Dayawen ti Warnakan ti Russia Dagiti Saksi ni Jehova
NAIDEDIKAR dagiti pasilidad ti sanga dagiti Saksi ni Jehova idiay Russia idi Hunio 21, 1997. Ti complex buklen ti pito a pagdagusan, maysa a dakkel a Kingdom Hall, dining hall, ken dakkel a pasdek a pagopisinaan ken pagipempenan. Masarakan dayta ag-40 a kilometro iti makin-amianan a laud ti St. Petersburg iti purok a Solnechnoye.
Ti dedikasion ket nasaknap a naipablaak babaen kadagiti periodista a naawis iti programa. Maysa kadakuada ti nagsurat iti Literaturnaya gazeta ti Moscow, pagiwarnak a nasurok a kakapat iti sangamilion ti sirkulasionna: “Ti damo nga impresion no kitaem dayta ket, Adtoy ti pagarigan ti de-kalidad a pasdek!”—Kitaenyo dagiti retrato iti panid 16 ken 17.
Inlawlawag ti mannurat a ni Sergey Sergiyenko: “Amin a banag ditoy ket inaramid a mismo dagiti manamati: Ti panangibangon ket inaramid a nangnangruna dagiti taga Finland, Sweden, Denmark, Norway, ken Alemania. Nadalus a ladrilio a kalsada; naarbasan a karuotan; pasdek nga addaan iti nagpipintas a tehado nga atep, dadakkel a tawa, ken de-sarming a ridridaw—daytoy ti sentro administratibo para iti narelihiosuan nga organisasion Dagiti Saksi ni Jehova iti rehion ti Russia.”
Dagiti periodista manipud Moscow, nasurok nga 650 a kilometro iti abagatan a daya ti sanga, ket naawisda iti dedikasion ken naipaayanda iti transportasion. Naipasiarda kadagiti pasilidad, ket kalpasanna, naangay ti saludsod-ken-sungbat a sesion, agraman ti panangpamerienda. Sigun kadagiti kapaliiwanna, insurat ni Mr. Sergiyenko:
“Sigun iti pagsasao, dagiti Saksi ket naemma ken nanumo . . . No uliten ti nalatak a pagsasao dagiti Ruso, ‘Agnanaed dagiti Saksi [iti pagtaenganda] a kaslattay adda iti saklot ni Jehova.’ . . . Kanayon a naasida iti amin a tattao, ngem siempre, ipakpakita dagiti Saksi ti naisangsangayan a pannakaseknanda kadagiti mismo a kakabsatda.”
Nagparang ti artikulo nga insurat ni S. Dmitriyev iti Moskovskaya Pravda, nga inaldaw nga adda sirkulasionna a gistay 400,000. Iti artikulona a napauluan “Maaramidmo ti Bukodmo a Lubong Babaen Laeng Kadagiti Mismo nga Imam,” inlawlawag ti mannurat:
“Kalpasan ti legal a pannakabigbig ti narelihiosuan nga organisasion dagiti Saksi iti Russia [idi 1991], rimsua ti saludsod maipapan iti pannakaibangon dagiti bukodda a hedkuarter. Agsapsapulda idi iti lugar iti asideg ti Moscow idi nga adda dimteng a di ninamnama a damag a mailaklako ti teritoria ti dati a kampo dagiti agtutubo nga asideg iti St. Pete[rsburg]. Nagatang ti daga, ket rinugianda ti agibangon. . . .
“Makatawen ket kagudua, idi Enero 1, 1996, ti tengnga ti purok iti Solnechnoye ket nagbalin nga opisial a sanga ti narelihiosuan nga organisasion. Idi ngalay ti Hunio, ginundawayan ti maysa a grupo dagiti periodista iti Moscow nga ammuen, babaen ti panangbusbosda iti sumagmamano a tiempo idiay St. Pete[rsburg] no, Siasino ngata dagitoy a Saksi ni Jehova?”
Aniat’ sungbat ni Mr. Dmitriyev? “Ordinarioda met laeng a tattao.” Ngem naidumada, kas insuratna iti konklusion ti artikulona: “Adda talna iti nagtetengngaanda, bin-ig a talna. Arapaap kadi dayta? Wen. Ngem kaskasdi nga adda dayta.”
Napaliiw ti sabali pay a periodista iti Moscow a ni Maksim Yerofeyev a nagsurat para iti Sobesednik, maysa a periodiko nga addaan iti sirkulasion a nasurok a 300,000: “Amin a relasion iti daytoy a bassit a komunidad ket nairamut iti sumaganad a prinsipio: Awan ti mapilpilit nga agtrabaho, ngem amin ket situtulok nga agtrabaho.”
Kalpasan ti panangdeskribirna iti pagnanaedan ti coordinator ti Branch Committee a ni Vasily Kalin, insurat ni Mr. Yerofeyev: “Kayat a kitaen ti grupo dagiti agduadua a reportermi ti sumagmamano pay nga apartment nga isuda a mismo ti mangpili. Ti kadakkel ken muebles dagiti dadduma nga agindeg saan unay a naiduma iti nadalimanek a pannakaurnos iti apartment ni Vasily Kalin.”
Nagsurat ti maysa pay a reporter a ni Anastasiya Nemets iti artikulo a “Panagbiag a Natalna ti Isip.” Ti subtema iti dayta a paulo iti Vechernyaya Moskva ket “Daytoy ti Ad-adalen Dagiti Tattao iti Naisangsangayan a Purok iti Ruar ti St. Pete[rsburg].”
Iti panangdeskribirna iti lugar ken buya dagiti pasilidad ti sanga, insuratna: “Iti amin nga aglawlaw, addada kabakiran ken karuotan. Ti Gulf of Finland ket saan unay nga adayo. Adda ditoy dagiti nadalimanek a balay a naibangon iti estilo dagiti taga Europa, dagiti nadalusan a kalsada a naaramid iti ladrilio, ken naimula a namaris a sabsabong.
“Mamangon dagiti komersial a kompania kadagiti kasta a babassit a siudad para kadagiti ‘baro [nabaknang] a Ruso.’ Nupay kasta, nanumo a tattao ti agnanaed iti daytoy a purok . . . Agbibiagda a sinanam-ay, ket ti kapapatgan, agnanaedda kas aggagayyem. Ag-350 laeng ti tattao ditoy, manipud ti amin a suli ti daga; mangngegan ti maysa ti nadumaduma a lenguahe a maus-usar—manipud Español ken Portugues agingga iti Pinlandes ken Sueko.
“Kinapudnona, daytoy ket maysa a napaderan a komunidad: Ti purok ket addaan iti bukodna a puesto a pagaramidan ken pagtarimaanan, a sadiay posible nga isagana ti aniaman a kasapulan ti dakkel a pamilia a nadumadumat’ lenguahena; adda pay bukodda a klinika.”
Talaga a ti dedikasion ket nakaragragsak nga okasion para iti 1,492 a naggapu iti 42 a pagilian a dimmar-ay idiay Solnechnoye. Adu kadagiti dimmar-ay ket lallakay ken babbaket a pinulpullon a tawen a nagserserbi idi maiparit pay la ti trabaho a panangasaba. Agasenyo ti kasta unay a siddaaw ken rag-o dagitoy a lallakay ken babbaket bayat a pinasiarda ti nagpipintas a pasilidad a masarakan iti daytoy kasla hardin, 6.9 nga ektaria a lugar? Isu met la gayam nga impagarupda no agar-arapaapda laeng.
[Dagiti ladawan iti panid 18]
Dagiti periodista nga agpaspasiar kadagiti pasilidad ti sanga
Saludsod-ken-sungbat a sesion