Ti Kaadu Dagiti Natay a Kasalisal ti Gubat
IDI kimmuttong ti 23-anyos a ni Marilyn ket mariknana a kumapkapsut, impagarupna a mabalin a ti makagapu iti dayta ket ti napalabas a panagsikogna. Kanayon met nga aguyek, isu a dinakamatna iti doktorna. Imbaga ti doktorna a daytat’ impeksion iti makinngato a paset ti pagangsanna ket nangireseta kadagiti antibiotiko. Kamaudiananna, idi nakaron ti panaglingling-etna iti rabii, pudno a madanaganen ni Marilyn. Nagsubli iti doktorna, a nangyurnos ti panagpa-X-ray-na iti barukong.
Ti nangisit a paset iti X-ray ipasimudaagna a kasapulanna ti dagus a panagtignay, ngem ni Marilyn saan a madanon babaen ti telepono. “Nakasao ni nanangko ti doktor ket imbagana kenkuana a pudno a masakitak,” kinuna ni Marilyn. “Sinapulnak ni nanangko ket imbagana a mapanak a dagus [iti doktor]. Imbaonnak [ti doktor] iti ospital a sadiay naaddaanak iti sabali nga X-ray ket pinagbatidak iti ospital.”
Nakigtot ni Marilyn a nakaammo nga isut’ addaan iti tuberculosis (TB). Impagarupna a matayen, ngem kalpasan ti panagtomarna kadagiti pangsumra iti TB nga agas, naimbagan.
Nalaka a maawatan ti pannakasdaaw ni Marilyn nga isut’ addaan iti TB. Iti di pay nabayag, patien uray pay dagiti propesional iti salun-at a naparmeken ti TB kadagiti industrialisado a pagilian. “Pagarupko a nabayag a napukawen kas iti epidemia,” kinuna ti maysa a clinical assistant iti sentro a pagpaagasan idiay London. “Ngem idi immayak nagtrabaho ditoy, naammuak nga adda pay laeng ken agtultuloy ti iyaaduna iti natao a paset ti siudad.”
Kadagiti lugar a sadiay napukawen ti TB, nagsubli; iti nagtalinaedanna, kimmaro dayta. Imbes a naparmek, ti TB ket mammapatay a kapada ti gubat ken bisin. Amirisenyo:
◼ Nupay adda dagiti nakaskasdaaw a rinang-ayan ti moderno a medisina, iti napalabas a sangagasut a tawen, ti TB nakaibaonen iti agarup 200 milion a tattao iti tanem.
◼ Nakaptanen ti aginggat’ dua a bilion a tattao—kakatlo iti populasion ti lubong—iti TB bacillus, maysa a kita ti bakteria. Mainayon pay, makaptan ti sabali a tao iti TB iti kada segundo!
◼ Idi 1995 ti bilang dagiti tattao nga agpayso nga ag-TB ket agarup 22 milion. Dandani tallo a milion ti natay, kaaduan kadakuada ti adda kadagiti napanglaw a pagilian.
Nupay adda dagiti nasamay nga agas a magun-odan a panglaban iti TB, apay a daytoy a sakit agtultuloy a mangsaplit iti sangatauan? Maparmekto pay kadi? Adda kadi aniaman a pamay-an tapno masalaknibanka iti dayta? Dagiti sumaganad nga artikulo sungbatanda dagitoy a saludsod.
[Picture Credit Line iti panid 3]
New Jersey Medical School—National Tuberculosis Center