Ti Belt a Mangispal Kadagiti Biag

“TI PANNAKAUSAR ti safety-belt ket maysa kadagiti kaeepektibuan a pamay-an a pangkissay ti bilang ken kinakaro ti pannakadangran kadagiti pannakadungpar ti lugan,” kuna ti Morbidity and Mortality Weekly Report (MMWR). Sigun iti maysa a panagadal, ti peggad ti ipapatay iti aksidente ti kotse ket nakissayan ti 43 a porsiento no umiso ti panangusar dagiti pasahero kadagiti safety-belt. Ti peggad ti nakaro a pannakadangran ket nakissayan ti ag-50 porsiento.

Damo nga impatungpal ti gobierno ti Australia ti pannakaipaalagad ti pannakausar ti safety-belt idi 1970. Ita, ag-35 a pagilian ti mangipaalagad ti pannakausar ti safety-belt. Dagiti di mangalagad ket masansan a makalikaguman nga agmulta ket iti dadduma a kaso uray pay ti peggad a masuspende ti pribilehioda nga agmaneho. Dadduma a gobierno ti mangipaalagad kadagiti linteg a mangikalikagum kadagiti pasahero iti amin a lugar a pagtugawan (agpada iti sango ken likud) nga agusar kadagiti safety-belt.

Ipadamag ti MMWR a “mapattapatta nga ag-300,000 a tattao ti matay ken 10-15 milion a tattao ti madangran iti kada tawen kadagiti pannakadungpar ti lugan iti intero a lubong.” Bimmassit koma daydiay a bilang no dagidiay amin a tattao ket nagusar kadagiti belt iti pagtugawan.