Manipud Managbasatayo

Edukasion Kagradgraduarko manipud iti maysa nga unibersidad ti Nigeria ken diak nagun-odan ti nangato a grado babaen iti margin a 2 porsiento. Medio maldaangak. Isu nga idi impablaakyo ti artikulo a “Panangsalimetmet iti Edukasion iti Lugarna” (Agosto 22, 1994) ken impaawatyo a ti edukasion ket rumbeng a di ragpaten tapno aglatak gapu iti kinalaing idiay eskuelaan, nangrugi a naawatak ti bambanag iti umiso a lugarda. Nupay parparegtaendak dagiti propesorko a mangala pay iti kanayonan a kurso kalpasan ti panagturposko, sisiserioso nga ut-utobek dagiti bambanag iti panangilawlawag ti naadalko.

G. J., Nigeria

Ag-14 ti tawenko ken naipasidongak iti napalalo a pannakapilit a manggun-od iti nangatngato nga edukasion. Babaen ti tulong ti artikuloyo, naikeddengko no aniat’ kayatko nga aramiden. Kayatko ti agbalin a payunir [amin-tiempo a managebanghelio], ket no kasapulak ti kanayonan a panagsanay tapno makastrekak iti trabaho, kayatko ti sumrek iti vocational school ken adalen ti panagretrato.

H. O., Estados Unidos

Pinilik ti di manggun-od iti kanayonan nga edukasion. Kaykayatko nga usaren dayta a panawen a mangisuro iti sabsabali maipapan iti Namarsuatayo. Masansan a masdaaw ti tattao iti kaadu ti pannakaammok iti nadumaduma a tema. Sangkadamagda, “Nakapagkolehioka kadi?” Ibagak kadakuada a naadalko ti ammok manipud iti Biblia ken iti literatura nga ipapaay ti Watch Tower Society.

M. L., Estados Unidos

Impakita ti artikuloyo a nasken nga usigen dagiti pagsayaatan ken pagdaksan ti kanayonan nga edukasion. Patiek a nasken nga ageskuelaak manen ngem diak kayat a mabaybay-an dagiti naespirituan nga aktibidadko. Inlawlawagko iti sekretaria ti eskuelaan ti iskediulko iti Nakristianuan a gimong, ket inyurnosna dagiti klasek tapno matabunuak amin a gimongko.

M. F. S., Brazil

Narasrasi a Basehas? Pagyamanan iti makailawlawag nga artikulo a “Ti Panangmatmat ti Biblia: Ti ‘Narasrasi a Basehas’​—Insulto Kadagiti Babbai?” (Oktubre 8, 1994) Rumbeng a basaen ti tunggal lalaki daytoy nga artikulo, tangay nagsayaat ti panangilawlawagna.

G. B., Estados Unidos

Diak pulos a naawatan a naimbag ti balikas ti Biblia idiay 1 Pedro 3:7 maipapan iti babbai kas ‘narasrasi a basehas.’ Sangkapanunotko nga awan unay ti serserbi ti babbai, ken dimmakkelak a nakaimatang iti lallaki a di unay a mangraraem iti babbai. Ngem dayta nga artikulo inlintegna ti panagpampanunotko.

T. C., Estados Unidos

Kasungani a Sekso Pagyamanan unay kadagiti artikulo nga “Agimtuod Dagiti Agtutubo . . .” nga “Apay a Nagrigat nga Iwaksi iti Panunotko ti Kasungani a Sekso?” ken “Kasano a Maiwaksik iti Panunotko ti Kasungani a Sekso?” (Hulio 22, 1994; Agosto 8, 1994) Nagsayaat a maammuan a diak agbagtit, tangay idi agtawenak iti 12, naaddaanak iti nasged a rikna iti maysa a lalaki nga am-ammok. Tinulongannak ti maikadua nga artikulo a mangisardeng iti napalalo a panangpampanunotko kenkuana. Imbagak dayta iti maysa a Kristiano a nataengan a kabsat a babai iti kongregasionko, ket tinulongannak.

P. Z., Estados Unidos

Naamirisko a ti paset maipapan iti masturbasion ket agaplikar unay kaniak. Pagarupko no ti masturbasion ti mangsebseb iti kinarasuk ti tarigagayko iti sekso, ngem dakdakes laeng ti imbungana. Nagkararagak ken Jehova a pakawanennak iti pannakiramanko iti daytoy a makarimon nga aramid.

P. M., Estados Unidos

Naintiempuan unay ti idadateng kaniak ti artikulo. Idiay eskuelaan, sekso ti kangrunaan a mapagsasaritaan. Adda babai idiay eskuelaan a tumabtabuno iti tabtabunnuak met laeng a kongregasion. Nasarakak nga isut’ nasaririt unay, nalaing, ken napintas. Tinulongannak ti artikulo a mangliklik iti kanayon a panangpampanunot ken panangmatmatko kenkuana.

M. F., Alemania