artikulo a “Nasanay Idi a Pumatay, Ita Mangituktukonakon iti Makaispal-Biag a Mensahe.” (Setiembre 8, 1994) Namin-adun a kayatko ti agsurat kadakayo tapno yebkas ti pangapresiarko, ngem ita laeng a kasta unay ti pannakagutugotko. Masansan a pampanunotek ti reaksion dagiti Judio iti naimbag a damag ti Pagarian ni Jehova. Ita, impaayyo ti naisangsangayan pananggutugotna a pakasaritaan ni Rami Oved. Anian a makaparagsak a basaen ti panagballigi ti Sao ti Dios iti tunggal tuben!
J. S., Estados Unidos
Ti pakasaritaan inabbukayna ti pusok, tangay nagtaud met ti pamiliak iti pulí dagiti Judio. Marigatan ti adu a tattao no pilienda ti kinapudno ti Biblia wenno ti pamiliada, ngem kasla narigrigat kadagiti Judio, tangay ibilang ida dagiti pamiliada kas pimmusayen. Nupay kasta, simmayaat met laeng dagiti pamilia ti nagannakko idi naamirisda a di isukat dagiti dadakkelko ti kinapudno tapno ay-aywen ti asinoman!
F. K., Estados Unidos
Operasion ti Mata Dakkel ti interesko a nangbasa iti artikulo a “Ti Radial Keratotomy—Ania Dayta?” (Setiembre 22, 1994) Tangay sumagmamano a bulan laengen ken maoperaakton, apresiarek unay ti makailawlawag nga impormasion. Nalawlawag dayta ngem iti impormasion nga impaay ti ophthalmologist-ko.
G. C., Italia
Agsagsagaba nga Ubbing Realistiko ken nagsayaat ti pannakaisurat dagiti seryeyo nga “Aniat’ Masakbayan Dagiti Ubbing?” (Mayo 8, 1994). Napaladingit ti pusok idi nabasak dagiti nakaro a kapadasan ken makapapatay a sakit, agraman ti nakaro a kasasaad ti panagbiag a mabalin a sagabaen dagiti ubbing. Ngem naragsakanak a nakabasa maipapan iti pudpudno a masakbayan agpaay kadagiti ubbing a matungpalto inton agturayen ti Pagarian ti Dios iti sangatauan.
D. G., Papua New Guinea