Pannakawayawaya Manipud Kinaawan Panggedan​—Kasano Ken Kaano?

KAS iti Namarsuana, maragsakan ti tao iti trabaho, a siuumiso a madepinar kas “sagut ti Dios.” (Eclesiastes 3:12, 13; Juan 5:17) Makaparagsak kadatayo ti makaay-ayo a trabaho ken mariknatayo a naserbi ken matarigagayantayo. Talaga nga awan ti asinoman a mayat a makapukaw iti trabaho, kasano man kabassit ti panangtagiragsakna iti dayta. Malaksid ti panangipanamnamana iti sueldo, ti masuelduan a panggedan mangipaay iti naurnos nga organisasion, panggep, ken ti pakabigbigan iti biag ti maysa a tao. Saan ngarud a nakaskasdaaw a gagangay a “ti awan panggedanna awan ti aniaman a tarigagayanna no di ti maaddaan iti trabaho.”

Panagsapul iti Trabaho

Kas nakitatayon, nakarikrikut ti kasasaad ti pagtrabahuan. Kas banagna, adda adu a nainkalintegan a pamay-an ti panagsapul ti trabaho. Asinoman a maikari kadagiti benepisio iti gobierno mabalin nga usarenda dagiti benepisio ti gobierno iti kinaawan ti panggedan no magun-odan; ken sadiay pagaplikaranna, mabalin nga agpalistada kadagiti opisina [a mangtamtaming] kadagiti awan panggedanna ket usarenda dagiti serbisio a maipaay. Dadduma makasapulda iti trabaho babaen ti panangpataud iti bukodda a panggedan. Ngem masapul koma ti panagannad. Masansan a ti mangyempleo iti bagina sanguenna ti damo a paggastuan a mabalin a saan a nalaka a bayadan. Nasken met nga ammuen ken raemen dagiti linteg ti masapulan ken panagutang ken ti panagbuis​—a mabalin a narigat nga ibanag iti dadduma a pagilian!​—Roma 13:1-7; Efeso 4:28.

Tapno makasapul iti trabaho, pinagbalin ti dadduma a trabaho ti panangsapul iti trabaho, nga impasnekda dayta babaen iti pamay-an ken kinapinget. Dadduma ti nagsurat kadagiti kompania nga agsapsapul kadagiti empleado, wenno nagpaanunsioda kadagiti lokal a warnakan​—a dadduma kadagitoy ti mangiprenta kadagiti libre nga anunsio ti panagkiddaw iti trabaho. Masansan a nangipaayen ti Agriingkayo! kadagiti epektibo ken praktikal a balakad maipapan itoy a tema​—agpaay nga agpadpada kadagiti agtutubo ken nataengan.a​—Kitaenyo dagiti kahon, panid 11.

Masapul a mannakibagaykayo​—a situtulok a mangaramid iti amin a kita ti trabaho, agraman dagiti trabaho a dikay pagay-ayat. Kunaen dagiti eksperto a mairaman kadagiti umuna a bambanag a madamag kadagiti interview iti pagtrabahuan isu dagiti napalabas a kapadasan iti trabaho ken ti kabayag ti kinaawanen ti trabaho. Ti nabayagen a kinaawan ti trabaho maibilang a saan a nasayaat a pagilasinan agpaay iti manamnama a mangyempleo.

Ti maysa a tao a sisisirib a mangusar iti tiempona idiay eskuelaan a manggun-od iti kinasigo adda nasaysayaat a gundawayna a makasarak iti damo a pagtrabahuanna. “Ti kinaawan ti panggedan,” kuna ni Alberto Majocchi, maestro iti financial sciences, “apektaranna a nangnangruna dagiti saan a nasigo a trabahador.”

Ti Kinapateg ti Emosional a Pannaranay

Maysa a napateg a banag isu ti positibo a panangmatmat. Daytoy ti mamagduma iti pannakasarak ken ti di pannakasarak iti trabaho. Apresiaren unay ti awan panggedanna ti emosional a pannaranay, a mangtulong kadakuada a mangliklik iti panangiputong iti bagida wenno pannakarikna iti kinaawan ti pannakaseknan. Agserbi met dayta a mangparmek iti pannakapukaw iti panagraem iti bagi a mabalin nga agbanag iti panangipadis iti bagi kadagiti sabsabali a di nakapukaw iti trabahoda.

Mabalin a saan a nalaka ti panangikagumaan nga agbiag iti bassit a kuarta. “Gapu ta madanaganak, marigatanak a mangusar a naimbag iti tiempok,” kuna ni Stefano. “Pinagdanagnak unay ti kasasaad,” malagip ni Francesco, “ta nangrugin a babalawek ti dadduma nga ingungotek a gagayyem.” Ditoy a napateg ti pannaranay ti pamilia. Ti kinakurang ti sapul kalikagumanna ti pannakibagay dagiti amin a miembro ti pamilia, tapno makissayan ti kasapulan ti biag. Ni Franco, a naikkat iti trabaho iti edad nga 43 kalpasan ti panagtrabahona iti isu met la a kompania iti 23 a tawen, kunana: “Nanipud idi tiempo a naikkatak iti trabaho, positibo ti asawak ken gubuayan iti dakkel a pammaregta.” Nangnangruna nga agyaman ni Armando iti asawana gapu “iti kasta unay a kinasiribna iti panaggatang.”​—Proverbio 31:10-31; Mateo 6:19-22; Juan 6:12; 1 Timoteo 6:8-10.

Makatulong dagiti prinsipio ti Biblia kadatayo a mangsalimetmet iti positibo nga espiritu ket di malipatan dagiti napatpateg a pagalagadan. Dagidiay a napagsaludsodan ti Agriingkayo!, a nadakamat nga immuna, nakagun-odda iti makaliwliwa a panangipanamnama manipud iti Biblia. Daytoy ti nangiparikna kadakuada a nasingsingedda iti Dios. (Salmo 34:10; 37:25; 55:22; Filipos 4:6, 7) Ti kaadda ti nasinged a relasion ken Jehova a Dios ti kapapatgan, ta ikarina: “Saankanto a pulos panawan ket saankanto a pulos baybay-an.”​—Hebreo 13:5.

Adda man panggedan ti maysa wenno awan, paregtaen ti Sao ti Dios ti isuamin a mangpatanor kadagiti kababalin a napateg iti inaldaw a panagbiag. Saan a nairanrana a no dadduma sapsapulenda dagiti Saksi ni Jehova ken apresiarenda ida kas napudno a trabahador. Surotenda ti balakad ti Biblia nga agbalin a nagaget ken mapagtalkan, saan a nasadut.​—Proverbio 13:4; 22:29; 1 Tesalonica 4:10-12; 2 Tesalonica 3:10-12.

Pannakawayawaya Manipud Panagpulkok iti Kinaawan Panggedan

Adda nangnangruna a makagapu iti kangrunaan a kinakurang ti trabaho​—ti panagimbubukodan ken kinaagum ti tao. Kas kunaen ti Biblia, “ti tao inturayanna ti tao a maipaay iti pagdaksanna.”​—Eclesiastes 8:9.

Ti parikut ti kinaawan ti panggedan​—ken dagiti dadduma pay a parikut​—marisutdanto babaen ti pannakaikkat ti panangituray ti tao, nga adda itan iti “maudi nga al-aldaw[na].” (2 Timoteo 3:1-3) Adda pannakasapul ti maysa a lubong a talaga a baro. Wen, maysa a lubong a sadiay ti nalinteg a kagimongan ti tao mabalinda ti agbiag ken agtrabaho iti sidong ti nalinteg ken awan idumdumana a panangituray, a sadiay awanton ti kinaagum. (1 Corinto 6:9, 10; 2 Pedro 3:13) Dayta ti makagapu no apay nga insuro ni Jesus dagiti tattao nga ikararag nga umay ti Pagarian ti Dios ken maaramid koma ti pagayatanna ditoy daga.​—Mateo 6:10.

Iti naimpadtuan a panangiladawanna iti pannakapukaw ti dadduma a kangrunaan a parikut ti sangatauan, ilawlawag ti Sao ti Dios dagiti epekto dayta a Pagarian: “Sigurado a bangonendanto dagiti balay ket agnaeddanto kadakuada; ket agmuladanto kadagiti kaubasan ken kanendanto ti bungada. Didanto mangbangon ket sabali ti agnaed; didanto agmula ket sabali ti mangan. . . . Dagiti pinilik agragsakdanto iti mabayag iti aramid dagiti imada. Didanto agtrabaho iti ubbaw, wenno agpasngay man a maipaay iti didigra.” (Isaias 65:21-23) Ti panagpulkok iti kinaawan ti panggedan mapukawton iti isuamin a tiempo. No kayatyo a maammuan ti ad-adu pay maipapan ti solusion ti Dios, pangngaasiyo ta makiumankayo kadagiti Saksi ni Jehova iti lugaryo.

[Footnote]

[Kahon iti panid 11]

Panangpataud iti Trabaho iti Pagtaengan

• Panagawir, panangaywan iti ubing

• Panaglako kadagiti immula a nateng wenno sabsabong

• Panagdait, panangbaliw, ken panag-repair iti kawes

• Por pedaso a panagpataud agpaay kadagiti managpataud

• Panag-bake ken panangisagana iti taraon

• Quilting, panaggansilio, panag-knitting; panagaramid ti macramé, damili; dadduma nga alikamen

• Panag-upholster

• Bookkeeping, panagmakinilia, serbisio ti home computer

• Serbisio a panagsungbat ti telepono

• Panagpukis/panagkulot ti buok

• Panagpakasera

• Panagikabil ti direksion ken panagisobre iti surat agpaay kadagiti panagyanunsio

• Panagdalus ken panangpasileng iti kotse (iyeg dagiti makinkua ti kotseda iti pagtaenganyo)

• Panangpapintas ken panangwatwat kadagiti taraken

• Panagtarimaan ti panulbekan ken panagaramid ti tulbek (idiay balayyo ti pagtarimaanan)

• Dagiti anunsio iti adu kadagitoy a trabaho mabalin a maikabil iti ngudot’-lawas a warnakan a libre wenno iti nalaka laeng a bayad wenno iti pagyanunsiuan iti supermarket.

[Kahon iti panid 11]

Panangpataud iti Trabaho iti Ruar ti Pagtaengan

• Panagbantay iti sabali a balay (no agbakasion dagiti tattao ket kayatda a mabantayan ti balayda)

• Panagdalus: kadagiti tianggi; opisina; pagtaengan ken apartment kalpasan ti konstruksion, kalpasan ti uram, kalpasan ti iyaakar ti tattao; panagtagibalay (iti pagtaengan ti sabsabali); kadagiti tawa (ti negosio wenno balbalay)

• Panagtarimaan: amin a kita dagiti appliance (addaan dagiti libraria kadagiti nalaka a suroten a libro maipapan iti panagtarimaan)

• Kinalaing kadagiti nanumo a trabaho: panagdiding iti balbalay; panagaramid kadagiti cabinet, ruangan, beranda; panangpintura; panagalad; panagatep

• Panagtrabaho iti talon: panagmula wenno panagani, panagburas ti prutas

• Interior landscaping ken panangaywan iti mula: kadagiti opisina, banko, shopping plaza ken atrium, lobby

• Panangaywan iti sanikua: janitor, superintendent (no dadduma iramanna dagiti libre a pagnaedan)

• Insurance, real estate

• Panagikabil iti alpombra, panagdalus

• Panagitulod iti diario (nataengan ken ubbing), dadduma a serbisio ti panagitulod: anunsio, bayad agpaay kadagiti munisipio

• Panagyakar, panagipempen

• Landscaping, panagarbas iti kayo, panangaywan iti lawn, panagpukan iti kayo

• Panagmaneho iti school-bus

• Panagretrato (retrato ken okasion ti publiko)

• Appan dagiti mangngalap

• Panagisukát: isukát ti panagtarimaan iti kotse iti elektrikal a trabaho, panagdait para iti panagtubero, kdp.

[Ladawan iti panid 10]

“Dagiti pinilik agragsakdanto iti mabayag iti aramid dagiti imada.”​—Isaias 65:22