Ti Rat Snake​—Naparsua nga Aguli

ILADAWAN ti maysa a bassit a libro maipapan kadagiti uleg idiay Alabama ti rat snake kas nalaing a managuli. Daytoy ket mangipakita iti abilidadna nga aguli babaen ti panangulina kadagiti sikigan ti ladrilio a diding ti maysa a pasdek. Nabatad nga ubing pay unay, ta sumeksek a naimbag kadagiti getleng a nagsasaipan dagiti ladrilio. Pagay-ayatna ti mangan iti utót ken marabutit.

Ipalgak ti The Audubon Society Encyclopedia of Animal Life ti naisangsangayan a kinalaingna nga aguli: “Adda babassit a bilid iti tian ti rat snake. Mabalin a maysa kadagiti panggep ti bilid isu ti panangipaay iti pagkebbeng ti uleg iti ukis [ti kayo] ket iti kasta maaddaan iti nasaysayaat a panagkapetna. Makauli iti puon ti dakkel a kayo babaen ti panangiseksekna iti bagina iti baet dagiti getleng ti ukis ken panaguyasna nga agpangato uray iti bassit laeng babaen kadagiti bilid ti tianna.”

Ti kaaddana iti maysa a kayo ti mamagbalin kenkuana a puntiria ti arban dagiti naariwawa, sumisippayot a blue jay. Iti iyuulina iti sikigan daytoy a pasdek, ti uleg ket mabalin a di makasarak kadagiti billit wenno itlog ti billit, ngem makaipaay dayta iti apagbiit a pannakairidep iti nabara a ladrilio.