Nakristianuan nga Ayat Agpapan pay Kadagiti Didigra Idiay Mexico
IMPADAMAG ti maysa a periodiko idiay Mexico City: “Kabayatan ti napalabas a 20 nga aldaw, nasaplit dagiti kosta ti Mexico kadagiti didigra ti nakaparsuaan—bagyo ken ginggined—a nakaigapuan ti ipapatay ken pannakadadael.”—El Financiero, Oktubre 17, 1995.
Nakaro ti panangsaplit ti Bagyo nga Opal kadagiti estado ti Mexico a Campeche, Quintana Roo, ken Tabasco idi nasapa a paset ti Oktubre. Gistay 200 ti nagudas, nasurok a 150 ti nadangran, 500,000 ti nagsagaba iti pannakapukaw, ken rinibu a balay ti nadadael wenno naan-anay a nadadael.
Apaman a nadamag ti sanga nga opisina dagiti Saksi ni Jehova idiay Mexico ti pannakadadael, adda naibaon a mangammo iti kasasaad dagiti Saksi kadagiti naapektaran a lugar. Naammuan a nasurok a 2,500 kadakuada ti napilitan a mangpanaw kadagiti balayda. Dagitoy ti siaasi a pinadagús dagiti padada a Saksi.
Naorganisar dagiti sentro ti saranay. Naipaay dagiti taraon, kawes, ken kuarta kadagiti agkasapulan. Idi immes-esen ti layus, rinugian manen dagiti Saksi ti nangbangon iti balbalay dagiti Kristiano a kakabsatda.
Idi Oktubre 9, ti napigsa a ginggined a narukod kas 7.6 iti Richter scale ti nangdadael kadagiti estado ti Mexico a Colima ken Jalisco. Walo a Kingdom Hall dagiti Saksi ni Jehova ti nakarot’ pannakadadaelda. Sangapulo ket dua kadagiti balayda ti narba, ket agarup 65 ti nadadael. Naorganisar manen ti komite ti saranay, ket naipaay ti tulong.
Kalpasanna, idi Oktubre 20, sabali manen a ginggined ti dimteng, a nanggunggon iti estado ti Chiapas. Nadadael ti balbalay dagiti 88 pay a Saksi, ket 38 ti nakarot’ pannakadadaelda. Dua a Kingdom Hall ti naan-anay a narba, ket uppat pay ti nakarot’ pannakadadaelda. Gistay maigiddato a napakuyogan ti layus maigapu iti Bagyo a Roxanne ti nangdadael iti balbalay ti agarup 80 a Saksi iti estado ti Veracruz. Uppat a balay ti naan-anay a nadadael. Madagdagus a nangipasdek dagiti Saksi ni Jehova iti pondo ti saranay agpaay kadagitoy a biktima.
Nupay nagsagaba ti sumagmamano a Saksi iti sugat ken pannakapilay, awan ti natay kadagitoy a didigra ti nakaparsuaan. No dagupen, agarup 24 a tonelada ti taraon ken 4 a tonelada a kawes ti naipatulod kadagidiay agkasapulan. Adu a managpaliiw ti nangyebkas iti pannakaabbukay ti riknada iti trabaho a panangsaranay. Imbaga ti maysa a babai idiay Colima: “Nadamagko laeng idi a nakaur-urnos dagiti Saksi ni Jehova, ngem ita makitak a mismo daytan.”
Masansan a kinuna dagiti tattao maipapan kadagiti Saksi ken iti trabahoda a panangsaranay: “Talaga nga agkakabsatda.” “Naur-urnosda a grupo.” Nangngegan pay ti dadduma a nangikuna: “No amin a grupo a mangsaranay nga immay timmulong ti agtrabaho a kas kadagiti Saksi ni Jehova, nadalus koman ti intero nga ili.”
Ita nasurok nga 440,000 a Saksi ti mangiramraman iti naimbag a damag ti Pagarian ti Dios kadagiti padada a Mexicano. Ti ayat nga imparangarangda iti maysa ken maysa kabayatan dagitoy a nabiit a didigra ti nakaparsuaan ti nangipaay iti nabileg a panangsaksi.—Juan 13:34, 35.