“Ti Kamaten ti Tumatayab iti Katuduan...”

Babaen ti koresponsal ti Agriingkayo! idiay Nigeria

IDI naawat ti bassit a kongregasionmi idiay abagatan a Nigeria ti suplayna a tract a Kingdom News No. 34, a naibunong iti sangalubongan, nagagarankam a nangibunong iti kopia iti amin a paset ti teritoriami. Adda rigrigatna dayta. Addada kampo a pagnanaedan dagiti agmulmula iti kamoteng kahoy, yam, ken dadduma a mula iti las-ud ti teritoriami. Masarakan dagitoy a kampo iti kaunggan dagiti matutudo a kabakiran iti tropiko. Narigat ida a danonen ngem posible met ketdi. Ngamin, ti pagayatan ti Dios ket madanon koma amin a kita ti tattao, agraman dagiti agmulmula idiay kabakiran.​—1 Timoteo 2:3, 4.

Isu nga idi Oktubre 16, 1995, 18-kami a nagrubbuat iti alas 7:30 t.b. a mapan iti kampo dagiti mannalon a napanaganan iti Abomgbada, nga agarup tallo ket kagudua a kilometro ti kaadayona. Iti katengngaanna, masapul a ballasiwenmi ti maysa a karayan. Pagassiket ti danum.

Tapno madanon ti sabali a kampo iti isu met la nga aldaw, masapul a bumallasiwkami iti dakdakkel a karayan. Ita, uppat laeng a kakabsat a lallaki ken maysa a kabsat a babai ti bimmallasiw iti dayta. Nabati ti dadduma a paset ti grupo.

Adu ti nasarakanmi nga interesado iti dayta nga aldaw. Ti nangnayon iti rag-omi ket ti awaganmi a binglaymi iti kakaykaywan. Bayat a nagnakami, pimmuros ken nangankami iti sumagmamano a prutas a bunga ti kabakiran. Adu ti naam-ammomi a managpasangbay nga agmulmula a nangapresiar iti panagreggetmi a mangdanon kadakuada; inikkandakami kadagiti naranghita tapno mabang-aran ti wawmi. Agarup 250 a tattao ti nakasaritami, a nangibunonganmi iti amin a tract nga intugotmi.

Dakkel a Karit

Dimteng ti dakkel a karit dua nga aldaw kalpasanna. Sangapulo ket dua a kilometro ti kaadayo ti Ose Anasi, maysa a kampo a nalabit pulos a di pay nadanon ti organisado a panangasaba. Agalikaka ti dadduma a mapan sadiay. Napeggad ti ibaballasiw iti Karayan Urasi, ket adu kadakami ti di makalangoy. Napeggad ti ibaballasiw gapu kadagiti natirad a pungdol ti kaykayo. Nagalis dagiti napitak a lugar, ket makadangran ti pannakaikaglis. Saan a natibker ti dadduma nga aramid-ima a rangtay. Addada uleg, buaya, ken karayan nga aduan iti alimatek.

Uray no kasta, inkeddeng ti sangapulo ket innem kadakami ti mapan. Nagnakami iti agarup maysa ket kagudua a kilometro sakbay a nakalugankami iti bilog tapno ballasiwen ti naapres ken napeggad a Karayan Urasi. Masapul a salugenmi idi ti narangkis a turod tapno madanonmi ti bilog. Matutudo idi, ket agdakkel ti karayan. Sekka ti daga ti intero a disso; ket no matutudo, nakagalgalis. Idi dimsaagkamin iti bilog, natakuatanmi a nagbalinen a karayan ti nagnaanmi a sangametro ti kaadalemna iti dadduma a lugar. Idin a nangrugi ti nakaro a rigatmi.

Agarup 30 minuto a bimmallasiwkami iti daytoy a karayan. Nakagalgalis ti daga nga adu kadakami ti naikaglis iti napitak a danum, a nangrusep kadagiti Biblia, magasin, ken tract-mi. Naragsakkami, isu a no adda maikaglis, agkatawakami amin, agraman daydiay naikaglis.

Bayat a binallasiwmi ti waig, kimpeten dagiti alimatek iti gurongmi. Nakaro ti iriag ti agtutubo a kabsat a babai a kinaptan ti alimatek ti gurongna. Agir-iriag pay laeng kalpasan a naikkaten ti alimatek. Kinatawaanmi met dayta kas paset ti pannakigasanggasatmi, ket intuloymi ti pannagnami.

Iti sabali pay a panagballasiw iti karayan, maysa a kabsat ti nangikeddeng a din bumallasiw a kas iti dadduma no di ket lumagto laengen a bumallasiw. Naballasiwna nga agpayso ti danum ngem saan ti pitak. Naikaglis, ket napadata iti kapitakan. Idi bimmangon, kinitana a naimbag ti bagina ngem saan a nadangran, sa kinunana: “Dikay madanagan; paset dayta ti kapadasan.” Nalagipmi nga uray ni apostol Pablo idi ti naaddaan met iti “peggad iti karkarayan,” a nalabit nakarkaro ngem kadagiti sinarangetmi.​—2 Corinto 11:26.

Nagnakami iti aramid-ima a rangtay, a napeggad no kitkitaen, ngem naballasiwmi amin dayta. Kalpasanna, ad-addan a gimmalis ti lugar, isu a nagkaraikagliskami.

Kaduami ti maysa a regular pioneer a kabsat a lakay a dandani 70 ti tawennan. Iti dayta nga agsapa, immay tapno parubbuatannakami iti biahemi. Ngem kalpasan ti panagkararagmi iti pammendision ni Jehova, inyimtuodna: “Apay ketdin a mabatiak idinto ta mapankay amin mangasaba?” Impapilitna ti sumurot, ket awan kadagiti nasaomi ti namkuatanna nga agbati. Kinunana nga addanto ni Jehova kenkuana. Isu nga immay.

Idi naigalis a napadata iti daga, awan ti nagkatawa. Tangay madanagankami, dinamagmi no nasaktan. Simmungbat: “Saan. Nabannayat ti pannakatnagko tapno diak madangran ti daga.” Nagkakatawakami iti bang-armi ket nalagipmi ti Isaias 40:31, a kunana a “dagiti agpannuray ken Jehova pabaruendanto ti pigsada.”

Dagiti Manangapresiar a Managimdeng

Nagtengmi met laengen ti destinasionmi. Makaparegta unay ti sungbat dagiti umili. Napabutngan ti maysa a lalaki idi nakitanakami nga umas-asideg iti kalapawna, ngem idi naammuanna no siasinokami, kinunana: “Kasla diak patien a nabaelanyo ti nagrigat a biahe tapno umaydakam laeng kasabaan. Apresiarenmi dayta.” Simmungbatkami babaen ti pagsasao ti lugar a: “Ti kamaten ti tumatayab iti katuduan ket napateg kenkuana.” Naawatan ti lalaki.

Kinuna ti sabali pay nga agmulmula: “No nakagtengen ti panangasaba iti daytoy a lugar, kaipapananna a ti pannakaisalakan nakagtengen kadakami.” Adu ti addaan salsaludsod a nasungbatanmi. Kiniddawda nga umaykamto manen, ket inkarimi nga agsublikamto.

Nakaipaimakami iti agarup 112 a tract idiay Ose Anasi​—amin nga intugotmi. Agarup 220 a tattao ti amin a nakasabaanmi.

Idi agawidkamin, nayaw-awankami. Maysa nga oras ket kagudua ti nabusbosmi a nangtunton kadagiti tugotmi nga agturong iti kampo, sa rumabii payen. Nagkararagmi ken Jehova a siuulimek ket inkeddengmi ti magna latta, nupay kaipapananna a ballasiwenmi ti napeggad a karayan a pagatpatongmin.

Kalpasan ti ibaballasiwmi, nasarakanmi ti dalanmi ket nasdaawkami a nakauppat ket kakalimakamin iti dalanmi nga agawid. Ti gayam pannakapukawmi ti nangpaababa iti biahemi iti agarup maysa nga oras! Siempre, naragsak ken nagyamankam amin ken ni Jehova. Apaglennek ti init, nakaawidkamin​—nabannog ken mabisbisin ngem nakaragragsak.

Idi agangay, bayat a nagsasaritaanmi dagiti kapadasanmi iti dayta nga aldaw, kinuna ti maysa a kabsat a babai: “Adun ti nadamagko maipapan iti napanantayo, isu nga ammok a maikaglisak. No saan a gapu iti naimbag a damag, diak koma nadanon daytoy a lugar, uray pay no naited kaniak ti amin a kuarta daytoy a lubong!” Indir-i ti maysa a kabsat a lalaki: “Nakagteng met laengen ti naimbag a damag idiay Ose Anasi!”

[Dagiti ladawan iti panid 23]

Ibaballasiw iti maysa a lokal a rangtay

Binallasiwmi ti adu a karayan nga aduan iti alimatek

Iti sakaanan daytoy a napeggad a desdes, naglugankami iti bilog a bumallasiw iti Karayan Urasi