Nangabak ti Dangadang a Maibusor Kadagiti Didigra
SIGURADO a mapadayawan ti panangikagumaan ti Naciones Unidas ken ti tunggal gobierno a mangbang-ar kadagiti epekto ti didigra ti nakaparsuaan. Dagiti proyekto a kas ti International Decade for Natural Disaster Reduction, isingasingna a masapul a saan nga agbalin nga awan gaway ti sangatauan no mapasanguan kadagita a kalamidad. No iyaplikar dagiti indibidual, komunidad, ken gobierno dagiti maitutop nga addang, maispal dagiti biag.
Makapainteres daytoy, agsipud ta ibaga ti Biblia kadatayo nga iti mabiiten addanto panagbalbaliw iti panangaywan ti gobierno iti sangatauan. Nanipud idi kaaldawan ni Jesus, inkarkararagen dagiti Kristiano ti Kararag ti Apo (ti “Amami”), a mangiraman iti ebkas nga: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mateo 6:9, 10) Ti Pagarian ti Dios ket pudno a gobierno. Sigun iti padto ti Biblia, iti mabiiten “burakennanto ken ibusennanto amin dagitoy a pagpagarian [ti tao], ket isu agtalinaedto iti agnanayon.” (Daniel 2:44) Panunotenyo laengen ti isuamin a sangatauan iti sidong ti maymaysa a naan-anay a gobierno. Anian a panagbalbaliwto dayta!
No makita dagiti gobierno ita a masapul ti agtignay tapno saan nga agbalin a didigra ti nakaparsuaan dagiti peggad iti nakaparsuaan, makapagtalektayo a ti gobierno ti Dios ipanamnamananto a dagiti iturayanna saandanto a pulos nga agsagaba iti kastoy. Mangyegto ti Pagarian ti Dios ti agnanayon a kappia iti daytoy a planeta iti damdamo unay nanipud pinapatay ni Cain ni Abel. Iti sidong dayta a Pagarian, “dagiti naemma a mismo tawidendanto ti daga, ket maay-ayatandanto iti kinaruay ti talna.” (Salmo 37:11) Sursuruanto ti Pagarian ti sangatauan tapno iti literal unay a pamay-an ‘amin a tattao masursuruandanto ken Jehova, ket dakkelto ti talnada.’—Isaias 54:13.
Itatta, kaaduan a biktima ti didigra ti nakaparsuaan isu dagiti napanglaw. Nupay kasta, babaen iti naan-anay a panangiwanwan ken umiso nga edukasion, iti sidong ti Pagarian ti Dios, saanton nga agsagaba ti sangatauan iti panangtuok ti kinapanglaw. Iti panangipadtona kadagita a kasasaad iti pamay-an a maawatan dagiti tattao idi kaaldawanna, insurat ni mammadto nga Isaias: “Ket iti daytoy a bantay ni Jehova, dagiti buybuyot agaramidto kadagiti amin nga inilin-ili iti maysa a rambak dagiti nalukmeg a banag, maysa a rambak dagiti ar-arak iti rabaw dagiti aributed, dagiti nalukmeg a banag a napno iti pata, dagiti arak a nadalusan a naimbag kadagiti aributed.” (Isaias 25:6) Wen, maysa a rambak dagiti naimbag a bambanag! Iti panangdeskribirna pay iti biag iti sidong ti turay ti Pagarian, insurat ti salmista: “Addanto kinaruay ti bukel iti daga; iti tapaw dagiti bambantay; ti bungada margaayandanto a kas iti Libano, ket dagiti taga ili agrangpayadanto a kas iti ruot iti daga.”—Salmo 72:16.
Nabatad nga agpatingganton ti pannakidangadang ti tao a maibusor kadagiti didigra ti nakaparsuaan. Babaen ti panangiwanwan ti espiritu ti Dios ken ti panangiwanwan ti Pagarian ti Dios, dagiti managbuteng-Dios a tattao mangabakdanton iti dayta a dangadang. Anian a bang-arto dayta!