Aggayyemkami a Di Agsinsina

MAYSA a nangisit, sangapulo ti tawenna a retriever ti aso a giyak a ni Tracy. Gapu kenkuana, talaga a makapasiapasiarak a kas iti gagangay. Makadua ken maliwliwanak met. Isu a di pakasdaawan a nasursurok a sidudungngo nga ayaten ket aggayyemkami a di agsinsina.

No dadduma, di igaggagara a mangupay dagiti tattao iti wagas a pulos a di aramiden ni Tracy. Maysa nga aldaw, kas pagarigan, imbatik ni Tracy idiay balay ken nagnaak a kadua ti maysa a gayyem. Siraragsak nga agsinsinnaritakami idi kellaat a natumbaak. Nalipatan ti gayyemko a bulsekak, ket dinak pinakpakaunaan maipapan iti nangato a pagnaan iti igid ti kalsada. Pulos a di koma napasamak daytoy no kaduak ni Tracy.

Naminsan, aktual nga inispal ni Tracy ti biagko. Magmagnaak iti kalsada idi kellaat nga adda trak a din magawidan ti panagsikkona a mangdungpar kaniak. Nangngegko ti ungorna ngem, siempre, diak makita ti tu-  rongenna. Nakita ni Tracy ken naawatanna ti peggad ket dagus a ginuyodnak tapno diak maan-ano.

Bulsek, Ngem Makakita

Naipasngayak idi 1944 idiay abagatan ti Sweden ket bulsekakon sipud pay pannakayanakko. Naibaonak iti boarding school para kadagiti bulsek nga ubbing, a nakasursuruak nga agbasa ken agsurat iti Braille. Nagbalin a kapatgan a paset ti biagko ti musika, nangnangruna ti panagtokar iti piano. Kalpasan ti panagturposko iti haiskul, intultuloyko ti nagadal iti pagsasao ken musika idiay University of Göteborg.

Agnanayon a nabalbaliwan ti biagko, nupay kasta, idi dua kadagiti Saksi ni Jehova ti timmuktok iti ruanganko iti kampus ti unibersidad. Di nagbayag, tumabtabunoakon iti gimong dagiti Saksi ken rinugiak payen nga iranud dagiti naadalko iti sabsabali. Idi 1977, insimbolok ti dedikasionko ken Jehova a Dios babaen ti bautismo iti danum. Nupay bulsekak iti pisikal, babaen ti panagadalko iti Sao ti Dios, immawatak iti banag a napatpateg nga amang​—ti naespirituan a pannakakita.

Ibilangko ita ti bagik a nasaysayaat ngem kadagidiay makakita iti pisikal ngem bulsek iti naespirituan. (Idiligyo ti Juan 9:39-​41.) Maragsakanak ta naaddaanak iti nalawag a panangsirmata buyogen ti pannakaawat iti baro a lubong ti Dios a sadiay, sigun iti karina, makakitanton dagiti mata ti bulsek​—wen, sadiay maagasanton amin a pisikal nga an-annayen ken sadiay mapagungarton uray dagiti natay!​—Salmo 146:8; Isaias 35:5, 6; Aramid 24:15.

Nupay di naasawaan ken bulsekak no iti pisikal, babaen ti kaadda ni Tracy kas matalek a kaduak, nasayaat met latta ti kasasaadko. Palubosandak a mangiladawan no kasano a tultulongannak a mangitultuloy iti sekular a panggedak ken aramidek ti ministeriok kas maysa kadagiti Saksi ni Jehova. (Mateo 24:14; Aramid 20:20; Hebreo 10:25) Ngem umuna, iyam-ammok pay ni Tracy.

Napili Agpaay iti Naisangsangayan a Pannakasanay

Idi walo pay laeng a bulan ni Tracy, nasubok tapno makita no kualipikado met laeng kas aso a giyak. Napaneknekan a kalmado, nalaka nga isuro, ken saan a nalaka a mapabutngan kadagiti kellaat a napigsa nga uni. Gapuna, nakipaggian iti maysa a pamilia iti sumagmamano a tiempo tapno maadalna ti normal a panagbiag ti maysa a pamilia. Kalpasanna, idi nataenganen, naipan iti maysa nga eskuelaan a pakasanayan dagiti aso a giya.

Iti daytoy nga eskuelaan, nasursuro ni Tracy no aniat’ makalikaguman iti maysa nga aso a giya, nga isut’ tumulong iti masakbayan nga amona a mangsapul iti ridaw, agdan, ruangan, ken desdes. Nasursurona met no kasano ti magna kadagiti aduan tao nga igid ti kalsada ken no kasanot’ bumallasiw iti kalsada. Nasursuruan met nga agsardeng iti nangato a paset ti kalsada, agtulnog kadagiti pagilasinan iti trapiko, ken lisian dagiti napeggad a tubeng. Kalpasan ti agarup lima a bulan a pannakasanayna, nakasaganan nga agtrabaho. Idin a nayam-ammo ni Tracy kaniak.

No Aniat’ Aramiden ni Tracy Kaniak

Binigat a riingennak ni Tracy tapno pakanek. Kalpasanna, agsaganakamin a mapan iti trabaho. Ti opisinak ket agarup 20 minuto a pagnaen manipud apartmentko. Siempre, ammok ti dalan, ngem ti trabaho ni Tracy ket tulongannak a makagteng sadiay a saanak a maidungpar kadagiti lugan, tattao, poste ti silaw, wenno aniaman pay. No sumangpetkamin, agidda iti sirok ti lamisaanko. Kalpasanna, no pangngaldaw, kadawyanna, agpagnapagnakami.

No rabii, no nakaawidkamin manipud panggedan, mangrugin ti kasayaatan a paset ti aldawmi. Daytoy ket no igiyanak ni Tracy iti trabaho a panangasaba iti binalaybalay ken iti balbalay dagiti iyad-dalak iti Biblia. Mannakigayyem ti adu a tattao kenkuana, a pikpiken ken arakupenda ket no dadduma ikkandak iti naimas nga ipakankonto kenkuana. Linawas met a tabunuanmi dagiti Nakristianuan a gimong. Kalpasan dagitoy, pagay-ayat dagiti ubbing a kablaawan ken arakupen ni Tracy a pakaragsakanna unay.

Maamirisko a ni Tracy ket maysa laeng nga aso ken addanto aldaw a matay. Kaipapananna a kasapulan a mangalaakto manen iti sabali nga aso a giyak. Ngem, tangay adda pay laeng, agkabadangankami ken kasapulanmi ti maysa ken maysa. No awan ni Tracy, talaga nga agalikakaak, ket agnerbios ken alusiisen no dinak maigiya.

Kasapulan ti Pannakaawat

Nakaskasdaaw ta no dadduma, padasen dagiti tattao a pagsinaendakami. Matmatanda ni Tracy kas ordinario laeng nga aso wenno taraken ket dida maawatan ti nasinged a relasionmi. Rumbeng a maawatan dagitoy a tattao a, para kaniak, ni Tracy ket kas iti wheelchair para iti paralisado a tao. No pagsinaendakami, kas ket tay ikkatenda dagiti matak.

No nasaysayaat ti pannakaawat dagiti sabsabali iti relasionmi a dua ken ni Tracy, manmanonto dagiti problema. Nalaka a maawat ti wheelchair, kas pagarigan, ngem daksanggasat ta saan a kanayon a kasta iti aso a giya. Mabuteng ti dadduma a tattao kadagiti aso, wenno basta dida kayat ida.

Makatulong unay ti impormasion a masarakan iti broshur maipapan kadagiti aso a giya, nga impablaak ti Swedish Association for the Visually Handicapped. Kunana: “Ti aso a giya ket kabinnadang tapno makapagnapagna ti tao nga adda deperensia ti matana. Kinapudnona, saan la a dayta. Daytat’ sibibiag a tulong. . . . Daytat’ gayyem a pulos a dinto mangpaay kenka.”

Kinapudnona, agserbi ni Tracy kas matak iti kasipngetan, ken uray kaskasano, tultulongannak ita nga agbiag a normal. Kaskasdi, a kombinsidoak a din agbayag, iti inkari ti Dios a baro a lubong, makitakton amin dagiti makapaamanga, nakaskasdaaw a parsua. Gapuna, a determinadoak itan a mangtaginayon iti naespirituan a panagkitak.

Isu a tangay, nakasadagen ti ulo ni Tracy iti saklotko, nakasaganakam itan a dumngeg iti nairekord a kabaruan a ruar ti magasin a Pagwanawanan.​—Kas insalaysay ni Anne-Marie Evaldsson.