Kinaranggas Kadagiti Babbai
BABAEN TI KORESPONSAL TI AGRIINGKAYO! IDIAY NIGERIA
MANIPUD aanakan agingga ken tanem, dagiti babbai agbalbalinda a biktima iti kinaranggas, sigun iti Human Development Report 1995 ti United Nations. Ipalgak dagiti panagadal iti intero a lubong ti sumaganad:
Sakbay ti pannakaipasngay. Iti dadduma a pagilian, maar-aramid dagiti panangeksamen tapno maammuan no lalaki wenno babai ti sikog. Masansan a mairegreg ti babbai.
Iti kinaubing. Idiay Barbados, Canada, ti Netherlands, New Zealand, Norway, ken ti Estados Unidos, 1 a babai iti kada 3 ti mangireport a seksual a naabusoda kabayatan ti kinaubing wenno panagbalasangda. Iti Asia ken sadino man pay, agarup maysa a milion nga ubbing—kaaduanna babbai—ti mapilit nga agbalangkantis iti kada tawen. Minilion a babbalasitang ti agsagaba iti pannakakugit ti mabagbagida.
Iti kinamataengan. Idiay Chile, Mexico, Papua New Guinea, ken ti Republika ti Korea, 2 iti kada 3 a kasado a babbai ti biktima iti kinaranggas iti pagtaengan. Idiay Canada, New Zealand, ti United Kingdom, ken ti Estados Unidos, 1 a babai iti kada 6 ti marames.
Iti kinabaket. Nasurok a kagudua kadagiti babbai a napapatay idiay Bangladesh, Brazil, Kenya, Papua New Guinea, ken Thailand ti pinapatay dagiti napalabas wenno agdama a seksual a kaparehada. Idiay Africa, Sud America, sumagmamano nga isla iti Pacifico, ken ti Estados Unidos, ti kinaranggas iti panagasawa ti kangrunaan a pakaigapuan ti panagpakamatay ti babbai.
Ti kinaranggas kadagiti babbai ipamatmatna ti awagan ti Biblia a “maudi nga al-aldaw,” a kaaduan ti “abusado,” “awanan asi,” ken “brutal.” (2 Timoteo 3:1-5, New American Bible) Makapagyamantayo iti kari ni Jehova a Dios a kalpasan dagitoy a nariribuk a “maudi nga al-aldaw,” mangipasdekto iti natalna a baro a lubong a sadiay dagiti agindeg iti daga “agnaeddanto a sitatalged, ket awanto ti mangpabutengen kadakuada.” (Ezequiel 34:28; 2 Pedro 3:13) Iti sidong ti Pagarian ti Dios, ni Jesu-Kristo “ispalennanto ti makasapul intono umkis, ken ti napanglaw nga awan mangarayat kenkuana. Subbotennanto dagiti kararuada iti panangirurumen ken iti panangrabsut.”—Salmo 72:12, 14.