Manipud Managbasatayo

Holocaust Kanayon a pampanunotek idi no apay nga awan ti nangirakurak maipapan iti Holocaust. Dagiti serye “Ti Holocaust​—Asino ti Nangirakurak?” (Agosto 22, 1995) ti nangsungbat iti saludsodko. Nangirakurak dagiti Saksi ni Jehova, ket ipagpannakkelko dagiti padak a Saksi!

C. B., United States

Mabalin kadi​—nupay saanak a miembro​—a kablaawankayo iti panangilawlawagyo iti tema a Holocaust. Ti nagsayaat a panangilawlawagyo iti daytoy sinasairo a pannakaiparangarang ti kinaulpit ti tao iti padana a tao ti kalalawagan pay laeng a nabasak. Ti tured dagiti padayo a Saksi kadaydi a tiempo ti maysa a banag a nakalkaldaang ta saan unay nga ammo ti lubong.

L. B., England

Natay ni tatangko idiay Sachsenhausen. Nakettel met ti biag ti inaunaan a manongko gapu iti panangibalud dagiti Nazi. Adda pay la dagiti nalawag a lagipko iti panangidadanes dagiti Nazi kadagiti Saksi ni Jehova. Matignayak ngarud a mangyebkas iti panangapresiarko kadagiti artikulo. Nagsayaat unay ti naaramidanyo!

F. D. J., Canada

Naabbukay unay ti riknak kadagiti artikulo. Ngem diak umanamong a dagiti Saksi ni Jehova laeng ti kakaisuna a “timek iti tengnga ti kinaulimek.” Pinakdaaran met dagiti Komunista dagiti tattao maibusor ken ni Hitler sakbay a nagturay. Adu ti nagpatingga kadagiti kampo konsentrasion.

B. W., Germany

Sidadaan a bigbigen ti “Agriingkayo!” nga adu ti napolitikaan a kabusor ni Hitler. Nupay kasta, espesipiko a tinukoy dagiti artikulo ti pannakapaay dagiti narelihiosuan nga organisasion, a kaaduan ti nakikappon iti rehimen a Nazi. Binigbig dagiti Nazi a mismo a dagiti Saksi ni Jehova ti kangrunaan a relihion a bumusbusor kadakuada. Dagiti Saksi ngarud ti kakaisuna a narelihiosuan a grupo a naikkan iti bukodda a simbolo a pakabigbigan dagiti balud kadagiti kampo konsentrasion​—ti di nalatak a lila a trianggulo.​—ED.

Ginggined Idiay Japan Nagsangitak a nangbasa iti artikulo a “Kellaat a Didigra Idiay Japan​—No Kasano a Sinaranget Dagiti Tattao.” (Agosto 22, 1995) Napukawko ti paboritok a Kristiano a kabsat a babai iti dayta a ginggined. Nakaregregta. Ammok a mapagungarto ket makitakto manen. Agyamanak unay iti amin a naespirituan ken namaterialan a tulong a naawatmi manipud iti kongregasion ken iti Sosiedad. Ngem makasangitak pay laeng no malagipko ti napasamak iti dayta nga aldaw.

T. M., Japan

Naan-anay a nasdaawak iti organisado ken napartak a panagtignay dagiti Saksi. Idi nabasak ti mangisakit a mensahe manipud kadagiti kakabsat iti kongregasion idiay Korea, sangitak la a sangit. Nakaragragsakak a mangpanunot a pasetak iti kasta a nadungngo nga organisasion.

M. K., Japan

Seksual a Panangriribuk Pagyamanan iti artikuloyo nga “Agimtuod Dagiti Agtutubo . . . Seksual a Panangriribuk​—Kasano a Masalaknibak ti Bagik?” (Agosto 22, 1995) Agtawenak iti 17, ket naam-ammok ti maysa a di-Kristiano a lalaki idiay eskuelaan. Nagtalekak kenkuana, ngem idi agangay, isu ken dagiti gagayyemna ti mangrirriribuk kaniak babaen kadagiti naalas a singasing ken pangta. Kasapulan nga umikkatak iti dayta nga eskuelaan tapno maliklikak ti kasasaad. Adu ti nasursurok iti daytoy nga artikulo. Ita ammokon no anianto ti aramidek no maipapan iti pannakilangenko iti kasungani a sekso.

T. G., Portugal

Seksual a rirriribuken ken butbutngennak idi ti maysa a katrabahuak. Tangay naabusoak idi ubingak, masansan a marigatanak a mangikaluya iti bagik. Nupay kasta, namin-adu a kiniddawko kenkuana a sardengannakon a riribuken. Kamaudiananna, impulongko kadagiti nangyempleo kadakami, isu a dinakon rirriribuken. Talaga nga apresiarek ti artikulo. Masapul nga ammuen dagiti babbai no kasanoda a tamingen daytoy a parikut.

V. A., United States