Arapaap Laeng Kadi ti Naan-anay a Salun-at?
NAGSAKITKAYO kadin iti nakaro wenno naoperakayo kadin? No wen, mabalin nga apresiarenyo unay itan ti biag. Ngem aniaman ti pisikal a kasasaadyo, patienyo kadi a mabalin a sagrapen ti naan-anay a salun-at? Mabalin a saan pay ketdi a nakapapati daytoy gapu iti kaadu dagiti makabaldado nga an-annayen kas iti kanser wenno sakit ti puso. Kinapudnona, kaaduan kadatayo ti agsakit sagpaminsan. Ngem saan laeng nga arapaap ti naan-anay a salun-at.
Naparsua ti tao a mangsagrap iti nagsayaat a salun-at, saan a makidangadang iti sakit ken ipapatay. Gapuna, tapno masumra ti panagsakit ken ipapatay, nangipaay ni Jehova iti pakaibatayan ti naan-anay a salun-at ken agnanayon a biag babaen iti subbot a daton ni Kristo Jesus. “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Dagidiay agbiag nga agnanayon iti naikari a baro a lubong ti Dios saandanto a sarangten ti nakapuy a salun-at wenno kinalakay. Gapu ta agpayso dayta, anianto ti mapasamak kadagiti an-annayen?
Pannakabang-ar iti Sakit
Mangted iti pagarigan ti pamay-an ti panangagas idi ni Jesu-Kristo kadagiti baldado. Maipapan kadagita a panangagas naibaga: “Dagiti bulsek makakitada manen, ket dagiti pilay magmagnada, dagiti agkukutel madaldalusanda ket dagiti tuleng makangkangngegda, ket dagiti natay mapagpagungarda, ket dagiti napanglaw maidekdeklara kadakuada ti naimbag a damag.” (Mateo 11:3-5) Wen, amin a baldado nga immadani ken Jesus “napaimbagda a naan-anay.” (Mateo 14:36) Kas resultana, “nagsiddaaw ti bunggoy idi nakitada a ti umel agsasao ken ti pilay magmagna ken ti bulsek makakita, ket dinaydayawda ti Dios ti Israel.”—Mateo 15:31.
Kinapudnona, nupay awan ita ti makapagpaimbag a kas kadagitoy, agtalektayo nga iti sidong ti panangituray ti Dios, magun-odanton ti sangatauan ti kinaperpekto, maagasanton iti amin a mental ken pisikal a sakit. Nailanad iti Apocalipsis 21:3, 4 ti kari ti Dios: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”
Panunotenyo laengen ti maysa a lubong a sadiay din kasapulan ti aniaman nga industria ti parmasiutika wenno dagiti ospital, panagopera, wenno therapy! Kasta met, iti naisubli a Paraiso, awanton ti leddaang ken dagiti sakit ti isip. Pudno a nakaragragsakto ti biag; ken ti kinaragsak agbalin a permanente a rikna. Kinapudnona, ti awan inggana a pannakabalin ti Dios tignayennanto dagiti proseso a mangpabaro iti bagi, ket dagiti gunggona iti subbot pukawendanto dagiti makabaldado nga epekto ti basol. “Ti agtaeng dinanto kunaen, Masakitak.”—Isaias 33:24.
Anian a nakaskasdaaw a namnama—ti mangsagrap iti naan-anay a pisikal ken espiritual a salun-at iti sidong ti Pagarian ti Dios! Bayat a taginayonenyo ti natimbeng ken nasalun-at nga estilo ti panagbiag ita, inanamaenyo dagiti bendision iti baro a lubong ti Dios. Sapay koma ta ni Jehova ‘penkenna ti panagbiagyo iti naimbag, ket sapay koma ta kankanayon a mapabaro ti kinaagtutuboyo a kas iti agila’!—Salmo 103:5.