Manipud Managbasatayo
Panangiggem iti Kuarta Agyamanak unay kadagiti serye a “Kasanoyo nga Iggaman ti Kuartayo?” (Disiembre 22, 1996) Gastador ken diak unay makatepteppel. Ngem kalpasan a nabasak dagiti artikulo, rinugiakon a kontrolen ti panaggastok. Ita no adda tarigagayan ti matak, damagek iti bagik no talaga a kasapulak ti kitkitaek.
J. B., Brazil
Lima a bulanen nga awan trabaho ni lakayko, ket addaankam iti tallo nga annak a masapul a biagen. Isu nga inrugik nga iyaplikar ti dadduma kadagiti singasing iti artikulo. Nangalaak iti kuaderno, nangugedak iti sumagmamano a benneg, ket nagaramidak iti badyet. Iti daytoy a pamay-an nayan-anaymi ti kuartami iti napalabas a tallo a bulan ket kaskasdi nga adda pay bassit a nabati para kadagiti di mapakpakadaan a pasamak. Talaga nga agkurri ti panagbadyet!
L. S., Czech Republic
Panangsaranget Kadagiti Pakasuotan Talaga a magutugotak nga agkomento iti artikulo a “Napabileg a Mangsaranget Kadagiti Pakasuotan iti Masanguanan.” (Disiembre 22, 1996) Napikapikak iti wagas ti panagandur ni Edward Michalec uray pay kadagiti karirikutan a kasasaad. Ti ayatna ken ni Jehova, iti padana a tao, ken iti kinapudno ti nalawag a pinaneknekan ti matalek a kondukta ken naanus a panagibturna.
K. B., Estados Unidos
Ti Sinagaba ni Maggy Pagyamanan iti panangipablaakyo iti artikulo a “Ti Sinagaba ni Maggy ken ti Naiparabur Kaniak.” (Disiembre 22, 1996) Talaga a nagrigat a gebgeban ti luluak bayat a binasak ti panagsakripisio daytoy nga ina kabayatan ti maud-udi nga aldaw ti biagna tapno sisasalun-at la a maipasngay ti balasitangna. Apresiarek met ti komento ni lakayna nga in-inut a naep-ep ti leddaangna bayat nga insarsaritana ti pannakapukaw ni baketna—banag a masansan a liklikantayo no kasaritatayo dagiti kabagian ti pimmusay. Namnamaek a maam-ammokto ni Maggy inton panagungar.
L. S. C., España
Idemostra ti artikulo no kasano a dakami iti kongregasion ket makaipakita iti napaypayso a pannakaseknan iti maysa ken maysa. Impaayan dagiti pada a Kristiano ti lakay ni Maggy iti taraon iti adu a bulan ken kawes para iti maladagana. Anian a leksion para kadakami tapno aramidenmi ti ad-adu pay imbes a basta mangipatulod iti card wenno agtelepono!
P. L., Estados Unidos
Naimpusuan a kayatko ti agyaman kadakayo para iti daytoy nga artikulo. Natay ni baketko iti aksidente ti lugan tallo a lawas kalpasan ti ipapatay ni Maggy, a napanawanna kaniak ti walo nga annak. Maawatak ti saem idi ken uray ita ni Lorne Wilkins. Agyamanak iti panangipablaakyo iti kakasta a kapadasan para kadakami. Talaga a mangpabileg ken mangparegtada kadagiti amin nga agsagaba iti kasta.
B. B., Francia
Umakar ti Kasingedan a Gayyem Kayatko nga iyebkas ti panangapresiarko unay iti artikulo nga “Agimtuod Dagiti Agtutubo . . . Apay nga Immakar ti Kasingedan a Gayyemko?” (Disiembre 22, 1996) Dimteng dayta iti umiso a tiempo. Asidegen nga umakar ti maysa kadagiti gagayyemko; isu ken ni lakayna mapanda agserbi iti maysa a kongregasion a sadiay kasapulan ti ad-adu a manangaskasaba. Nupay maragsakanak unay para kenkuana, ammok a mailiwakto unay kenkuana. Pagyamanan iti nagsayaat a balakadyo.
R. A., Italia
Diyo ngata mailadawan no kasano a napikapiknak ti artikulo idi a ti manangaywan iti sirkitomi, agdaldaliasat a ministro, pinanawannakami tapno agserbi iti baro a destino. Dakkel unay ti naitulongna iti naespirituan ken emosional a kasapulak. Kas iti inyilustrar ti retrato iti artikulo, ti panagpakada ket maysa a nasaem a kapadasan. Anian a naintiempuan dagiti singasingyo ken tumultulong kaniak a mangparmek iti kinaliday.
J. D., Nigeria