Manipud Managbasatayo

Memoria Agyamanak unay iti artikulo a “Maparang-ayyo ti Memoriayo.” (Abril 8, 1996) Iti napalabas, inkagumaak a tandaanan ti nagnagan amin a kakongregasionak a Saksi ni Jehova​—ngem diak nabaelan. Lallalo a napilitanak idi a ti Watch Tower Society tinudingannak nga agserbi kas agdaldaliasat a ministro. Daytoy nga artikulo ti nangsungbat kadagiti kararagko! Babaen ti panangyaplikarko kadagiti naisingasing, nabaelak met laengen a tandaanan ti nagnagan ti nasurok a kagudua kadagidiay naam-ammok iti walo a nadumaduma a kongregasion.

C. E. U., Nigeria

Nasarakan ti Dios Pagyamanan unay iti artikulo nga “Impalubos ti Dios ti Pannakasarakmi Kenkuana.” (Marso 22, 1996) Bayat a basbasaek, nagarubos ti luluak gapu iti rag-o para kada Scott ken Steve Davis. Ti kapadasanda ti nangpabileg iti determinasionko a pagbalinen ti amin-tiempo a ministerio kas karerak apagturposko iti eskuelaan.

G. G., Italia

Ita pay la a nakabasaak iti kapadasan a naisangsangayan ken makapikapik-puso a kas itoy! Sigurado a maragragsakan ni Jehova idi nakitana dagitoy dua a babbaro a mangikagkagumaan unay nga agserbi kenkuana. Makomendaran unay ti awan-imut a panagserbida iti Dios.

J. D., Estados Unidos

Talaga a makaparegta ti pakasaritaan ti panangsarak da Scott ken Steve iti Dios. Binirbirokko met ti Dios iti adu nga iglesia ngem diak pulos napnek. Kayatko unay idi nga ay-aywen ti Dios ngem diak ammo no kasano nga aramiden dayta. Anian a yamanko ta ammo ni Jehova dagiti arungaing ti pusok! Ti panagserbi ken Jehova ti nangispal iti biagko ken nangted kaniak iti talna.

D. C., Estados Unidos

Panangsalaknib ti Dios? Malmaldaangak idi gapu ta impagarupko no di ikankano ni Jehova dagiti kararagko. Nupay kasta, ti artikulo a “Ti Panangmatmat ti Biblia: Mainanama Kadi Dagiti Pudno a Kristiano ti Pannalaknib ti Dios?” (Abril 8, 1996) ti nakatulong kaniak a mangtarus nga agtignay ti Dios maitunos iti pangpanggepna ken saan a kanayon a maitunos kadagiti kalikagumantayo. Sapay koma ta bendisionannakayo ni Jehova bayat nga agsuratkayo kadagiti artikulo a tumulong kadakami nga agtalek kenkuana.

C. A. A., Brazil

Segunda-Mano a Kotse Pagyamanan iti artikulo a “No Kasano ti Gumatang iti Segunda-Mano a Kotse.” (Abril 8, 1996) Kagatgatangmi nga agassawa iti segunda-mano a kotse. Kasla mayat ti andarna idi damo, ngem kalpasan ti dua a lawas, nangngegmin a naungor ti unina. Kalpasan ti innem a lawas, naperdin a namimpinsan ti kotse. No la koma ta nasaksakbay a naawatmi daytoy a nagsayaat nga impormasion, nalabit saankam koma a naaddaan iti perdin a kotse a nakagarahe la itan.

M. C., Estados Unidos

Kas maysa a propesional a teknisian ti lugan, kayatko nga inayon ti maysa a punto. Sakbay a gumatangkayo iti segunda-mano a kotse, sukimatenyo no dagiti numero iti kaha ti kotse ken ti motor ket maikomplontar iti numero iti porma ti rehistro. No saan wenno no naburada, mabalin a nakagatangkayo iti tinakaw a kotse!

M. V., Czech Republic

Pagyamanan iti makatulong a singasing.​—ED.

Awanan Asuk a Sigarilio Pagyamanan iti artikulo nga “Agimtuod Dagiti Agtutubo . . . Awanan Asuk a Sigarilio​—Di Aya Makadangran?” (Abril 22, 1996) Talaga a diak naawatan ti paulo, a nangtignay kaniak a mangbasa iti artikulo. Nupay diak pay naipasango iti daytoy a parikut ditoy Togo, timmulong ti artikulo kaniak a mangtarus kadagiti kita ti parikut a mangap-apektar iti sabsabali iti nadumaduma a paset ti lubong.

C. H., Togo

Pagay-ayatko a basaen amin nga artikuloyo, ngem daytoy pay laeng ti kasayaatan. Addada agtutubo ditoy a mangus-usar iti awanan asuk a sigarilio, ngem namakdaar daytoy nga artikulo maipapan kadagiti peggad. Pulos a diakto mangusar iti dayta.

P. H. W., Brazil