Ti Parmasia iti Taaw

Babaen ti koresponsal ti Agriingkayo! idiay Canada

SADINO ti pagtataudan dagiti kadawyan a droga? Awan duadua a dagus a malagiptayo dagiti mula ken erba. Nupay kasta, deskribiren ni Dr. Michael Allen, iti panagsuratna iti The Medical Post, dagiti droga manipud iti naisangsangayan unay a gubuayan​—ti taaw.

Siempre, saanen a kabbaro daytoy; ta iti adu a siglo ket inusaren dagiti Insik ti agtaud kadagiti ikan a pangagas iti sakit. Ket nabayagen a maus-usar ti cod-liver oil, kas paneknekan dagiti lallakay. Ngem, bassit laeng ti naammuan maipapan kadagiti makaagas a pateg dagiti biag iti danum no maidilig kadagiti naammuan maipapan kadagidiay mula ken erba.

Nupay kasta, ti naammuanen ket makaallukoy. Kas pagarigan, maysa a kemikal a patauden ti ikan a butiti ket mabalin nga usaren a pangagas iti angkit. Ti kaadda ti nucleosides kadagiti sponge ti nangiturong iti pannakapataud ti vidarabine, maysa a droga a pangkontra iti virus. Ti kolor kape a gamet pataudenna ti stypoldione, maysa nga [agas] a manglapped iti panagbingay ti selula a mabalin nga usaren a pangagas iti kanser. Ket pangrugian laeng daytoy.

Nupay kasta, saan a masarakan iti parmasia iti taaw ti kangrunaan a pangagas iti an-annayen. Imbes ketdi, ti laeng Pagarian ti Dios ti makatungpal iti makagutugot a padto: “Awanto ti agtaeng nga agkuna: ‘Masakitak.’”​—Isaias 33:24.